၂. မူလာယပဋိကဿနာရဟဝတ္တံ

၈၆. တေန ခေါ ပန သမယေန မူလာယပဋိကဿနာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ မူလာယပဋိကဿနာရဟာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မ’’န္တိ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ.

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ မူလာယပဋိကဿနာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မ’’န္တိ? ‘‘သစ္စံ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ။ပေ။ ကထဉှိ နာမ၊ ဘိက္ခဝေ၊ မူလာယပဋိကဿနာရဟာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မံ! နေတံ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဝိဂရဟိတွာ။ပေ။ ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သာဒိတဗ္ဗံ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရော၊ သေယျာဘိဟာရော၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ. ယော သာဒိယေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ မူလာယပဋိကဿနာရဟာနံ ဘိက္ခူနံ မိထု ယထာဝုဍ္ဎံ အဘိဝါဒနံ၊ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မံ. အနုဇာနာမိ၊ ဘိက္ခဝေ၊ မူလာယပဋိကဿနာရဟာနံ ဘိက္ခူနံ ပဉ္စ ယထာဝုဍ္ဎံ – ဥပေါသထံ၊ ပဝါရဏံ၊ ဝဿိကသာဋိကံ၊ ဩဏောဇနံ၊ ဘတ္တံ. တေန ဟိ၊ ဘိက္ခဝေ၊ မူလာယပဋိကဿနာရဟာနံ ဘိက္ခူနံ ဝတ္တံ ပညာပေဿာမိ ယထာ မူလာယပဋိကဿနာရဟေဟိ ဘိက္ခူဟိ ဝတ္တိတဗ္ဗံ.

၈၇. ‘‘မူလာယပဋိကဿနာရဟေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ. တတြာယံ သမ္မာဝတ္တနာ –

န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ. ယာယ အာပတ္တိယာ သံဃေန မူလာယ ပဋိကဿနာရဟော ကတော ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ. န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗံ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ ပကတတ္တဿ ဘိက္ခုနော ပုရတော ဂန္တဗ္ဗံ၊ န ပုရတော နိသီဒိတဗ္ဗံ. ယော ဟောတိ သံဃဿ အာသနပရိယန္တော သေယျာပရိယန္တော ဝိဟာရပရိယန္တော သော တဿ ပဒါတဗ္ဗော. တေန စ သော သာဒိတဗ္ဗော.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ ပကတတ္တေန ဘိက္ခုနာ ပုရေသမဏေန ဝါ ပစ္ဆာသမဏေန ဝါ ကုလာနိ ဥပသင်္ကမိတဗ္ဗာနိ၊ န အာရညိကင်္ဂံ သမာဒါတဗ္ဗံ၊ န ပိဏ္ဍပါတိကင်္ဂံ သမာဒါတဗ္ဗံ၊ န စ တပ္ပစ္စယာ ပိဏ္ဍပါတော နီဟရာပေတဗ္ဗော – မာ မံ ဇာနိံသူတိ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အနာဝါသာ အဘိက္ခုကော အာဝါသော ဂန္တဗ္ဗော။ပေ။ အဘိက္ခုကော အနာဝါသော ဂန္တဗ္ဗော။ပေ။ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဂန္တဗ္ဗော။ပေ။ အဘိက္ခုကော အနာဝါသော ဂန္တဗ္ဗော။ပေ။ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဂန္တဗ္ဗော။ပေ။ သဘိက္ခုကော အနာဝါသော ဂန္တဗ္ဗော။ပေ။ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဂန္တဗ္ဗော။ပေ။ သဘိက္ခုကော အနာဝါသော ဂန္တဗ္ဗော။ပေ။ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဂန္တဗ္ဗော။ပေ။ သဘိက္ခုကော အနာဝါသော ဂန္တဗ္ဗော။ပေ။ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ.

‘‘ဂန္တဗ္ဗော၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော။ပေ။ သဘိက္ခုကော အနာဝါသော။ပေ။ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ.

‘‘ဂန္တဗ္ဗော၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော။ပေ။ သဘိက္ခုကော အနာဝါသော။ပေ။ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ.

‘‘ဂန္တဗ္ဗော၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော။ပေ။ သဘိက္ခုကော အနာဝါသော။ပေ။ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ၊ ပကတတ္တော ဘိက္ခု အာသနေန နိမန္တေတဗ္ဗော၊ န ပကတတ္တေန ဘိက္ခုနာ သဒ္ဓိံ ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ.

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ ပါရိဝါသိကေန ဘိက္ခုနာ သဒ္ဓိံ။ပေ။ မူလာယပဋိကဿနာရဟေန ဝုဍ္ဎတရေန ဘိက္ခုနာ သဒ္ဓိံ။ပေ။ မာနတ္တာရဟေန ဘိက္ခုနာ သဒ္ဓိံ။ပေ။ မာနတ္တစာရိကေန ဘိက္ခုနာ သဒ္ဓိံ။ပေ။ အဗ္ဘာနာရဟေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ န ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ.

[မဟာဝ. ၃၉၃] ‘‘မူလာယပဋိကဿနာရဟစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ၊ အကမ္မံ၊ န စ ကရဏီယ’’န္တိ.

မူလာယပဋိကဿနာရဟဝတ္တံ နိဋ္ဌိတံ.