၃၀. လိခိတကစောရဝတ္ထု

၉၃. တေန ခေါ ပန သမယေန အညတရော ပုရိသော စောရိကံ ကတွာ ပလာယိတွာ ဘိက္ခူသု ပဗ္ဗဇိတော ဟောတိ. သော စ ရညော အန္တေပုရေ လိခိတော ဟောတိ – ယတ္ထ ပဿတိ၊ တတ္ထ ဟန္တဗ္ဗောတိ. မနုဿာ ပဿိတွာ ဧဝမာဟံသု – ‘‘အယံ သော လိခိတကော စောရော. ဟန္ဒ၊ နံ ဟနာမာ’’တိ. ဧကစ္စေ ဧဝမာဟံသု – ‘‘မာယျော၊ ဧဝံ အဝစုတ္ထ. အနုညာတံ ရညာ မာဂဓေန သေနိယေန ဗိမ္ဗိသာရေန ‘‘ယေ သမဏေသု သကျပုတ္တိယေသု ပဗ္ဗဇန္တိ၊ န တေ လဗ္ဘာ ကိဉ္စိ ကာတုံ၊ သွာက္ခာတော ဓမ္မော၊ စရန္တု ဗြဟ္မစရိယံ သမ္မာ ဒုက္ခဿ အန္တကိရိယာယာ’’တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘အဘယူဝရာ ဣမေ သမဏာ သကျပုတ္တိယာ၊ နယိမေ လဗ္ဘာ ကိဉ္စိ ကာတုံ. ကထဉှိ နာမ သမဏာ သကျပုတ္တိယာ လိခိတကံ စောရံ ပဗ္ဗာဇေဿန္တီ’’တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ လိခိတကော စောရော ပဗ္ဗာဇေတဗ္ဗော. ယော ပဗ္ဗာဇေယျ၊ အာပတ္တိ ဒုက္ကဋဿာတိ.

လိခိတကစောရဝတ္ထု နိဋ္ဌိတံ.