၁၇၉. ကပ္ပိယဘူမိအနုဇာနနာ

၂၉၅. တေန ခေါ ပန သမယေန ဝေသာလီ သုဘိက္ခာ ဟောတိ သုသဿာ သုလဘပိဏ္ဍာ၊ သုကရာ ဥဉ္ဆေန ပဂ္ဂဟေန ယာပေတုံ. အထ ခေါ ဘဂဝတော ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ – ‘‘ယာနိ တာနိ မယာ ဘိက္ခူနံ အနုညာတာနိ ဒုဗ္ဘိက္ခေ ဒုဿဿေ ဒုလ္လဘပိဏ္ဍေ အန္တော ဝုဋ္ဌံ အန္တော ပက္ကံ သာမံ ပက္ကံ ဥဂ္ဂဟိတပဋိဂ္ဂဟိတကံ တတော နီဟဋံ ပုရေဘတ္တံ ပဋိဂ္ဂဟိတံ ဝနဋ္ဌံ ပေါက္ခရဋ္ဌံ၊ အဇ္ဇာပိ နု ခေါ တာနိ ဘိက္ခူ ပရိဘုဉ္ဇန္တီ’’တိ. အထ ခေါ ဘဂဝါ သာယနှသမယံ ပဋိသလ္လာနာ ဝုဋ္ဌိတော အာယသ္မန္တံ အာနန္ဒံ အာမန္တေသိ – ‘‘ယာနိ တာနိ၊ အာနန္ဒ၊ မယာ ဘိက္ခူနံ အနုညာတာနိ ဒုဗ္ဘိက္ခေ ဒုဿဿေ ဒုလ္လဘပိဏ္ဍေ အန္တော ဝုဋ္ဌံ အန္တော ပက္ကံ သာမံ ပက္ကံ ဥဂ္ဂဟိတပဋိဂ္ဂဟိတကံ တတော နီဟဋံ ပုရေဘတ္တံ ပဋိဂ္ဂဟိတံ ဝနဋ္ဌံ ပေါက္ခရဋ္ဌံ၊ အဇ္ဇာပိ နု ခေါ တာနိ ဘိက္ခူ ပရိဘုဉ္ဇန္တီ’’တိ? ‘‘ပရိဘုဉ္ဇန္တိ ဘဂဝါ’’တိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘ယာနိ တာနိ၊ ဘိက္ခဝေ၊ မယာ ဘိက္ခူနံ အနုညာတာနိ ဒုဗ္ဘိက္ခေ ဒုဿဿေ ဒုလ္လဘပိဏ္ဍေ အန္တော ဝုဋ္ဌံ အန္တော ပက္ကံ သာမံ ပက္ကံ ဥဂ္ဂဟိတပဋိဂ္ဂဟိတကံ တတော နီဟဋံ ပုရေဘတ္တံ ပဋိဂ္ဂဟိတံ ဝနဋ္ဌံ ပေါက္ခရဋ္ဌံ၊ တာနာဟံ အဇ္ဇတဂ္ဂေ ပဋိက္ခိပါမိ. န၊ ဘိက္ခဝေ၊ အန္တော ဝုဋ္ဌံ အန္တော ပက္ကံ သာမံ ပက္ကံ ဥဂ္ဂဟိတပဋိဂ္ဂဟိတကံ ပရိဘုဉ္ဇိတဗ္ဗံ. ယော ပရိဘုဉ္ဇေယျ၊ အာပတ္တိ ဒုက္ကဋဿ. န စ၊ ဘိက္ခဝေ၊ တတော နီဟဋံ ပုရေဘတ္တံ ပဋိဂ္ဂဟိတံ ဝနဋ္ဌံ ပေါက္ခရဋ္ဌံ ဘုတ္တာဝိနာ ပဝါရိတေန အနတိရိတ္တံ ပရိဘုဉ္ဇိတဗ္ဗံ. ယော ပရိဘုဉ္ဇေယျ၊ ယထာဓမ္မော ကာရေတဗ္ဗော’’တိ.

