၂၂၈. သဗ္ဗနီလကာဒိပဋိက္ခေပကထာ

၃၇၂. တေန ခေါ ပန သမယေန ဆဗ္ဗဂ္ဂိယာ ဘိက္ခူ သဗ္ဗနီလကာနိ စီဝရာနိ ဓာရေန္တိ။ပေ။ သဗ္ဗပီတကာနိ စီဝရာနိ ဓာရေန္တိ။ပေ။ သဗ္ဗလောဟိတကာနိ စီဝရာနိ ဓာရေန္တိ။ပေ။ သဗ္ဗမဉ္ဇိဋ္ဌကာနိ [သဗ္ဗမဉ္ဇေဋ္ဌကာနိ (သီ. သျာ.)] စီဝရာနိ ဓာရေန္တိ။ပေ။ သဗ္ဗကဏှာနိ စီဝရာနိ ဓာရေန္တိ ။ပေ။ သဗ္ဗမဟာရင်္ဂရတ္တာနိ စီဝရာနိ ဓာရေန္တိ။ပေ။ သဗ္ဗမဟာနာမရတ္တာနိ စီဝရာနိ ဓာရေန္တိ။ပေ။ အစ္ဆိန္နဒသာနိ စီဝရာနိ ဓာရေန္တိ။ပေ။ ဒီဃဒသာနိ စီဝရာနိ ဓာရေန္တိ။ပေ။ ပုပ္ဖဒသာနိ စီဝရာနိ ဓာရေန္တိ။ပေ။ ဖဏဒသာနိ [ဖလဒသာနိ (က.)] စီဝရာနိ ဓာရေန္တိ။ပေ။ ကဉ္စုကံ ဓာရေန္တိ။ပေ။ တိရီဋကံ ဓာရေန္တိ။ပေ။ ဝေဌနံ ဓာရေန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ ဝေဌနံ ဓာရေဿန္တိ၊ သေယျထာပိ ဂိဟီ ကာမဘောဂိနော’’တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ သဗ္ဗနီလကာနိ စီဝရာနိ ဓာရေတဗ္ဗာနိ၊ န သဗ္ဗပီတကာနိ စီဝရာနိ ဓာရေတဗ္ဗာနိ၊ န သဗ္ဗလောဟိတကာနိ စီဝရာနိ ဓာရေတဗ္ဗာနိ၊ န သဗ္ဗမဉ္ဇိဋ္ဌကာနိ စီဝရာနိ ဓာရေတဗ္ဗာနိ၊ န သဗ္ဗကဏှာနိ စီဝရာနိ ဓာရေတဗ္ဗာနိ၊ န သဗ္ဗမဟာရင်္ဂရတ္တာနိ စီဝရာနိ ဓာရေတဗ္ဗာနိ၊ န သဗ္ဗမဟာနာမရတ္တာနိ စီဝရာနိ ဓာရေတဗ္ဗာနိ၊ န အစ္ဆိန္နဒသာနိ စီဝရာနိ ဓာရေတဗ္ဗာနိ၊ န ဒီဃဒသာနိ စီဝရာနိ ဓာရေတဗ္ဗာနိ၊ န ပုပ္ဖဒသာနိ စီဝရာနိ ဓာရေတဗ္ဗာနိ၊ န ဖဏဒသာနိ စီဝရာနိ ဓာရေတဗ္ဗာနိ၊ န ကဉ္စုကံ ဓာရေတဗ္ဗံ၊ န တိရီဋကံ ဓာရေတဗ္ဗံ၊ န ဝေဌနံ ဓာရေတဗ္ဗံ. ယော ဓာရေယျ၊ အာပတ္တိ ဒုက္ကဋဿာတိ.

သဗ္ဗနီလကာဒိပဋိက္ခေပကထာ နိဋ္ဌိတာ.