၁၆၆. ပဋိဂ္ဂဟိတာဒိအနုဇာနနာ

၂၇၇. [ပါစိ. ၂၉၅] တေန ခေါ ပန သမယေန အာယသ္မတော ဥပနန္ဒဿ သကျပုတ္တဿ ဥပဋ္ဌာကကုလံ သံဃဿတ္ထာယ ခါဒနီယံ ပါဟေသိ – အယျဿ ဥပနန္ဒဿ ဒဿေတွာ သံဃဿ ဒါတဗ္ဗန္တိ. တေန ခေါ ပန သမယေန အာယသ္မာ ဥပနန္ဒော သကျပုတ္တော ဂါမံ ပိဏ္ဍာယ ပဝိဋ္ဌော ဟောတိ. အထ ခေါ တေ မနုဿာ အာရာမံ ဂန္တွာ ဘိက္ခူ ပုစ္ဆိံသု – ‘‘ကဟံ၊ ဘန္တေ၊ အယျော ဥပနန္ဒော’’တိ? ‘‘ဧသာဝုသော၊ အာယသ္မာ ဥပနန္ဒော သကျပုတ္တော ဂါမံ ပိဏ္ဍာယ ပဝိဋ္ဌော’’တိ. ‘‘ဣဒံ၊ ဘန္တေ၊ ခါဒနီယံ အယျဿ ဥပနန္ဒဿ ဒဿေတွာ သံဃဿ ဒါတဗ္ဗ’’န္တိ. ဘဂဝတော ဧတမတ္ထံ အာရောစေသုံ. တေန ဟိ၊ ဘိက္ခဝေ၊ ပဋိဂ္ဂဟေတွာ နိက္ခိပထ ယာဝ ဥပနန္ဒော အာဂစ္ဆတီတိ. အထ ခေါ အာယသ္မာ ဥပနန္ဒော သကျပုတ္တော ပုရေဘတ္တံ ကုလာနိ ပယိရုပါသိတွာ ဒိဝါ အာဂစ္ဆတိ. တေန ခေါ ပန သမယေန ဘိက္ခူ ဒုဗ္ဘိက္ခေ အပ္ပမတ္တကေပိ ပဝါရေန္တိ၊ ပဋိသင်္ခါပိ ပဋိက္ခိပန္တိ၊ သဗ္ဗော စ သံဃော ပဝါရိတော ဟောတိ၊ ဘိက္ခူ ကုက္ကုစ္စာယန္တာ န ပဋိဂ္ဂဏှန္တိ. ပဋိဂ္ဂဏှထ၊ ဘိက္ခဝေ၊ ပရိဘုဉ္ဇထ. အနုဇာနာမိ၊ ဘိက္ခဝေ၊ ပုရေဘတ္တံ ပဋိဂ္ဂဟိတံ ဘုတ္တာဝိနာ ပဝါရိတေန အနတိရိတ္တံ ပရိဘုဉ္ဇိတုန္တိ.