တေန ခေါ ပန သမယေန ဇာနပဒါ မနုဿာ ဗဟုံ လောဏမ္ပိ၊ တေလမ္ပိ၊ တဏ္ဍုလမ္ပိ၊ ခါဒနီယမ္ပိ သကဋေသု အာရောပေတွာ ဗဟာရာမကောဋ္ဌကေ သကဋပရိဝဋ္ဋံ ကရိတွာ အစ္ဆန္တိ – ယဒါ ပဋိပါဋိံ လဘိဿာမ၊ တဒါ ဘတ္တံ ကရိဿာမာတိ. မဟာ စ မေဃော ဥဂ္ဂတော ဟောတိ. အထ ခေါ တေ မနုဿာ ယေနာယသ္မာ အာနန္ဒော တေနုပသင်္ကမိံသု၊ ဥပသင်္ကမိတွာ အာယသ္မန္တံ အာနန္ဒံ ဧတဒဝေါစုံ – ‘‘ဣဓ၊ ဘန္တေ အာနန္ဒ၊ ဗဟုံ လောဏမ္ပိ၊ တေလမ္ပိ၊ တဏ္ဍုလမ္ပိ၊ ခါဒနီယမ္ပိ သကဋေသု အာရောပိတာ တိဋ္ဌန္တိ၊ မဟာ စ မေဃော ဥဂ္ဂတော၊ ကထံ နု ခေါ၊ ဘန္တေ အာနန္ဒ၊ ပဋိပဇ္ဇိတဗ္ဗ’’န္တိ? အထ ခေါ အာယသ္မာ အာနန္ဒော ဘဂဝတော ဧတမတ္ထံ အာရောစေသိ. ‘‘တေန ဟာနန္ဒ၊ သံဃော ပစ္စန္တိမံ ဝိဟာရံ ကပ္ပိယဘူမိံ သမ္မန္နိတွာ တတ္ထ ဝါသေတု၊ ယံ သံဃော အာကင်္ခတိ ဝိဟာရံ ဝါ အဍ္ဎယောဂံ ဝါ ပါသာဒံ ဝါ ဟမ္မိယံ ဝါ ဂုဟံ ဝါ. ဧဝဉ္စ ပန၊ ဘိက္ခဝေ၊ သမ္မန္နိတဗ္ဗာ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. ယဒိ သံဃဿ ပတ္တကလ္လံ၊ သံဃော ဣတ္ထန္နာမံ ဝိဟာရံ ကပ္ပိယဘူမိံ သမ္မန္နေယျ၊ ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. သံဃော ဣတ္ထန္နာမံ ဝိဟာရံ ကပ္ပိယဘူမိံ သမ္မန္နတိ. ယဿာယသ္မတော ခမတိ ဣတ္ထန္နာမဿ ဝိဟာရဿ ကပ္ပိယဘူမိယာ သမ္မုတိ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘သမ္မတော သံဃေန ဣတ္ထန္နာမော ဝိဟာရော ကပ္ပိယဘူမိ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

တေန ခေါ ပန သမယေန မနုဿာ တတ္ထေဝ သမ္မုတိယာ [သမ္မတိကာယ (သျာ.)] ကပ္ပိယဘူမိယာ ယာဂုယော ပစန္တိ၊ ဘတ္တာနိ ပစန္တိ၊ သူပါနိ သမ္ပာဒေန္တိ၊ မံသာနိ ကောဋ္ဋေန္တိ၊ ကဋ္ဌာနိ ဖာလေန္တိ. အဿောသိ ခေါ ဘဂဝါ ရတ္တိယာ ပစ္စူသသမယံ ပစ္စုဋ္ဌာယ ဥစ္စာသဒ္ဒံ မဟာသဒ္ဒံ ကာကောရဝသဒ္ဒံ၊ သုတွာန အာယသ္မန္တံ အာနန္ဒံ အာမန္တေသိ – ‘‘ကိံ နု ခေါ သော၊ အာနန္ဒ၊ ဥစ္စာသဒ္ဒေါ မဟာသဒ္ဒေါ ကာကောရဝသဒ္ဒေါ’’တိ? ‘‘ဧတရဟိ၊ ဘန္တေ၊ မနုဿာ တတ္ထေဝ သမ္မုတိယာ ကပ္ပိယဘူမိယာ ယာဂုယော ပစန္တိ၊ ဘတ္တာနိ ပစန္တိ၊ သူပါနိ သမ္ပာဒေန္တိ၊ မံသာနိ ကောဋ္ဋေန္တိ၊ ကဋ္ဌာနိ ဖာလေန္တိ. သော ဧသော၊ ဘဂဝါ၊ ဥစ္စာသဒ္ဒေါ မဟာသဒ္ဒေါ ကာကောရဝသဒ္ဒေါ’’တိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ သမ္မုတိ [သမ္မတိကာ (သျာ.)] ကပ္ပိယဘူမိ ပရိဘုဉ္ဇိတဗ္ဗာ. ယော ပရိဘုဉ္ဇေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ တိဿော ကပ္ပိယဘူမိယော – ဥဿာဝနန္တိကံ ဂေါနိသာဒိကံ ဂဟပတိ’’န္တိ.

တေန ခေါ ပန သမယေန အာယသ္မာ ယသောဇော ဂိလာနော ဟောတိ. တဿတ္ထာယ ဘေသဇ္ဇာနိ အာဟရိယန္တိ. တာနိ ဘိက္ခူ ဗဟိ ဝါသေန္တိ. ဥက္ကပိဏ္ဍိကာပိ ခါဒန္တိ၊ စောရာပိ ဟရန္တိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ သမ္မုတိံ ကပ္ပိယဘူမိံ ပရိဘုဉ္ဇိတုံ. အနုဇာနာမိ၊ ဘိက္ခဝေ၊ စတဿော ကပ္ပိယဘူမိယော – ဥဿာဝနန္တိကံ ဂေါနိသာဒိကံ ဂဟပတိံ သမ္မုတိန္တိ.

ကပ္ပိယဘူမိအနုဇာနနာ နိဋ္ဌိတာ.

သီဟဘာဏဝါရော နိဋ္ဌိတော စတုတ္ထော.