၁၁၄. သံဃဘေဒေ အနာပတ္တိဝဿစ္ဆေဒဝါရော

၂၀၂. ဣဓ ပန၊ ဘိက္ခဝေ၊ ဝဿူပဂတော ဘိက္ခု ပဿတိ သမ္ဗဟုလေ ဘိက္ခူ သံဃဘေဒါယ ပရက္ကမန္တေ. တတြ စေ ဘိက္ခုနော ဧဝံ ဟောတိ၊ ‘ဂရုကော ခေါ သံဃဘေဒေါ ဝုတ္တော ဘဂဝတာ၊ မာ မယိ သမ္မုခီဘူတေ သံဃော ဘိဇ္ဇီ’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿ.

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလာ ဘိက္ခူ သံဃဘေဒါယ ပရက္ကမန္တီ’’တိ. တတြ စေ ဘိက္ခုနော ဧဝံ ဟောတိ၊ ‘ဂရုကော ခေါ သံဃဘေဒေါ ဝုတ္တော ဘဂဝတာ၊ မာ မယိ သမ္မုခီဘူတေ သံဃော ဘိဇ္ဇီ’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿ.

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလာ ဘိက္ခူ သံဃဘေဒါယ ပရက္ကမန္တီ’’တိ. တတြ စေ ဘိက္ခုနော ဧဝံ ဟောတိ – ‘‘တေ ခေါ မေ ဘိက္ခူ မိတ္တာ. တျာဟံ ဝက္ခာမိ ‘ဂရုကော ခေါ၊ အာဝုသော၊ သံဃဘေဒေါ ဝုတ္တော ဘဂဝတာ၊ မာယသ္မန္တာနံ သံဃဘေဒေါ ရုစ္စိတ္ထာ’တိ. ကရိဿန္တိ မေ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿ.

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလာ ဘိက္ခူ သံဃဘေဒါယ ပရက္ကမန္တီ’’တိ. တတြ စေ ဘိက္ခုနော ဧဝံ ဟောတိ – ‘‘တေ ခေါ မေ ဘိက္ခူ န မိတ္တာ၊ အပိ စ ယေ တေသံ မိတ္တာ၊ တေ မေ မိတ္တာ. တျာဟံ ဝက္ခာမိ. တေ ဝုတ္တာ တေ ဝက္ခန္တိ ‘ဂရုကော ခေါ၊ အာဝုသော၊ သံဃဘေဒေါ ဝုတ္တော ဘဂဝတာ၊ မာယသ္မန္တာနံ သံဃဘေဒေါ ရုစ္စိတ္ထာ’တိ. ကရိဿန္တိ တေသံ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿ.

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလေဟိ ဘိက္ခူဟိ သံဃော ဘိန္နော’’တိ. တတြ စေ ဘိက္ခုနော ဧဝံ ဟောတိ – ‘‘တေ ခေါ မေ ဘိက္ခူ မိတ္တာ. တျာဟံ ဝက္ခာမိ ‘ဂရုကော ခေါ၊ အာဝုသော၊ သံဃဘေဒေါ ဝုတ္တော ဘဂဝတာ၊ မာယသ္မန္တာနံ သံဃဘေဒေါ ရုစ္စိတ္ထာ’တိ. ကရိဿန္တိ မေ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿ.

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အသုကသ္မိံ ကိရ အာဝါသေ သမ္ဗဟုလေဟိ ဘိက္ခူဟိ သံဃော ဘိန္နော’’တိ. တတြ စေ ဘိက္ခုနော ဧဝံ ဟောတိ – ‘‘တေ ခေါ မေ ဘိက္ခူ န မိတ္တာ၊ အပိ စ၊ ယေ တေသံ မိတ္တာ တေ မေ မိတ္တာ. တျာဟံ ဝက္ခာမိ. တေ ဝုတ္တာ တေ ဝက္ခန္တိ ‘ဂရုကော ခေါ၊ အာဝုသော၊ သံဃဘေဒေါ ဝုတ္တော ဘဂဝတာ၊ မာယသ္မန္တာနံ သံဃဘေဒေါ ရုစ္စိတ္ထာ’တိ. ကရိဿန္တိ တေသံ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿ.

