၁၉၆. အာသာဒေါဠသကံ

၃၁၉. ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရာသံ ပယိရုပါသတိ. အာသာယ လဘတိ၊ အနာသာယ န လဘတိ. တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရာသံ ပယိရုပါသတိ. အာသာယ လဘတိ၊ အနာသာယ န လဘတိ. တဿ ဧဝံ ဟောတိ – ‘‘နေဝိမံ စီဝရံ ကာရေဿံ၊ န ပစ္စေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရာသံ ပယိရုပါသတိ. အာသာယ လဘတိ၊ အနာသာယ န လဘတိ. တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿံ၊ န ပစ္စေဿ’’န္တိ. သော တံ စီဝရာသံ ပယိရုပါသတိ. တဿ သာ စီဝရာသာ ဥပစ္ဆိဇ္ဇတိ. တဿ ဘိက္ခုနော အာသာဝစ္ဆေဒိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ. တဿ ဧဝံ ဟောတိ – ‘‘ယတော တသ္မိံ အာဝါသေ ဥဗ္ဘတံ ကထိနံ၊ ဣဓေဝိမံ စီဝရာသံ ပယိရုပါသိဿ’’န္တိ. သော တံ စီဝရာသံ ပယိရုပါသတိ. အာသာယ လဘတိ၊ အနာသာယ န လဘတိ. တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ. တဿ ဧဝံ ဟောတိ – ‘‘ယတော တသ္မိံ အာဝါသေ ဥဗ္ဘတံ ကထိနံ၊ ဣဓေဝိမံ စီဝရာသံ ပယိရုပါသိဿ’’န္တိ. သော တံ စီဝရာသံ ပယိရုပါသတိ. အာသာယ လဘတိ၊ အနာသာယ န လဘတိ. တဿ ဧဝံ ဟောတိ – ‘‘နေဝိမံ စီဝရံ ကာရေဿံ၊ န ပစ္စေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ. တဿ ဧဝံ ဟောတိ – ‘‘ယတော တသ္မိံ အာဝါသေ ဥဗ္ဘတံ ကထိနံ၊ ဣဓေဝိမံ စီဝရာသံ ပယိရုပါသိဿ’’န္တိ. သော တံ စီဝရာသံ ပယိရုပါသတိ. အာသာယ လဘတိ၊ အနာသာယ န လဘတိ. တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ. တဿ ဧဝံ ဟောတိ – ‘‘ယတော တသ္မိံ အာဝါသေ ဥဗ္ဘတံ ကထိနံ၊ ဣဓေဝိမံ စီဝရာသံ ပယိရုပါသိဿံ၊ န ပစ္စေဿ’’န္တိ. သော တံ စီဝရာသံ ပယိရုပါသတိ. တဿ သာ စီဝရာသာ ဥပစ္ဆိဇ္ဇတိ. တဿ ဘိက္ခုနော အာသာဝစ္ဆေဒိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရာသံ ပယိရုပါသတိ. အာသာယ လဘတိ၊ အနာသာယ န လဘတိ. သော တံ စီဝရံ ကာရေတိ. သော ကတစီဝရော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ. တဿ ဘိက္ခုနော သဝနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿံ၊ န ပစ္စေဿ’’န္တိ. သော တံ စီဝရာသံ ပယိရုပါသတိ. တဿ သာ စီဝရာသာ ဥပစ္ဆိဇ္ဇတိ. တဿ ဘိက္ခုနော အာသာဝစ္ဆေဒိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရာသံ ပယိရုပါသတိ. အာသာယ လဘတိ၊ အနာသာယ န လဘတိ. သော တံ စီဝရံ ကာရေတိ. သော ကတစီဝရော ‘‘ပစ္စေဿံ ပစ္စေဿ’’န္တိ – ဗဟိဒ္ဓါ ကထိနုဒ္ဓါရံ ဝီတိနာမေတိ. တဿ ဘိက္ခုနော သီမာတိက္ကန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရာသံ ပယိရုပါသတိ. အာသာယ လဘတိ၊ အနာသာယ န လဘတိ. သော တံ စီဝရံ ကာရေတိ. သော ကတစီဝရော ‘‘ပစ္စေဿံ ပစ္စေဿ’’န္တိ – သမ္ဘုဏာတိ ကထိနုဒ္ဓါရံ. တဿ ဘိက္ခုနော သဟ ဘိက္ခူဟိ ကထိနုဒ္ဓါရော.

အာသာဒေါဠသကံ နိဋ္ဌိတံ.