၂၁၉. ဝိသာခါဝတ္ထု

၃၄၉. အထ ခေါ ဘဂဝါ ဗာရာဏသိယံ ယထာဘိရန္တံ ဝိဟရိတွာ ယေန သာဝတ္ထိ တေန စာရိကံ ပက္ကာမိ. အနုပုဗ္ဗေန စာရိကံ စရမာနော ယေန သာဝတ္ထိ တဒဝသရိ. တတြ သုဒံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ ဝိသာခါ မိဂါရမာတာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ ဝိသာခံ မိဂါရမာတရံ ဘဂဝါ ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ. အထ ခေါ ဝိသာခါ မိဂါရမာတာ၊ ဘဂဝတာ ဓမ္မိယာ ကထာယ သန္ဒဿိတာ သမာဒပိတာ သမုတ္တေဇိတာ သမ္ပဟံသိတာ၊ ဘဂဝန္တံ ဧတဒဝေါစ – ‘‘အဓိဝါသေတု မေ၊ ဘန္တေ၊ ဘဂဝါ သွာတနာယ ဘတ္တံ သဒ္ဓိံ ဘိက္ခုသံဃေနာ’’တိ. အဓိဝါသေသိ ဘဂဝါ တုဏှီဘာဝေန. အထ ခေါ ဝိသာခါ မိဂါရမာတာ ဘဂဝတော အဓိဝါသနံ ဝိဒိတွာ ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ.

တေန ခေါ ပန သမယေန တဿာ ရတ္တိယာ အစ္စယေန စာတုဒ္ဒီပိကော မဟာမေဃော ပါဝဿိ. အထ ခေါ ဘဂဝါ ဘိက္ခူ အာမန္တေသိ – ‘‘ယထာ၊ ဘိက္ခဝေ၊ ဇေတဝနေ ဝဿတိ ဧဝံ စတူသု ဒီပေသု ဝဿတိ. ဩဝဿာပေထ၊ ဘိက္ခဝေ၊ ကာယံ. အယံ ပစ္ဆိမကော စာတုဒ္ဒီပိကော မဟာမေဃော’’တိ. ‘‘ဧဝံ၊ ဘန္တေ’’တိ ခေါ တေ ဘိက္ခူ ဘဂဝတော ပဋိဿုဏိတွာ နိက္ခိတ္တစီဝရာ ကာယံ ဩဝဿာပေန္တိ. အထ ခေါ ဝိသာခါ မိဂါရမာတာ ပဏီတံ ခါဒနီယံ ဘောဇနီယံ ပဋိယာဒါပေတွာ ဒါသိံ အာဏာပေသိ – ‘‘ဂစ္ဆ၊ ဇေ. အာရာမံ ဂန္တွာ ကာလံ အာရောစေဟိ – ကာလော၊ ဘန္တေ၊ နိဋ္ဌိတံ ဘတ္တ’’န္တိ. ‘‘ဧဝံ၊ အယျေ’’တိ ခေါ သာ ဒါသီ ဝိသာခါယ မိဂါရမာတုယာ ပဋိဿုဏိတွာ အာရာမံ ဂန္တွာ အဒ္ဒသ ဘိက္ခူ နိက္ခိတ္တစီဝရေ ကာယံ ဩဝဿာပေန္တေ၊ ဒိသွာန ‘နတ္ထိ အာရာမေ ဘိက္ခူ၊ အာဇီဝကာ ကာယံ ဩဝဿာပေန္တီ’တိ ယေန ဝိသာခါ မိဂါရမာတာ တေနုပသင်္ကမိ၊ ဥပသင်္ကမိတွာ ဝိသာခံ မိဂါရမာတရံ ဧတဒဝေါစ – ‘‘နတ္ထယျေ၊ အာရာမေ ဘိက္ခူ၊ အာဇီဝကာ ကာယံ ဩဝဿာပေန္တီ’’တိ. အထ ခေါ ဝိသာခါယ မိဂါရမာတုယာ ပဏ္ဍိတာယ ဝိယတ္တာယ မေဓာဝိနိယာ ဧတဒဟောသိ – ‘‘နိဿံသယံ ခေါ အယျာ နိက္ခိတ္တစီဝရာ ကာယံ ဩဝဿာပေန္တိ. သာယံ ဗာလာ မညိတ္ထ – နတ္ထိ အာရာမေ ဘိက္ခူ၊ အာဇီဝကာ ကာယံ ဩဝဿာပေန္တီ’’တိ၊ ပုန ဒါသိံ အာဏာပေသိ – ‘‘ဂစ္ဆ၊ ဇေ. အာရာမံ ဂန္တွာ ကာလံ အာရောစေဟိ – ကာလော၊ ဘန္တေ၊ နိဋ္ဌိတံ ဘတ္တ’’န္တိ. အထ ခေါ တေ ဘိက္ခူ ဂတ္တာနိ သီတိံ ကရိတွာ [သီတီကရိတွာ (သျာ.)] ကလ္လကာယာ စီဝရာနိ ဂဟေတွာ ယထာဝိဟာရံ ပဝိသိံသု. အထ ခေါ သာ ဒါသီ အာရာမံ ဂန္တွာ ဘိက္ခူ အပဿန္တီ ‘နတ္ထိ အာရာမေ ဘိက္ခူ၊ သုညော အာရာမော’တိ ယေန ဝိသာခါ မိဂါရမာတာ တေနုပသင်္ကမိ၊ ဥပသင်္ကမိတွာ ဝိသာခံ မိဂါရမာတရံ ဧတဒဝေါစ – ‘‘နတ္ထယျေ၊ အာရာမေ ဘိက္ခူ၊ သုညော အာရာမော’’တိ. အထ ခေါ ဝိသာခါယ မိဂါရမာတုယာ ပဏ္ဍိတာယ ဝိယတ္တာယ မေဓာဝိနိယာ ဧတဒဟောသိ – ‘‘နိဿံသယံ ခေါ အယျာ ဂတ္တာနိ သီတိံ ကရိတွာ ကလ္လကာယာ စီဝရာနိ ဂဟေတွာ ယထာဝိဟာရံ ပဝိဋ္ဌာ. သာယံ ဗာလာ မညိတ္ထ – နတ္ထိ အာရာမေ ဘိက္ခူ၊ သုညော အာရာမော’’တိ၊ ပုန ဒါသိံ အာဏာပေသိ – ‘‘ဂစ္ဆ၊ ဇေ. အာရာမံ ဂန္တွာ ကာလံ အာရောစေဟိ – ကာလော၊ ဘန္တေ၊ နိဋ္ဌိတံ ဘတ္တ’’န္တိ.