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အမုကသ္မိံ ကိရ အာဝါသေ သမ္ဗဟုလာ ဘိက္ခုနိယော သံဃဘေဒါယ ပရက္ကမန္တီ’’တိ. တတြ စေ ဘိက္ခုနော ဧဝံ ဟောတိ – ‘‘တာ ခေါ မေ ဘိက္ခုနိယော မိတ္တာ. တာဟံ ဝက္ခာမိ ‘ဂရုကော ခေါ၊ ဘဂိနိယော၊ သံဃဘေဒေါ ဝုတ္တော ဘဂဝတာ၊ မာ ဘဂိနီနံ သံဃဘေဒေါ ရုစ္စိတ္ထာ’တိ. ကရိဿန္တိ မေ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿ.

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အမုကသ္မိံ ကိရ အာဝါသေ သမ္ဗဟုလာ ဘိက္ခုနိယော သံဃဘေဒါယ ပရက္ကမန္တီ’’တိ. တတြ စေ ဘိက္ခုနော ဧဝံ ဟောတိ – ‘‘တာ ခေါ မေ ဘိက္ခုနိယော န မိတ္တာ. အပိ စ၊ ယာ တာသံ မိတ္တာ၊ တာ မေ မိတ္တာ. တာဟံ ဝက္ခာမိ. တာ ဝုတ္တာ တာ ဝက္ခန္တိ ‘ဂရုကော ခေါ၊ ဘဂိနိယော၊ သံဃဘေဒေါ ဝုတ္တော ဘဂဝတာ. မာ ဘဂိနီနံ သံဃဘေဒေါ ရုစ္စိတ္ထာ’တိ. ကရိဿန္တိ တာသံ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿတိ.

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အမုကသ္မိံ ကိရ အာဝါသေ သမ္ဗဟုလာဟိ ဘိက္ခုနီဟိ သံဃော ဘိန္နော’’တိ. တတြ စေ ဘိက္ခုနော ဧဝံ ဟောတိ – ‘‘တာ ခေါ မေ ဘိက္ခုနိယော မိတ္တာ. တာဟံ ဝက္ခာမိ ‘ဂရုကော ခေါ၊ ဘဂိနိယော၊ သံဃဘေဒေါ ဝုတ္တော ဘဂဝတာ. မာ ဘဂိနီနံ သံဃဘေဒေါ ရုစ္စိတ္ထာ’တိ. ကရိဿန္တိ မေ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿတိ.

ဣဓ ပန၊ ဘိက္ခဝေ၊ ဝဿူပဂတော ဘိက္ခု သုဏာတိ – ‘‘အမုကသ္မိံ ကိရ အာဝါသေ သမ္ဗဟုလာဟိ ဘိက္ခုနီဟိ သံဃော ဘိန္နော’’တိ. တတြ စေ ဘိက္ခုနော ဧဝံ ဟောတိ – ‘‘တာ ခေါ မေ ဘိက္ခုနိယော န မိတ္တာ. အပိ စ၊ ယာ တာသံ မိတ္တာ တာ မေ မိတ္တာ. တာဟံ ဝက္ခာမိ. တာ ဝုတ္တာ တာ ဝက္ခန္တိ ‘ဂရုကော ခေါ၊ ဘဂိနိယော [အယျာယော (သီ.)]၊ သံဃဘေဒေါ ဝုတ္တော ဘဂဝတာ၊ မာ ဘဂိနီနံ [အယျာနံ (သီ.)] သံဃဘေဒေါ ရုစ္စိတ္ထာ’တိ. ကရိဿန္တိ တာသံ ဝစနံ၊ သုဿူသိဿန္တိ၊ သောတံ ဩဒဟိဿန္တီ’’တိ၊ ပက္ကမိတဗ္ဗံ. အနာပတ္တိ ဝဿစ္ဆေဒဿာတိ.

သံဃဘေဒေ အနာပတ္တိဝဿစ္ဆေဒဝါရော နိဋ္ဌိတော.