၄၉. တိရစ္ဆာနဂတဝတ္ထု

၁၁၁. တေန ခေါ ပန သမယေန အညတရော နာဂေါ နာဂယောနိယာ အဋ္ဋီယတိ ဟရာယတိ ဇိဂုစ္ဆတိ. အထ ခေါ တဿ နာဂဿ ဧတဒဟောသိ – ‘‘ကေန နု ခေါ အဟံ ဥပါယေန နာဂယောနိယာ စ ပရိမုစ္စေယျံ ခိပ္ပဉ္စ မနုဿတ္တံ ပဋိလဘေယျ’’န္တိ. အထ ခေါ တဿ နာဂဿ ဧတဒဟောသိ – ‘‘ဣမေ ခေါ သမဏာ သကျပုတ္တိယာ ဓမ္မစာရိနော သမစာရိနော ဗြဟ္မစာရိနော သစ္စဝါဒိနော သီလဝန္တော ကလျာဏဓမ္မာ. သစေ ခေါ အဟံ သမဏေသု သကျပုတ္တိယေသု ပဗ္ဗဇေယျံ၊ ဧဝါဟံ နာဂယောနိယာ စ ပရိမုစ္စေယျံ၊ ခိပ္ပဉ္စ မနုဿတ္တံ ပဋိလဘေယျ’’န္တိ. အထ ခေါ သော နာဂေါ မာဏဝကဝဏ္ဏေန ဘိက္ခူ ဥပသင်္ကမိတွာ ပဗ္ဗဇ္ဇံ ယာစိ. တံ ဘိက္ခူ ပဗ္ဗာဇေသုံ၊ ဥပသမ္ပာဒေသုံ. တေန ခေါ ပန သမယေန သော နာဂေါ အညတရေန ဘိက္ခုနာ သဒ္ဓိံ ပစ္စန္တိမေ ဝိဟာရေ ပဋိဝသတိ. အထ ခေါ သော ဘိက္ခု ရတ္တိယာ ပစ္စူသသမယံ ပစ္စုဋ္ဌာယ အဇ္ဈောကာသေ စင်္ကမတိ. အထ ခေါ သော နာဂေါ တဿ ဘိက္ခုနော နိက္ခန္တေ ဝိဿဋ္ဌော နိဒ္ဒံ ဩက္ကမိ. သဗ္ဗော ဝိဟာရော အဟိနာ ပုဏ္ဏော၊ ဝါတပါနေဟိ ဘောဂါ နိက္ခန္တာ ဟောန္တိ. အထ ခေါ သော ဘိက္ခု ဝိဟာရံ ပဝိသိဿာမီတိ ကဝါဋံ ပဏာမေန္တော အဒ္ဒသ သဗ္ဗံ ဝိဟာရံ အဟိနာ ပုဏ္ဏံ၊ ဝါတပါနေဟိ ဘောဂေ နိက္ခန္တေ၊ ဒိသွာန ဘီတော ဝိဿရမကာသိ. ဘိက္ခူ ဥပဓာဝိတွာ တံ ဘိက္ခုံ ဧတဒဝေါစုံ – ‘‘ကိဿ တွံ၊ အာဝုသော၊ ဝိဿရမကာသီ’’တိ? ‘‘အယံ၊ အာဝုသော၊ သဗ္ဗော ဝိဟာရော အဟိနာ ပုဏ္ဏော၊ ဝါတပါနေဟိ ဘောဂါ နိက္ခန္တာ’’တိ. အထ ခေါ သော နာဂေါ တေန သဒ္ဒေန ပဋိဗုဇ္ဈိတွာ သကေ အာသနေ နိသီဒိ. ဘိက္ခူ ဧဝမာဟံသု – ‘‘ကောသိ တွံ၊ အာဝုသော’’တိ? ‘‘အဟံ၊ ဘန္တေ၊ နာဂေါ’’တိ. ‘‘ကိဿ ပန တွံ၊ အာဝုသော၊ ဧဝရူပံ အကာသီ’’တိ? အထ ခေါ သော နာဂေါ ဘိက္ခူနံ ဧတမတ္ထံ အာရောစေသိ. ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ တံ နာဂံ ဧတဒဝေါစ – ‘‘တုမှေ ခေါတ္ထ နာဂါ အဝိရုဠှိဓမ္မာ ဣမသ္မိံ ဓမ္မဝိနယေ. ဂစ္ဆ တွံ၊ နာဂ၊ တတ္ထေဝ စာတုဒ္ဒသေ ပန္နရသေ အဋ္ဌမိယာ စ ပက္ခဿ ဥပေါသထံ ဥပဝသ၊ ဧဝံ တွံ နာဂယောနိယာ စ ပရိမုစ္စိဿသိ၊ ခိပ္ပဉ္စ မနုဿတ္တံ ပဋိလဘိဿသီ’’တိ. အထ ခေါ သော နာဂေါ အဝိရုဠှိဓမ္မော ကိရာဟံ ဣမသ္မိံ ဓမ္မဝိနယေတိ ဒုက္ခီ ဒုမ္မနော အဿူနိ ပဝတ္တယမာနော ဝိဿရံ ကတွာ ပက္ကာမိ. အထ ခေါ ဘဂဝါ ဘိက္ခူ အာမန္တေသိ – ‘‘ဒွေမေ၊ ဘိက္ခဝေ၊ ပစ္စယာ နာဂဿ သဘာဝပါတုကမ္မာယ. ယဒါ စ သဇာတိယာ မေထုနံ ဓမ္မံ ပဋိသေဝတိ၊ ယဒါ စ ဝိဿဋ္ဌော နိဒ္ဒံ ဩက္ကမတိ – ဣမေ ခေါ၊ ဘိက္ခဝေ၊ ဒွေ ပစ္စယာ နာဂဿ သဘာဝပါတုကမ္မာယ. တိရစ္ဆာနဂတော၊ ဘိက္ခဝေ၊ အနုပသမ္ပန္နော န ဥပသမ္ပာဒေတဗ္ဗော၊ ဥပသမ္ပန္နော နာသေတဗ္ဗော’’တိ.