၁၉၀. အာဒါယဆက္ကံ

၃၁၃. ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ. တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ၊ န ပစ္စေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ န ပစ္စေဿ’’န္တိ. သော တံ စီဝရံ ကာရေတိ. တဿံ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော.

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရံ ကာရေတိ. သော ကတစီဝရော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ. တဿ ဘိက္ခုနော သဝနန္တိကော ကထိနုဒ္ဓါရော.

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရံ ကာရေတိ. သော ကတစီဝရော ‘‘ပစ္စေဿံ ပစ္စေဿ’’န္တိ ဗဟိဒ္ဓါ ကထိနုဒ္ဓါရံ ဝီတိနာမေတိ. တဿ ဘိက္ခုနော သီမာတိက္ကန္တိကော ကထိနုဒ္ဓါရော.

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ ‘‘ပစ္စေဿ’’န္တိ. သော ဗဟိသီမဂတော တံ စီဝရံ ကာရေတိ. သော ကတစီဝရော ‘‘ပစ္စေဿံ ပစ္စေဿ’’န္တိ သမ္ဘုဏာတိ ကထိနုဒ္ဓါရံ. တဿ ဘိက္ခုနော သဟ ဘိက္ခူဟိ ကထိနုဒ္ဓါရော.

အာဒါယဆက္ကံ နိဋ္ဌိတံ.