၂၂. နိဿယပဋိပ္ပဿဒ္ဓိကထာ

၈၃. တေန ခေါ ပန သမယေန ဘိက္ခူ အာစရိယုပဇ္ဈာယေသု ပက္ကန္တေသုပိ ဝိဗ္ဘန္တေသုပိ ကာလင်္ကတေသုပိ ပက္ခသင်္ကန္တေသုပိ နိဿယပဋိပ္ပဿဒ္ဓိယော န ဇာနန္တိ. ဘဂဝတော ဧတမတ္ထံ အာရောစေသုံ.

‘‘ပဉ္စိမာ၊ ဘိက္ခဝေ၊ နိဿယပဋိပ္ပဿဒ္ဓိယော ဥပဇ္ဈာယမှာ – ဥပဇ္ဈာယော ပက္ကန္တော ဝါ ဟောတိ၊ ဝိဗ္ဘန္တော ဝါ၊ ကာလင်္ကတော ဝါ၊ ပက္ခသင်္ကန္တော ဝါ၊ အာဏတ္တိယေဝ ပဉ္စမီ. ဣမာ ခေါ၊ ဘိက္ခဝေ၊ ပဉ္စ နိဿယပဋိပ္ပဿဒ္ဓိယော ဥပဇ္ဈာယမှာ.

‘‘ဆယိမာ၊ ဘိက္ခဝေ၊ နိဿယပဋိပ္ပဿဒ္ဓိယော အာစရိယမှာ – အာစရိယော ပက္ကန္တော ဝါ ဟောတိ၊ ဝိဗ္ဘန္တော ဝါ၊ ကာလင်္ကတော ဝါ၊ ပက္ခသင်္ကန္တော ဝါ၊ အာဏတ္တိယေဝ ပဉ္စမီ၊ ဥပဇ္ဈာယေန ဝါ သမောဓာနဂတော ဟောတိ. ဣမာ ခေါ၊ ဘိက္ခဝေ၊ ဆ နိဿယပဋိပ္ပဿဒ္ဓိယော အာစရိယမှာ’’.

နိဿပဋိပ္ပဿဒ္ဓိကထာ နိဋ္ဌိတာ.