၁၅၄. ဥစ္စာသယနမဟာသယနပဋိက္ခေပေါ

၂၅၄. တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥစ္စာသယနမဟာသယနာနိ ဓာရေန္တိ၊ သေယျထိဒံ – အာသန္ဒိံ၊ ပလ္လင်္ကံ၊ ဂေါနကံ၊ စိတ္တကံ၊ ပဋိကံ၊ ပဋလိကံ၊ တူလိကံ၊ ဝိကတိကံ၊ ဥဒ္ဓလောမိံ [ဥန္ဒလောမိံ (က.)၊ ဥဒ္ဒလောမိံ (က.)]၊ ဧကန္တလောမိံ၊ ကဋ္ဋိဿံ၊ ကောသေယျံ၊ ကုတ္တကံ၊ ဟတ္ထတ္ထရံ၊ အဿတ္ထရံ၊ ရထတ္ထရံ၊ အဇိနပဝေဏိံ၊ ကဒလိမိဂပဝရပစ္စတ္ထရဏံ၊ သဥတ္တရစ္ဆဒံ၊ ဥဘတောလောဟိတကူပဓာနန္တိ. မနုဿာ ဝိဟာရစာရိကံ အာဟိဏ္ဍန္တာ ပဿိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘သေယျထာပိ ဂိဟီ ကာမဘောဂိနော’’တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ ဥစ္စာသယနမဟာသယနာနိ ဓာရေတဗ္ဗာနိ၊ သေယျထိဒံ – အာသန္ဒိ၊ ပလ္လင်္ကော၊ ဂေါနကော၊ စိတ္တကော၊ ပဋိကာ၊ ပဋလိကာ၊ တူလိကာ၊ ဝိကတိကာ၊ ဥဒ္ဓလောမိ၊ ဧကန္တလောမိ၊ ကဋ္ဋိဿံ၊ ကောသေယျံ၊ ကုတ္တကံ၊ ဟတ္ထတ္ထရံ၊ အဿတ္ထရံ၊ ရထတ္ထရံ၊ အဇိနပဝေဏိ၊ ကဒလိမိဂပဝရပစ္စတ္ထရဏံ၊ သဥတ္တရစ္ဆဒံ၊ ဥဘတောလောဟိတကူပဓာနံ. ယော ဓာရေယျ၊ အာပတ္တိ ဒုက္ကဋဿာတိ.

ဥစ္စာသယနမဟာသယနပဋိက္ခေပေါ နိဋ္ဌိတော.