ဘိက္ခုနီဝိဘင်္ဂေါ
၁၉၆၄. ဘိက္ခုနီနံ ဟိတတ္ထာယ၊ ဝိဘင်္ဂံ ယံ ဇိနောဗြဝိ၊
တသ္မိံ အပိ သမာသေန၊ ကိဉ္စိမတ္တံ ဘဏာမဟံ.
ပါရာဇိကကထာ
၁၉၆၅. ဆန္ဒသော မေထုနံ ဓမ္မံ၊ ပဋိသေဝေယျ ယာ ပန၊
ဟောတိ ပါရာဇိကာ နာမ၊ သမဏီ သာ ပဝုစ္စတိ.
၁၉၆၆. မနုဿပုရိသာဒီနံ၊ နဝန္နံ ယဿ ကဿစိ၊
သဇီဝဿာပျဇီဝဿ၊ သန္ထတံ ဝါ အသန္ထတံ.
၁၉၆၇. အတ္တနော တိဝိဓေ မဂ္ဂေ၊ ယေဘုယျက္ခာယိတာဒိကံ၊
အင်္ဂဇာတံ ပဝေသေန္တီ၊ အလ္လောကာသေ ပရာဇိတာ.
၁၉၆၈. ဣတော ပရမဝတွာဝ၊ သာဓာရဏဝိနိစ္ဆယံ၊
အသာဓာရဏမေဝါဟံ၊ ဘဏိဿာမိ သမာသတော.
၁၉၆၉. အဓက္ခကံ သရီရကံ၊ ယဒုဗ္ဘဇာဏုမဏ္ဍလံ၊
သရီရကေန စေ တေန၊ ဖုသေယျ ဘိက္ခုနီ ပန.
၁၉၇၀. အဝဿုတဿာဝဿုတာ၊ မနုဿပုဂ္ဂလဿ ယာ၊
သရီရမဿ တေန ဝါ၊ ဖုဋ္ဌာ ပါရာဇိကာ သိယာ.
၁၉၇၁. ကပ္ပရဿ ပနုဒ္ဓမ္ပိ၊ ဂဟိတံ ဥဗ္ဘဇာဏုနာ၊
ယထာဝုတ္တပ္ပကာရေန၊ ကာယေနာနေန အတ္တနော.
၁၉၇၂. ပုရိသဿ တထာ ကာယ- ပဋိဗဒ္ဓံ ဖုသန္တိယာ၊
တထာ ယထာပရိစ္ဆိန္န- ကာယဗဒ္ဓေန အတ္တနော.
၁၉၇၃. အဝသေသေန ဝါ တဿ၊ ကာယံ ကာယေန အတ္တနော၊
ဟောတိ ထုလ္လစ္စယံ တဿာ၊ ပယောဂေ ပုရိသဿ စ.
၁၉၇၄. ယက္ခပေတတိရစ္ဆာန- ပဏ္ဍကာနံ အဓက္ခကံ၊
ဥဗ္ဘဇာဏုံ တထေဝဿာ၊ ဥဘတောဝဿဝေ သတိ.
၁၉၇၅. ဧကတောဝဿဝေ စာပိ၊ ထုလ္လစ္စယမုဒီရိတံ၊
အဝသေသေ စ သဗ္ဗတ္ထ၊ ဟောတိ အာပတ္တိ ဒုက္ကဋံ.
၁၉၇၆. ဥဗ္ဘက္ခကမဓောဇာဏု-မဏ္ဍလံ ပန ယံ ဣဓ၊
ကပ္ပရဿ စ ဟေဋ္ဌာပိ၊ ဂတံ ဧတ္ထေဝ သင်္ဂဟံ.
၁၉၇၇. ကေလာယတိ သစေ ဘိက္ခု၊ သဒ္ဓိံ ဘိက္ခုနိယာ ပန၊
ဥဘိန္နံ ကာယသံသဂ္ဂ-ရာဂေ သတိ ဟိ ဘိက္ခုနော.
၁၉၇၈. ဟောတိ သံဃာဒိသေသောဝ၊ နာသော ဘိက္ခုနိယာ သိယာ၊
ကာယသံသဂ္ဂရာဂေါ စ၊ သစေ ဘိက္ခုနိယာ သိယာ.
၁၉၇၉. ဘိက္ခုနော မေထုနော ရာဂေါ၊ ဂေဟပေမမ္ပိ ဝါ ဘဝေ၊
တဿာ ထုလ္လစ္စယံ ဝုတ္တံ၊ ဘိက္ခုနော ဟောတိ ဒုက္ကဋံ.
