၁၈၅. စတုမဟာပဒေသကထာ

၃၀၅. တေန ခေါ ပန သမယေန ဘိက္ခူနံ ကိသ္မိဉ္စိ ကိသ္မိဉ္စိ ဌာနေ ကုက္ကုစ္စံ ဥပ္ပဇ္ဇတိ – ‘‘ကိံ နု ခေါ ဘဂဝတာ အနုညာတံ၊ ကိံ အနနုညာတ’’န္တိ? ဘဂဝတော ဧတမတ္ထံ အာရောစေသုံ. ‘‘ယံ၊ ဘိက္ခဝေ၊ မယာ ‘ဣဒံ န ကပ္ပတီ’တိ အပ္ပဋိက္ခိတ္တံ တဉ္စေ အကပ္ပိယံ အနုလောမေတိ၊ ကပ္ပိယံ ပဋိဗာဟတိ၊ တံ ဝေါ န ကပ္ပတိ. ယံ၊ ဘိက္ခဝေ၊ မယာ ‘ဣဒံ န ကပ္ပတီ’တိ အပ္ပဋိက္ခိတ္တံ တဉ္စေ ကပ္ပိယံ အနုလောမေတိ၊ အကပ္ပိယံ ပဋိဗာဟတိ၊ တံ ဝေါ ကပ္ပတိ. ယံ၊ ဘိက္ခဝေ၊ မယာ ‘ဣဒံ ကပ္ပတီ’တိ အနနုညာတံ တဉ္စေ အကပ္ပိယံ အနုလောမေတိ၊ ကပ္ပိယံ ပဋိဗာဟတိ၊ တံ ဝေါ န ကပ္ပတိ. ယံ၊ ဘိက္ခဝေ၊ မယာ ‘ဣဒံ ကပ္ပတီ’တိ အနနုညာတံ၊ တဉ္စေ ကပ္ပိယံ အနုလောမေတိ၊ အကပ္ပိယံ ပဋိဗာဟတိ၊ တံ ဝေါ ကပ္ပတီ’’တိ.

အထ ခေါ ဘိက္ခူနံ ဧတဒဟောသိ – ‘‘ကပ္ပတိ နု ခေါ ယာဝကာလိကေန ယာမကာလိကံ၊ န နု ခေါ ကပ္ပတိ? ကပ္ပတိ နု ခေါ ယာဝကာလိကေန သတ္တာဟကာလိကံ၊ န နု ခေါ ကပ္ပတိ? ကပ္ပတိ နု ခေါ ယာဝကာလိကေန ယာဝဇီဝိကံ၊ န နု ခေါ ကပ္ပတိ? ကပ္ပတိ နု ခေါ ယာမကာလိကေန သတ္တာဟကာလိကံ၊ န နု ခေါ ကပ္ပတိ? ကပ္ပတိ နု ခေါ ယာမကာလိကေန ယာဝဇီဝိကံ၊ န နု ခေါ ကပ္ပတိ? ကပ္ပတိ နု ခေါ သတ္တာဟကာလိကေန ယာဝဇီဝိကံ၊ န နု ခေါ ကပ္ပတီ’’တိ? ဘဂဝတော ဧတမတ္ထံ အာရောစေသုံ. ‘‘ယာဝကာလိကေန၊ ဘိက္ခဝေ၊ ယာမကာလိကံ၊ တဒဟု ပဋိဂ္ဂဟိတံ ကာလေ ကပ္ပတိ၊ ဝိကာလေ န ကပ္ပတိ. ယာဝကာလိကေန၊ ဘိက္ခဝေ၊ သတ္တာဟကာလိကံ၊ တဒဟု ပဋိဂ္ဂဟိတံ ကာလေ ကပ္ပတိ၊ ဝိကာလေ န ကပ္ပတိ. ယာဝကာလိကေန၊ ဘိက္ခဝေ၊ ယာဝဇီဝိကံ၊ တဒဟု ပဋိဂ္ဂဟိတံ ကာလေ ကပ္ပတိ၊ ဝိကာလေ န ကပ္ပတိ. ယာမကာလိကေန၊ ဘိက္ခဝေ၊ သတ္တာဟကာလိကံ၊ တဒဟု ပဋိဂ္ဂဟိတံ ယာမေ ကပ္ပတိ၊ ယာမာတိက္ကန္တေ န ကပ္ပတိ. ယာမကာလိကေန၊ ဘိက္ခဝေ၊ ယာဝဇီဝိကံ၊ တဒဟု ပဋိဂ္ဂဟိတံ ယာမေ ကပ္ပတိ၊ ယာမာတိက္ကန္တေ န ကပ္ပတိ. သတ္တာဟကာလိကေန၊ ဘိက္ခဝေ၊ ယာဝဇီဝိကံ ပဋိဂ္ဂဟိတံ၊ သတ္တာဟံ ကပ္ပတိ၊ သတ္တာဟာတိက္ကန္တေ န ကပ္ပတီ’’တိ.

စတုမဟာပဒေသကထာ နိဋ္ဌိတာ.

ဘေသဇ္ဇက္ခန္ဓကော ဆဋ္ဌော.