၃၅၀. အထ ခေါ ဘဂဝါ ဘိက္ခူ အာမန္တေသိ – ‘‘သန္ဒဟထ [သန္နဟထ (သီ. သျာ.)]၊ ဘိက္ခဝေ၊ ပတ္တစီဝရံ၊ ကာလော ဘတ္တဿာ’’တိ. ‘‘ဧဝံ၊ ဘန္တေ’’တိ ခေါ တေ ဘိက္ခူ ဘဂဝတော ပစ္စဿောသုံ. အထ ခေါ ဘဂဝါ ပုဗ္ဗဏှသမယံ နိဝါသေတွာ ပတ္တစီဝရမာဒါယ – သေယျထာပိ နာမ ဗလဝါ ပုရိသော သမ္မိဉ္ဇိတံ ဝါ ဗာဟံ ပသာရေယျ၊ ပသာရိတံ ဝါ ဗာဟံ သမိဉ္ဇေယျ၊ ဧဝမေဝ – ဇေတဝနေ အန္တရဟိတော ဝိသာခါယ မိဂါရမာတုယာ ကောဋ္ဌကေ ပါတုရဟောသိ. နိသီဒိ ဘဂဝါ ပညတ္တေ အာသနေ သဒ္ဓိံ ဘိက္ခုသံဃေန. အထ ခေါ ဝိသာခါ မိဂါရမာတာ – ‘‘အစ္ဆရိယံ ဝတ ဘော! အဗ္ဘုတံ ဝတ ဘော! တထာဂတဿ မဟိဒ္ဓိကတာ မဟာနုဘာဝတာ၊ ယတြ ဟိ နာမ ဇဏ္ဏုကမတ္တေသုပိ ဩဃေသု ပဝတ္တမာနေသု၊ ကဋိမတ္တေသုပိ ဩဃေသု ပဝတ္တမာနေသု၊ န ဟိ နာမ ဧကဘိက္ခုဿပိ [ပဝတ္တမာနေသု န ဧကဘိက္ခုဿပိ (?)] ပါဒါ ဝါ စီဝရာနိ ဝါ အလ္လာနိ ဘဝိဿန္တီ’’တိ – ဟဋ္ဌာ ဥဒဂ္ဂါ ဗုဒ္ဓပ္ပမုခံ ဘိက္ခုသံဃံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေတွာ သမ္ပဝါရေတွာ ဘဂဝန္တံ ဘုတ္တာဝိံ ဩနီတပတ္တပါဏိံ ဧကမန္တံ နိသီဒိ. ဧကမန္တံ နိသိန္နာ ခေါ ဝိသာခါ မိဂါရမာတာ ဘဂဝန္တံ ဧတဒဝေါစ – ‘‘အဋ္ဌာဟံ၊ ဘန္တေ၊ ဘဂဝန္တံ ဝရာနိ ယာစာမီ’’တိ. ‘‘အတိက္ကန္တဝရာ ခေါ၊ ဝိသာခေ၊ တထာဂတာ’’တိ. ‘‘ယာနိ စ၊ ဘန္တေ၊ ကပ္ပိယာနိ ယာနိ စ အနဝဇ္ဇာနီ’’တိ. ‘‘ဝဒေဟိ၊ ဝိသာခေ’’တိ. ‘‘ဣစ္ဆာမဟံ၊ ဘန္တေ၊ သံဃဿ ယာဝဇီဝံ ဝဿိကသာဋိကံ ဒါတုံ၊ အာဂန္တုကဘတ္တံ ဒါတုံ၊ ဂမိကဘတ္တံ ဒါတုံ၊ ဂိလာနဘတ္တံ ဒါတုံ၊ ဂိလာနုပဋ္ဌာကဘတ္တံ ဒါတုံ၊ ဂိလာနဘေသဇ္ဇံ ဒါတုံ၊ ဓုဝယာဂုံ ဒါတုံ၊ ဘိက္ခုနိသံဃဿ ဥဒကသာဋိကံ ဒါတု’’န္တိ. ‘‘ကိံ ပန တွံ၊ ဝိသာခေ၊ အတ္ထဝသံ သမ္ပဿမာနာ တထာဂတံ အဋ္ဌ ဝရာနိ ယာစသီ’’တိ?

