၁၉၂. အာဒါယပန္နရသကံ

၃၁၅. ဘိက္ခု အတ္ထတကထိနော စီဝရံ အာဒါယ ပက္ကမတိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ. တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ၊ န ပစ္စေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ. တဿ ဗဟိသီမဂတဿ ဧဝံ ဟောတိ –

‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော.

တိကံ.

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘န ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘န ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘န ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော.

တိကံ.

ဘိက္ခု အတ္ထတကထိနော စီဝရံ အာဒါယ ပက္ကမတိ အနဓိဋ္ဌိတေန၊ နေဝဿ ဟောတိ ‘‘ပစ္စေဿ’’န္တိ၊ န ပနဿ ဟောတိ ‘‘န ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ အနဓိဋ္ဌိတေန၊ နေဝဿ ဟောတိ ‘‘ပစ္စေဿ’’န္တိ၊ န ပနဿ ဟောတိ ‘‘န ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ၊ န ပစ္စေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ အနဓိဋ္ဌိတေန၊ နေဝဿ ဟောတိ ‘‘ပစ္စေဿ’’န္တိ၊ န ပနဿ ဟောတိ ‘‘န ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော.

တိကံ.

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ၊ န ပစ္စေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရံ ကာရေတိ. သော ကတစီဝရော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ. တဿ ဘိက္ခုနော သဝနန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရံ ကာရေတိ. သော ကတစီဝရော ‘‘ပစ္စေဿံ ပစ္စေဿ’’န္တိ – ဗဟိဒ္ဓါ ကထိနုဒ္ဓါရံ ဝီတိနာမေတိ. တဿ ဘိက္ခုနော သီမာတိက္ကန္တိကော ကထိနုဒ္ဓါရော.

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရံ ကာရေတိ. သော ကတစီဝရော – ‘‘ပစ္စေဿံ ပစ္စေဿ’’န္တိ သမ္ဘုဏာတိ ကထိနုဒ္ဓါရံ. တဿ ဘိက္ခုနော သဟ ဘိက္ခူဟိ ကထိနုဒ္ဓါရော.

ဆက္ကံ.

အာဒါယပန္နရသကံ နိဋ္ဌိတံ.