၂၂၁. ပစ္ဆိမဝိကပ္ပနုပဂစီဝရာဒိကထာ

၃၅၈. အထ ခေါ ဘိက္ခူနံ ဧတဒဟောသိ – ‘‘ယာနိ တာနိ ဘဂဝတာ အနုညာတာနိ တိစီဝရန္တိ ဝါ ဝဿိကသာဋိကာတိ ဝါ နိသီဒနန္တိ ဝါ ပစ္စတ္ထရဏန္တိ ဝါ ကဏ္ဍုပ္ပဋိစ္ဆာဒီတိ ဝါ မုခပုဉ္ဆနစောဠန္တိ ဝါ ပရိက္ခာရစောဠန္တိ ဝါ၊ သဗ္ဗာနိ တာနိ အဓိဋ္ဌာတဗ္ဗာနိ နု ခေါ၊ ဥဒါဟု၊ ဝိကပ္ပေတဗ္ဗာနီ’’တိ? ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ တိစီဝရံ အဓိဋ္ဌာတုံ န ဝိကပ္ပေတုံ၊ ဝဿိကသာဋိကံ ဝဿာနံ စာတုမာသံ အဓိဋ္ဌာတုံ၊ တတော ပရံ ဝိကပ္ပေတုံ၊ နိသီဒနံ အဓိဋ္ဌာတုံ န ဝိကပ္ပေတုံ၊ ပစ္စတ္ထရဏံ အဓိဋ္ဌာတုံ န ဝိကပ္ပေတုံ၊ ကဏ္ဍုပ္ပဋိစ္ဆာဒိံ ယာဝအာဗာဓာ အဓိဋ္ဌာတုံ တတော ပရံ ဝိကပ္ပေတုံ၊ မုခပုဉ္ဆနစောဠံ အဓိဋ္ဌာတုံ န ဝိကပ္ပေတုံ၊ ပရိက္ခာရစောဠံ အဓိဋ္ဌာတုံ န ဝိကပ္ပေတုန္တိ.

အထ ခေါ ဘိက္ခူနံ ဧတဒဟောသိ – ‘‘ကိတ္တကံ ပစ္ဆိမံ နု ခေါ စီဝရံ ဝိကပ္ပေတဗ္ဗ’’န္တိ? ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ အာယာမေန အဋ္ဌင်္ဂုလံ သုဂတင်္ဂုလေန စတုရင်္ဂုလဝိတ္ထတံ ပစ္ဆိမံ စီဝရံ ဝိကပ္ပေတုန္တိ.

၃၅၉. တေန ခေါ ပန သမယေန အာယသ္မတော မဟာကဿပဿ ပံသုကူလကတော ဂရုကော ဟောတိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ သုတ္တလူခံ ကာတုန္တိ. ဝိကဏ္ဏော ဟောတိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဝိကဏ္ဏံ ဥဒ္ဓရိတုန္တိ. သုတ္တာ ဩကိရိယန္တိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ အနုဝါတံ ပရိဘဏ္ဍံ အာရောပေတုန္တိ.

တေန ခေါ ပန သမယေန သင်္ဃာဋိယာ ပတ္တာ လုဇ္ဇန္တိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ အဋ္ဌပဒကံ ကာတုန္တိ.

၃၆၀. တေန ခေါ ပန သမယေန အညတရဿ ဘိက္ခုနော တိစီဝရေ ကယိရမာနေ သဗ္ဗံ ဆိန္နကံ နပ္ပဟောတိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဒွေ ဆိန္နကာနိ ဧကံ အစ္ဆိန္နကန္တိ.

ဒွေ ဆိန္နကာနိ ဧကံ အစ္ဆိန္နကံ နပ္ပဟောတိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဒွေ အစ္ဆိန္နကာနိ ဧကံ ဆိန္နကန္တိ.

ဒွေ အစ္ဆိန္နကာနိ ဧကံ ဆိန္နကံ နပ္ပဟောတိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ အနွာဓိကမ္ပိ အာရောပေတုံ၊ န စ၊ ဘိက္ခဝေ၊ သဗ္ဗံ အစ္ဆိန္နကံ ဓာရေတဗ္ဗံ. ယော ဓာရေယျ၊ အာပတ္တိ ဒုက္ကဋဿာတိ.

၃၆၁. တေန ခေါ ပန သမယေန အညတရဿ ဘိက္ခုနော ဗဟုံ စီဝရံ ဥပ္ပန္နံ ဟောတိ. သော စ တံ စီဝရံ မာတာပိတူနံ ဒါတုကာမော ဟောတိ. ဘဂဝတော ဧတမတ္ထံ အာရောစေသုံ. မာတာပိတရောတိ [မာတာပိတူနံ ခေါ (သီ.)] ခေါ၊ ဘိက္ခဝေ၊ ဒဒမာနေ [ဝဒမာနော (က.)၊ ဝဒမာနေ (?)] ကိံ ဝဒေယျာမ? အနုဇာနာမိ၊ ဘိက္ခဝေ၊ မာတာပိတူနံ ဒါတုံ. န စ၊ ဘိက္ခဝေ၊ သဒ္ဓါဒေယျံ ဝိနိပါတေတဗ္ဗံ. ယော ဝိနိပါတေယျ၊ အာပတ္တိ ဒုက္ကဋဿာတိ.

