၃၅. ကမ္မာရဘဏ္ဍုဝတ္ထု

၉၈. တေန ခေါ ပန သမယေန အညတရော ကမ္မာရဘဏ္ဍု မာတာပိတူဟိ သဒ္ဓိံ ဘဏ္ဍိတွာ အာရာမံ ဂန္တွာ ဘိက္ခူသု ပဗ္ဗဇိတော ဟောတိ. အထ ခေါ တဿ ကမ္မာရဘဏ္ဍုဿ မာတာပိတရော တံ ကမ္မာရဘဏ္ဍုံ ဝိစိနန္တာ အာရာမံ ဂန္တွာ ဘိက္ခူ ပုစ္ဆိံသု – ‘‘အပိ၊ ဘန္တေ၊ ဧဝရူပံ ဒါရကံ ပဿေယျာထာ’’တိ? ဘိက္ခူ အဇာနံယေဝ အာဟံသု – ‘‘န ဇာနာမာ’’တိ၊ အပဿံယေဝ အာဟံသု – ‘‘န ပဿာမာ’’တိ. အထ ခေါ တဿ ကမ္မာရဘဏ္ဍုဿ မာတာပိတရော တံ ကမ္မာရဘဏ္ဍုံ ဝိစိနန္တာ ဘိက္ခူသု ပဗ္ဗဇိတံ ဒိသွာ ဥဇ္ဈာယန္တိ ခိယျန္တိ ဝိပါစေန္တိ – ‘‘အလဇ္ဇိနော ဣမေ သမဏာ သကျပုတ္တိယာ၊ ဒုဿီလာ မုသာဝါဒိနော. ဇာနံယေဝ အာဟံသု – ‘န ဇာနာမာ’တိ၊ ပဿံယေဝ အာဟံသု – ‘န ပဿာမာ’တိ. အယံ ဒါရကော ဘိက္ခူသု ပဗ္ဗဇိတော’’တိ. အဿောသုံ ခေါ ဘိက္ခူ တဿ ကမ္မာရဘဏ္ဍုဿ မာတာပိတူနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ သံဃံ အပလောကေတုံ ဘဏ္ဍုကမ္မာယာတိ.

ကမ္မာရဘဏ္ဍုဝတ္ထု နိဋ္ဌိတံ.