‘‘ဣဓာဟံ၊ ဘန္တေ၊ ဒါသိံ အာဏာပေသိံ – ‘ဂစ္ဆ၊ ဇေ. အာရာမံ ဂန္တွာ ကာလံ အာရောစေဟိ – ကာလော၊ ဘန္တေ၊ နိဋ္ဌိတံ ဘတ္တ’’’န္တိ. အထ ခေါ သာ၊ ဘန္တေ၊ ဒါသီ အာရာမံ ဂန္တွာ အဒ္ဒသ ဘိက္ခူ နိက္ခိတ္တစီဝရေ ကာယံ ဩဝဿာပေန္တေ၊ ဒိသွာန ‘‘နတ္ထိ အာရာမေ ဘိက္ခူ၊ အာဇီဝကာ ကာယံ ဩဝဿာပေန္တီ’’တိ ယေနာဟံ တေနုပသင်္ကမိ၊ ဥပသင်္ကမိတွာ မံ ဧတဒဝေါစ – ‘‘နတ္ထယျေ၊ အာရာမေ ဘိက္ခူ၊ အာဇီဝကာ ကာယံ ဩဝဿာပေန္တီ’’တိ. အသုစိ၊ ဘန္တေ၊ နဂ္ဂိယံ ဇေဂုစ္ဆံ ပဋိကူလံ. ဣမာဟံ၊ ဘန္တေ၊ အတ္ထဝသံ သမ္ပဿမာနာ ဣစ္ဆာမိ သံဃဿ ယာဝဇီဝံ ဝဿိကသာဋိကံ ဒါတုံ.

