၂၄၈. အပ္ပဋိနိဿဂ္ဂေ ဥက္ခေပနီယကမ္မကထာ

၄၁၇. ဣဓ ပန၊ ဘိက္ခဝေ၊ ဘိက္ခု န ဣစ္ဆတိ ပါပိကံ ဒိဋ္ဌိံ ပဋိနိဿဇ္ဇိတုံ. တတြ စေ ဘိက္ခူနံ ဧဝံ ဟောတိ – ‘‘အယံ ခေါ၊ အာဝုသော၊ ဘိက္ခု န ဣစ္ဆတိ ပါပိကံ ဒိဋ္ဌိံ ပဋိနိဿဇ္ဇိတုံ. ဟန္ဒဿ မယံ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောမာ’’တိ. တေ တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂါ. သော တမှာ အာဝါသာ အညံ အာဝါသံ ဂစ္ဆတိ. တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ၊ အာဝုသော၊ ဘိက္ခု သံဃေန ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မကတော အဓမ္မေန ဝဂ္ဂေဟိ. ဟန္ဒဿ မယံ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောမာ’’တိ. တေ တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောန္တိ – အဓမ္မေန သမဂ္ဂါ။ပေ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ။.

စက္ကံ ကာတဗ္ဗံ.

အပ္ပဋိနိဿဂ္ဂေ ဥက္ခေပနီယကမ္မကထာ နိဋ္ဌိတာ.