၄၂. သိက္ခာပဒကထာ

၁၀၆. အထ ခေါ သာမဏေရာနံ ဧတဒဟောသိ – ‘‘ကတိ နု ခေါ အမှာကံ သိက္ခာပဒါနိ၊ ကတ္ထ စ အမှေဟိ သိက္ခိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ပေ။ အနုဇာနာမိ၊ ဘိက္ခဝေ၊ သာမဏေရာနံ ဒသ သိက္ခာပဒါနိ၊ တေသု စ သာမဏေရေဟိ သိက္ခိတုံ – ပါဏာတိပါတာ ဝေရမဏီ [ဝေရမဏိ၊ ဝေရမဏိံ (က.)]၊ အဒိန္နာဒါနာ ဝေရမဏီ၊ အဗြဟ္မစရိယာ ဝေရမဏီ၊ မုသာဝါဒါ ဝေရမဏီ၊ သုရာမေရယမဇ္ဇပမာဒဋ္ဌာနာ ဝေရမဏီ၊ ဝိကာလဘောဇနာ ဝေရမဏီ၊ နစ္စဂီတဝါဒိတဝိသူကဒဿနာ ဝေရမဏီ၊ မာလာဂန္ဓဝိလေပနဓာရဏမဏ္ဍနဝိဘူသနဋ္ဌာနာ ဝေရမဏီ၊ ဥစ္စာသယနမဟာသယနာ ဝေရမဏီ၊ ဇာတရူပရဇတပဋိဂ္ဂဟဏာ ဝေရမဏီ. အနုဇာနာမိ၊ ဘိက္ခဝေ၊ သာမဏေရာနံ ဣမာနိ ဒသ သိက္ခာပဒါနိ၊ ဣမေသု စ သာမဏေရေဟိ သိက္ခိတုန္တိ.

သိက္ခာပဒကထာ နိဋ္ဌိတာ.