‘‘ပုန စပရံ၊ ဘန္တေ၊ အာဂန္တုကော ဘိက္ခု န ဝီထိကုသလော န ဂေါစရကုသလော ကိလန္တော ပိဏ္ဍာယ စရတိ. သော မေ အာဂန္တုကဘတ္တံ ဘုဉ္ဇိတွာ ဝီထိကုသလော ဂေါစရကုသလော အကိလန္တော ပိဏ္ဍာယ စရိဿတိ. ဣမာဟံ၊ ဘန္တေ၊ အတ္ထဝသံ သမ္ပဿမာနာ ဣစ္ဆာမိ သံဃဿ ယာဝဇီဝံ အာဂန္တုကဘတ္တံ ဒါတုံ.

‘‘ပုန စပရံ၊ ဘန္တေ၊ ဂမိကော ဘိက္ခု အတ္တနော ဘတ္တံ ပရိယေသမာနော သတ္ထာ ဝါ ဝိဟာယိဿတိ၊ ယတ္ထ ဝါ ဝါသံ ဂန္တုကာမော ဘဝိဿတိ တတ္ထ ဝိကာလေ ဥပဂစ္ဆိဿတိ၊ ကိလန္တော အဒ္ဓါနံ ဂမိဿတိ. သော မေ ဂမိကဘတ္တံ ဘုဉ္ဇိတွာ သတ္ထာ န ဝိဟာယိဿတိ၊ ယတ္ထ ဝါသံ ဂန္တုကာမော ဘဝိဿတိ တတ္ထ ကာလေ ဥပဂစ္ဆိဿတိ၊ အကိလန္တော အဒ္ဓါနံ ဂမိဿတိ. ဣမာဟံ၊ ဘန္တေ၊ အတ္ထဝသံ သမ္ပဿမာနာ ဣစ္ဆာမိ သံဃဿ ယာဝဇီဝံ ဂမိကဘတ္တံ ဒါတုံ.

‘‘ပုန စပရံ၊ ဘန္တေ၊ ဂိလာနဿ ဘိက္ခုနော သပ္ပါယာနိ ဘောဇနာနိ အလဘန္တဿ အာဗာဓော ဝါ အဘိဝဍ္ဎိဿတိ၊ ကာလံကိရိယာ ဝါ ဘဝိဿတိ. တဿ မေ ဂိလာနဘတ္တံ ဘုတ္တဿ အာဗာဓော န အဘိဝဍ္ဎိဿတိ၊ ကာလံကိရိယာ န ဘဝိဿတိ. ဣမာဟံ၊ ဘန္တေ၊ အတ္ထဝသံ သမ္ပဿမာနာ ဣစ္ဆာမိ သံဃဿ ယာဝဇီဝံ ဂိလာနဘတ္တံ ဒါတုံ. ‘‘ပုန စပရံ၊ ဘန္တေ၊ ဂိလာနုပဋ္ဌာကော ဘိက္ခု အတ္တနော ဘတ္တံ ပရိယေသမာနော ဂိလာနဿ ဥဿူရေ ဘတ္တံ နီဟရိဿတိ၊ ဘတ္တစ္ဆေဒံ ကရိဿတိ. သော မေ ဂိလာနုပဋ္ဌာကဘတ္တံ ဘုဉ္ဇိတွာ ဂိလာနဿ ကာလေန ဘတ္တံ နီဟရိဿတိ၊ ဘတ္တစ္ဆေဒံ န ကရိဿတိ. ဣမာဟံ၊ ဘန္တေ၊ အတ္ထဝသံ သမ္ပဿမာနာ ဣစ္ဆာမိ သံဃဿ ယာဝဇီဝံ ဂိလာနုပဋ္ဌာကဘတ္တံ ဒါတုံ.

