၂၃၀. သံဃေ ဘိန္နေ စီဝရုပ္ပါဒကထာ

၃၇၆. ဣဓ ပန၊ ဘိက္ခဝေ၊ ဝဿံဝုဋ္ဌာနံ ဘိက္ခူနံ အနုပ္ပန္နေ စီဝရေ သံဃော ဘိဇ္ဇတိ. တတ္ထ မနုဿာ ဧကသ္မိံ ပက္ခေ ဥဒကံ ဒေန္တိ၊ ဧကသ္မိံ ပက္ခေ စီဝရံ ဒေန္တိ – သံဃဿ ဒေမာတိ. သံဃဿေဝေတံ.

ဣဓ ပန၊ ဘိက္ခဝေ၊ ဝဿံဝုဋ္ဌာနံ ဘိက္ခူနံ အနုပ္ပန္နေ စီဝရေ သံဃော ဘိဇ္ဇတိ. တတ္ထ မနုဿာ ဧကသ္မိံ ပက္ခေ ဥဒကံ ဒေန္တိ၊ တသ္မိံယေဝ ပက္ခေ စီဝရံ ဒေန္တိ – သံဃဿ ဒေမာတိ. သံဃဿေဝေတံ.

ဣဓ ပန၊ ဘိက္ခဝေ၊ ဝဿံဝုဋ္ဌာနံ ဘိက္ခူနံ အနုပ္ပန္နေ စီဝရေ သံဃော ဘိဇ္ဇတိ. တတ္ထ မနုဿာ ဧကသ္မိံ ပက္ခေ ဥဒကံ ဒေန္တိ၊ ဧကသ္မိံ ပက္ခေ စီဝရံ ဒေန္တိ – ပက္ခဿ ဒေမာတိ. ပက္ခဿေဝေတံ.

ဣဓ ပန၊ ဘိက္ခဝေ၊ ဝဿံဝုဋ္ဌာနံ ဘိက္ခူနံ အနုပ္ပန္နေ စီဝရေ သံဃော ဘိဇ္ဇတိ. တတ္ထ မနုဿာ ဧကသ္မိံ ပက္ခေ ဥဒကံ ဒေန္တိ၊ တသ္မိံယေဝ ပက္ခေ စီဝရံ ဒေန္တိ – ပက္ခဿ ဒေမာတိ. ပက္ခဿေဝေတံ.

ဣဓ ပန၊ ဘိက္ခဝေ၊ ဝဿံဝုဋ္ဌာနံ ဘိက္ခူနံ ဥပ္ပန္နေ စီဝရေ အဘာဇိတေ သံဃော ဘိဇ္ဇတိ. သဗ္ဗေသံ သမကံ ဘာဇေတဗ္ဗန္တိ.

သံဃေ ဘိန္နေ စီဝရုပ္ပါဒကထာ နိဋ္ဌိတာ.