၂၇၈. အထ ခေါ ဘဂဝါ ရာဇဂဟေ ယထာဘိရန္တံ ဝိဟရိတွာ ယေန သာဝတ္ထိ တေန စာရိကံ ပက္ကာမိ. အနုပုဗ္ဗေန စာရိကံ စရမာနော ယေန သာဝတ္ထိ တဒဝသရိ. တတြ သုဒံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အာယသ္မတော သာရိပုတ္တဿ ကာယဍာဟာဗာဓော ဟောတိ. အထ ခေါ အာယသ္မာ မဟာမောဂ္ဂလ္လာနော ယေနာယသ္မာ သာရိပုတ္တော တေနုပသင်္ကမိ၊ ဥပသင်္ကမိတွာ အာယသ္မန္တံ သာရိပုတ္တံ ဧတဒဝေါစ – ‘‘ပုဗ္ဗေ တေ၊ အာဝုသော သာရိပုတ္တ၊ ကာယဍာဟာဗာဓော ကေန ဖာသု ဟောတီ’’တိ? ‘‘ဘိသေဟိ စ မေ၊ အာဝုသော၊ မုဠာလိကာဟိ စာ’’တိ. အထ ခေါ အာယသ္မာ မဟာမောဂ္ဂလ္လာနော သေယျထာပိ နာမ ဗလဝါ ပုရိသော သမ္မိဉ္ဇိတံ ဝါ ဗာဟံ ပသာရေယျ၊ ပသာရိတံ ဝါ ဗာဟံ သမိဉ္ဇေယျ၊ ဧဝမေဝ ဇေတဝနေ အန္တရဟိတော မန္ဒာကိနိယာ ပေါက္ခရဏိယာ တီရေ ပါတုရဟောသိ. အဒ္ဒသာ ခေါ အညတရော နာဂေါ အာယသ္မန္တံ မဟာမောဂ္ဂလ္လာနံ ဒူရတောဝ အာဂစ္ဆန္တံ၊ ဒိသွာန အာယသ္မန္တံ မဟာမောဂ္ဂလ္လာနံ ဧတဒဝေါစ – ‘‘ဧတု ခေါ၊ ဘန္တေ၊ အယျော မဟာမောဂ္ဂလ္လာနော. သွာဂတံ၊ ဘန္တေ၊ အယျဿ မဟာမောဂ္ဂလ္လာနဿ. ကေန၊ ဘန္တေ၊ အယျဿ အတ္ထော၊ ကိံ ဒမ္မီ’’တိ? ‘‘ဘိသေဟိ စ မေ၊ အာဝုသော၊ အတ္ထော၊ မုဠာလိကာဟိ စာ’’တိ. အထ ခေါ သော နာဂေါ အညတရံ နာဂံ အာဏာပေသိ – ‘‘တေန ဟိ၊ ဘဏေ၊ အယျဿ ဘိသေ စ မုဠာလိကာယော စ ယာဝဒတ္ထံ ဒေဟီ’’တိ. အထ ခေါ သော နာဂေါ မန္ဒာကိနိံ ပေါက္ခရဏိံ ဩဂါဟေတွာ၊ သောဏ္ဍာယ ဘိသဉ္စ မုဠာလိကဉ္စ အဗ္ဗာဟိတွာ၊ သုဝိက္ခာလိတံ ဝိက္ခာလေတွာ၊ ဘဏ္ဍိကံ ဗန္ဓိတွာ ယေနာယသ္မာ မဟာမောဂ္ဂလ္လာနော တေနုပသင်္ကမိ. အထ ခေါ အာယသ္မာ မဟာမောဂ္ဂလ္လာနော – သေယျထာပိ နာမ ဗလဝါ ပုရိသော သမိဉ္ဇိတံ ဝါ ဗာဟံ ပသာရေယျ၊ ပသာရိတံ ဝါ ဗာဟံ သမိဉ္ဇေယျ၊ ဧဝမေဝ – မန္ဒာကိနိယာ ပေါက္ခရဏိယာ တီရေ အန္တရဟိတော ဇေတဝနေ ပါတုရဟောသိ. သောပိ ခေါ နာဂေါ မန္ဒာကိနိယာ ပေါက္ခရဏိယာ တီရေ အန္တရဟိတော ဇေတဝနေ ပါတုရဟောသိ. အထ ခေါ သော နာဂေါ အာယသ္မတော မဟာမောဂ္ဂလ္လာနဿ ဘိသေ စ မုဠာလိကာယော စ ပဋိဂ္ဂဟာပေတွာ ဇေတဝနေ အန္တရဟိတော မန္ဒာကိနိယာ ပေါက္ခရဏိယာ တီရေ ပါတုရဟောသိ. အထ ခေါ အာယသ္မာ မဟာမောဂ္ဂလ္လာနော အာယသ္မတော သာရိပုတ္တဿ ဘိသေ စ မုဠာလိကာယော စ ဥပနာမေသိ. အထ ခေါ အာယသ္မတော သာရိပုတ္တဿ ဘိသေ စ မုဠာလိကာယော စ ဘုတ္တဿ ကာယဍာဟာဗာဓော ပဋိပ္ပဿမ္ဘိ. ဗဟူ ဘိသာ စ မုဠာလိကာယော စ အဝသိဋ္ဌာ ဟောန္တိ. တေန ခေါ ပန သမယေန ဘိက္ခူ ဒုဗ္ဘိက္ခေ အပ္ပမတ္တကေပိ ပဝါရေန္တိ၊ ပဋိသင်္ခါပိ ပဋိက္ခိပန္တိ၊ သဗ္ဗော စ သံဃော ပဝါရိတော ဟောတိ. ဘိက္ခူ ကုက္ကုစ္စာယန္တာ န ပဋိဂ္ဂဏှန္တိ. ပဋိဂ္ဂဏှထ၊ ဘိက္ခဝေ၊ ပရိဘုဉ္ဇထ. အနုဇာနာမိ၊ ဘိက္ခဝေ၊ ဝနဋ္ဌံ ပေါက္ခရဋ္ဌံ ဘုတ္တာဝိနာ ပဝါရိတေန အနတိရိတ္တံ ပရိဘုဉ္ဇိတုန္တိ.

တေန ခေါ ပန သမယေန သာဝတ္ထိယံ ဗဟုံ ဖလခါဒနီယံ ဥပ္ပန္နံ ဟောတိ၊ ကပ္ပိယကာရကော စ န ဟောတိ. ဘိက္ခူ ကုက္ကုစ္စာယန္တာ ဖလံ န ပရိဘုဉ္ဇန္တိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ အဗီဇံ နိဗ္ဗတ္တဗီဇံ [နိဗ္ဗဋ္ဋဗီဇံ (သီ.)၊ နိဗ္ဗဋဗီဇံ (သျာ.)၊ နိပ္ပဋ္ဋဗီဇံ (က.)] အကတကပ္ပံ ဖလံ ပရိဘုဉ္ဇိတုန္တိ.

ပဋိဂ္ဂဟိတာဒိ အနုဇာနနာ နိဋ္ဌိတာ.