‘‘ပုန စပရံ၊ ဘန္တေ၊ ဂိလာနဿ ဘိက္ခုနော သပ္ပါယာနိ ဘေသဇ္ဇာနိ အလဘန္တဿ အာဗာဓော ဝါ အဘိဝဍ္ဎိဿတိ၊ ကာလံကိရိယာ ဝါ ဘဝိဿတိ. တဿ မေ ဂိလာနဘေသဇ္ဇံ ပရိဘုတ္တဿ အာဗာဓော န အဘိဝဍ္ဎိဿတိ၊ ကာလံကိရိယာ န ဘဝိဿတိ. ဣမာဟံ၊ ဘန္တေ၊ အတ္ထဝသံ သမ္ပဿမာနာ ဣစ္ဆာမိ သံဃဿ ယာဝဇီဝံ ဂိလာနဘေသဇ္ဇံ ဒါတုံ.

‘‘ပုန စပရံ၊ ဘန္တေ၊ ဘဂဝတာ အန္ဓကဝိန္ဒေ ဒသာနိသံသေ သမ္ပဿမာနေန ယာဂု အနုညာတာ. တျာဟံ၊ ဘန္တေ၊ အာနိသံသေ သမ္ပဿမာနာ ဣစ္ဆာမိ သံဃဿ ယာဝဇီဝံ ဓုဝယာဂုံ ဒါတုံ.

‘‘ဣဓ၊ ဘန္တေ၊ ဘိက္ခုနိယော အစိရဝတိယာ နဒိယာ ဝေသိယာဟိ သဒ္ဓိံ နဂ္ဂါ ဧကတိတ္ထေ နဟာယန္တိ. တာ၊ ဘန္တေ၊ ဝေသိယာ ဘိက္ခုနိယော ဥပ္ပဏ္ဍေသုံ – ‘ကိံ နု ခေါ နာမ တုမှာကံ၊ အယျေ၊ ဒဟရာနံ [ဒဟရာနံ ဒဟရာနံ (သီ.)] ဗြဟ္မစရိယံ စိဏ္ဏေန၊ နနု နာမ ကာမာ ပရိဘုဉ္ဇိတဗ္ဗာ၊ ယဒါ ဇိဏ္ဏာ ဘဝိဿထ တဒါ ဗြဟ္မစရိယံ စရိဿထ. ဧဝံ တုမှာကံ ဥဘော အတ္ထာ ပရိဂ္ဂဟိတာ ဘဝိဿန္တီ’တိ. တာ၊ ဘန္တေ၊ ဘိက္ခုနိယော ဝေသိယာဟိ ဥပ္ပဏ္ဍိယမာနာ မင်္ကူ အဟေသုံ. အသုစိ၊ ဘန္တေ၊ မာတုဂါမဿ နဂ္ဂိယံ ဇေဂုစ္ဆံ ပဋိကူလံ. ဣမာဟံ၊ ဘန္တေ၊ အတ္ထဝသံ သမ္ပဿမာနာ ဣစ္ဆာမိ ဘိက္ခုနိသံဃဿ ယာဝဇီဝံ ဥဒကသာဋိကံ ဒါတု’’န္တိ.

