၂၀၈. သိဝေယျကဒုဿယုဂကထာ

၃၃၅. တေန ခေါ ပန သမယေန ရညော ပဇ္ဇောတဿ သိဝေယျကံ ဒုဿယုဂံ ဥပ္ပန္နံ ဟောတိ – ဗဟူနံ [ဗဟုန္နံ (သီ. သျာ.)] ဒုဿာနံ ဗဟူနံ ဒုဿယုဂါနံ ဗဟူနံ ဒုဿယုဂသတာနံ ဗဟူနံ ဒုဿယုဂသဟဿာနံ ဗဟူနံ ဒုဿယုဂသတသဟဿာနံ အဂ္ဂဉ္စ သေဋ္ဌဉ္စ မောက္ခဉ္စ ဥတ္တမဉ္စ ပဝရဉ္စ. အထ ခေါ ရာဇာ ပဇ္ဇောတော တံ သိဝေယျကံ ဒုဿယုဂံ ဇီဝကဿ ကောမာရဘစ္စဿ ပါဟေသိ. အထ ခေါ ဇီဝကဿ ကောမာရဘစ္စဿ ဧတဒဟောသိ – ‘‘ဣဒံ ခေါ မေ သိဝေယျကံ ဒုဿယုဂံ ရညာ ပဇ္ဇောတေန ပဟိတံ – ဗဟူနံ ဒုဿာနံ ဗဟူနံ ဒုဿယုဂါနံ ဗဟူနံ ဒုဿယုဂသတာနံ ဗဟူနံ ဒုဿယုဂသဟဿာနံ ဗဟူနံ ဒုဿယုဂသတသဟဿာနံ အဂ္ဂဉ္စ သေဋ္ဌဉ္စ မောက္ခဉ္စ ဥတ္တမဉ္စ ပဝရဉ္စ. နယိဒံ အညော ကောစိ ပစ္စာရဟတိ အညတြ တေန ဘဂဝတာ အရဟတာ သမ္မာသမ္ဗုဒ္ဓေန၊ ရညာ ဝါ မာဂဓေန သေနိယေန ဗိမ္ဗိသာရေနာ’’တိ.

သိဝေယျကဒုဿယုဂကထာ နိဋ္ဌိတာ.