၂၆၂. အပ္ပဋိနိဿဂ္ဂေ ဥက္ခေပနီယကမ္မဝိဝါဒကထာ

၄၃၉. ဣဓ ပန၊ ဘိက္ခဝေ၊ ဘိက္ခု န ဣစ္ဆတိ ပါပိကံ ဒိဋ္ဌိံ ပဋိနိဿဇ္ဇိတုံ. တတြ စေ ဘိက္ခူနံ ဧဝံ ဟောတိ – ‘‘အယံ ခေါ၊ အာဝုသော၊ ဘိက္ခု န ဣစ္ဆတိ ပါပိကံ ဒိဋ္ဌိံ ပဋိနိဿဇ္ဇိတုံ. ဟန္ဒဿ မယံ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောမာ’’တိ. တေ တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂါ။ပေ။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ. တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ၊ အဓမ္မေန သမဂ္ဂကမ္မံ၊ ဓမ္မေန ဝဂ္ဂကမ္မံ၊ ဓမ္မပတိရူပကေန ဝဂ္ဂကမ္မံ၊ ဓမ္မပတိရူပကေန သမဂ္ဂကမ္မံ၊ အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ. တတြ၊ ဘိက္ခဝေ၊ ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ၊ ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ၊ ဣမေ တတ္ထ ဘိက္ခူ ဓမ္မဝါဒိနော. ဣမေ ပဉ္စ ဝါရာ သံခိတ္တာ.

အပ္ပဋိနိဿဂ္ဂေ ဥက္ခေပနီယကမ္မဝိဝါဒကထာ နိဋ္ဌိတာ.