၃၅၁. ‘‘ကိံ ပန တွံ၊ ဝိသာခေ၊ အာနိသံသံ သမ္ပဿမာနာ တထာဂတံ အဋ္ဌ ဝရာနိ ယာစသီ’’တိ? ‘‘ဣဓ၊ ဘန္တေ၊ ဒိသာသု ဝဿံဝုဋ္ဌာ ဘိက္ခူ သာဝတ္ထိံ အာဂစ္ဆိဿန္တိ ဘဂဝန္တံ ဒဿနာယ. တေ ဘဂဝန္တံ ဥပသင်္ကမိတွာ ပုစ္ဆိဿန္တိ – ‘ဣတ္ထန္နာမော၊ ဘန္တေ၊ ဘိက္ခု ကာလင်္ကတော၊ တဿ ကာ ဂတိ ကော အဘိသမ္ပရာယော’တိ? တံ ဘဂဝါ ဗျာကရိဿတိ သောတာပတ္တိဖလေ ဝါ သကဒါဂါမိဖလေ ဝါ အနာဂါမိဖလေ ဝါ အရဟတ္တေ ဝါ. တျာဟံ ဥပသင်္ကမိတွာ ပုစ္ဆိဿာမိ – ‘အာဂတပုဗ္ဗာ နု ခေါ၊ ဘန္တေ၊ တေန အယျေန သာဝတ္ထီ’တိ? သစေ မေ ဝက္ခန္တိ – ‘အာဂတပုဗ္ဗာ တေန ဘိက္ခုနာ သာဝတ္ထီ’တိ နိဋ္ဌမေတ္ထ ဂစ္ဆိဿာမိ – နိဿံသယံ မေ ပရိဘုတ္တံ တေန အယျေန ဝဿိကသာဋိကာ ဝါ အာဂန္တုကဘတ္တံ ဝါ ဂမိကဘတ္တံ ဝါ ဂိလာနဘတ္တံ ဝါ ဂိလာနုပဋ္ဌာကဘတ္တံ ဝါ ဂိလာနဘေသဇ္ဇံ ဝါ ဓုဝယာဂု ဝါတိ. တဿာ မေ တဒနုဿရန္တိယာ ပါမုဇ္ဇံ ဇာယိဿတိ၊ ပမုဒိတာယ ပီတိ ဇာယိဿတိ၊ ပီတိမနာယ ကာယော ပဿမ္ဘိဿတိ၊ ပဿဒ္ဓကာယာ သုခံ ဝေဒိယိဿာမိ၊ သုခိနိယာ စိတ္တံ သမာဓိယိဿတိ. သာ မေ ဘဝိဿတိ ဣန္ဒြိယဘာဝနာ ဗလဘာဝနာ ဗောဇ္ဈင်္ဂဘာဝနာ. ဣမာဟံ၊ ဘန္တေ၊ အာနိသံသံ သမ္ပဿမာနာ တထာဂတံ အဋ္ဌ ဝရာနိ ယာစာမီ’’တိ. ‘‘သာဓု သာဓု၊ ဝိသာခေ၊ သာဓု ခေါ တွံ၊ ဝိသာခေ၊ ဣမံ အာနိသံသံ သမ္ပဿမာနာ တထာဂတံ အဋ္ဌ ဝရာနိ ယာစသိ. အနုဇာနာမိ တေ၊ ဝိသာခေ၊ အဋ္ဌ ဝရာနီ’’တိ. အထ ခေါ ဘဂဝါ ဝိသာခံ မိဂါရမာတရံ ဣမာဟိ ဂါထာဟိ အနုမောဒိ –

‘‘ယာ အန္နပါနံ ဒဒတိပ္ပမောဒိတာ၊

သီလူပပန္နာ သုဂတဿ သာဝိကာ၊

ဒဒါတိ ဒါနံ အဘိဘုယျ မစ္ဆရံ၊

သောဝဂ္ဂိကံ သောကနုဒံ သုခါဝဟံ.

‘‘ဒိဗ္ဗံ သာ လဘတေ အာယုံ [ဒိဗ္ဗံ ဗလံ သာ လဘတေ စ အာယုံ (သီ. သျာ.)]၊

အာဂမ္မ မဂ္ဂံ ဝိရဇံ အနင်္ဂဏံ၊

သာ ပုညကာမာ သုခိနီ အနာမယာ၊

သဂ္ဂမှိ ကာယမှိ စိရံ ပမောဒတီ’’တိ.

၃၅၂. အထ ခေါ ဘဂဝါ ဝိသာခံ မိဂါရမာတရံ ဣမာဟိ ဂါထာဟိ အနုမောဒိတွာ ဥဋ္ဌာယာသနာ ပက္ကာမိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ ဝဿိကသာဋိကံ၊ အာဂန္တုကဘတ္တံ၊ ဂမိကဘတ္တံ၊ ဂိလာနဘတ္တံ၊ ဂိလာနုပဋ္ဌာကဘတ္တံ၊ ဂိလာနဘေသဇ္ဇံ၊ ဓုဝယာဂုံ၊ ဘိက္ခုနိသံဃဿ ဥဒကသာဋိက’’န္တိ.

ဝိသာခါဝတ္ထု နိဋ္ဌိတံ.

ဝိသာခါဘာဏဝါရော နိဋ္ဌိတော.