၃၆၂. တေန ခေါ ပန သမယေန အညတရော ဘိက္ခု အန္ဓဝနေ စီဝရံ နိက္ခိပိတွာ သန္တရုတ္တရေန ဂါမံ ပိဏ္ဍာယ ပါဝိသိ. စောရာ တံ စီဝရံ အဝဟရိံသု. သော ဘိက္ခု ဒုစ္စောဠော ဟောတိ လူခစီဝရော. ဘိက္ခူ ဧဝမာဟံသု – ‘‘ကိဿ တွံ၊ အာဝုသော၊ ဒုစ္စောဠော လူခစီဝရောသီ’’တိ? ‘‘ဣဓာဟံ [သော အဟံ (ကတ္ထစိ)]၊ အာဝုသော၊ အန္ဓဝနေ စီဝရံ နိက္ခိပိတွာ သန္တရုတ္တရေန ဂါမံ ပိဏ္ဍာယ ပါဝိသိံ. စောရာ တံ စီဝရံ အဝဟရိံသု. တေနာဟံ ဒုစ္စောဠော လူခစီဝရော’’တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ သန္တရုတ္တရေန ဂါမော ပဝိသိတဗ္ဗော. ယော ပဝိသေယျ၊ အာပတ္တိ ဒုက္ကဋဿာတိ.

တေန ခေါ ပန သမယေန အာယသ္မာ အာနန္ဒော အဿတိယာ သန္တရုတ္တရေန ဂါမံ ပိဏ္ဍာယ ပါဝိသိ. ဘိက္ခူ အာယသ္မန္တံ အာနန္ဒံ ဧတဒဝေါစုံ – ‘‘နနု၊ အာဝုသော အာနန္ဒ၊ ဘဂဝတာ ပညတ္တံ – ‘န သန္တရုတ္တရေန ဂါမော ပဝိသိတဗ္ဗော’တိ? ကိဿ တွံ၊ အာဝုသော အာနန္ဒ၊ သန္တရုတ္တရေန ဂါမံ ပဝိဋ္ဌော’’တိ? ‘‘သစ္စံ၊ အာဝုသော၊ ဘဂဝတာ ပညတ္တံ – ‘န သန္တရုတ္တရေန ဂါမော ပဝိသိတဗ္ဗော’တိ. အပိ စာဟံ အဿတိယာ ပဝိဋ္ဌော’’တိ. ဘဂဝတော ဧတမတ္ထံ အာရောစေသုံ.

ပဉ္စိမေ၊ ဘိက္ခဝေ၊ ပစ္စယာ သင်္ဃာဋိယာ နိက္ခေပါယ – ဂိလာနော ဝါ ဟောတိ၊ ဝဿိကသင်္ကေတံ ဝါ ဟောတိ၊ နဒီပါရံ ဂန္တုံ ဝါ ဟောတိ၊ အဂ္ဂဠဂုတ္တိဝိဟာရော ဝါ ဟောတိ၊ အတ္ထတကထိနံ ဝါ ဟောတိ. ဣမေ ခေါ၊ ဘိက္ခဝေ၊ ပဉ္စ ပစ္စယာ သင်္ဃာဋိယာ နိက္ခေပါယ.

ပဉ္စိမေ၊ ဘိက္ခဝေ၊ ပစ္စယာ ဥတ္တရာသင်္ဂဿ နိက္ခေပါယ။ပေ။ အန္တရဝါသကဿ နိက္ခေပါယ – ဂိလာနော ဝါ ဟောတိ၊ ဝဿိကသင်္ကေတံ ဝါ ဟောတိ၊ နဒီပါရံ ဂန္တုံ ဝါ ဟောတိ၊ အဂ္ဂဠဂုတ္တိဝိဟာရော ဝါ ဟောတိ၊ အတ္ထတကထိနံ ဝါ ဟောတိ. ဣမေ ခေါ၊ ဘိက္ခဝေ၊ ပဉ္စ ပစ္စယာ ဥတ္တရာသင်္ဂဿ အန္တရဝါသကဿ နိက္ခေပါယ.

ပဉ္စိမေ၊ ဘိက္ခဝေ၊ ပစ္စယာ ဝဿိကသာဋိကာယ နိက္ခေပါယ – ဂိလာနော ဝါ ဟောတိ၊ နိဿီမံ ဂန္တုံ ဝါ ဟောတိ၊ နဒီပါရံ ဂန္တုံ ဝါ ဟောတိ၊ အဂ္ဂဠဂုတ္တိဝိဟာရော ဝါ ဟောတိ၊ ဝဿိကသာဋိကာ အကတာ ဝါ ဟောတိ ဝိပ္ပကတာ ဝါ. ဣမေ ခေါ၊ ဘိက္ခဝေ၊ ပဉ္စ ပစ္စယာ ဝဿိကသာဋိကာယ နိက္ခေပါယာတိ.

ပစ္ဆိမဝိကပ္ပနုပဂစီဝရာဒိကထာ နိဋ္ဌိတာ.