၁၉၈၀. ဥဘိန္နံ မေထုနေ ရာဂေ၊ ဂေဟပေမေပိ ဝါ သတိ၊
အဝိသေသေန နိဒ္ဒိဋ္ဌံ၊ ဥဘိန္နံ ဒုက္ကဋံ ပန.
၁၉၈၁. ယဿ ယတ္ထ မနောသုဒ္ဓံ၊ တဿ တတ္ထ န ဒေါသတာ၊
ဥဘိန္နမ္ပိ အနာပတ္တိ၊ ဥဘိန္နံ စိတ္တသုဒ္ဓိယာ.
၁၉၈၂. ကာယသံသဂ္ဂရာဂေန၊ ဘိန္ဒိတွာ ပဌမံ ပန၊
ပစ္ဆာ ဒူသေတိ စေ နေဝ၊ ဟောတိ ဘိက္ခုနိဒူသကော.
၁၉၈၃. အထ ဘိက္ခုနိယာ ဖုဋ္ဌော၊ သာဒိယန္တောဝ စေတသာ၊
နိစ္စလော ဟောတိ စေ ဘိက္ခု၊ န ဟောတာပတ္တိ ဘိက္ခုနော.
၁၉၈၄. ဘိက္ခုနီ ဘိက္ခုနာ ဖုဋ္ဌာ၊ သစေ ဟောတိပိ နိစ္စလာ၊
အဓိဝါသေတိ သမ္ဖဿံ၊ တဿာ ပါရာဇိကံ သိယာ.
၁၉၈၅. တထာ ထုလ္လစ္စယံ ခေတ္တေ၊ ဒုက္ကဋဉ္စ ဝိနိဒ္ဒိသေ၊
ဝုတ္တတ္တာ ‘‘ကာယသံသဂ္ဂံ၊ သာဒိယေယျာ’’တိ သတ္ထုနာ.
၁၉၈၆. တဿာ ကြိယသမုဋ္ဌာနံ၊ ဧဝံ သတိ န ဒိဿတိ၊
ဣဒံ တဗ္ဗဟုလေနေဝ၊ နယေန ပရိဒီပိတံ.
၁၉၈၇. အနာပတ္တိ အသဉ္စိစ္စ၊ အဇာနိတွာမသန္တိယာ၊
သတိ အာမသနေ တဿာ၊ ဖဿံ ဝါသာဒိယန္တိယာ.
၁၉၈၈. ဝေဒနဋ္ဋာယ ဝါ ခိတ္တ-စိတ္တာယုမ္မတ္တိကာယ ဝါ၊
သမုဋ္ဌာနာဒယော တုလျာ၊ ပဌမန္တိမဝတ္ထုနာ.
ဥဗ္ဘဇာဏုမဏ္ဍလကထာ.
၁၉၈၉. ပါရာဇိကတ္တံ ဇာနန္တိ၊ သလိင်္ဂေ တု ဌိတာယ ဟိ၊
‘‘န ကဿစိ ပရဿာဟံ၊ အာရောစေဿာမိ ဒါနိ’’တိ.
၁၉၉၀. ဓုရေ နိက္ခိတ္တမတ္တသ္မိံ၊ သာ စ ပါရာဇိကာ သိယာ၊
အယံ ဝဇ္ဇပဋိစ္ဆာဒိ- နာမိကာ ပန နာမတော.
၁၉၉၁. သေသံ သပ္ပါဏဝဂ္ဂသ္မိံ၊ ဒုဋ္ဌုလ္လေန သမံ နယေ၊
ဝိသေသော တတြ ပါစိတ္တိ၊ ဣဓ ပါရာဇိကံ သိယာ.
ဝဇ္ဇပဋိစ္ဆာဒိကထာ.
၁၉၉၂. သံဃေနုက္ခိတ္တကော ဘိက္ခု၊ ဌိတော ဥက္ခေပနေ ပန၊
ယံဒိဋ္ဌိကော စ သော တဿာ၊ ဒိဋ္ဌိယာ ဂဟဏေန တံ.
၁၉၉၃. အနုဝတ္တေယျ ယာ ဘိက္ခုံ၊ ဘိက္ခုနီ သာ ဝိသုမ္ပိ စ၊
သံဃမဇ္ဈေပိ အညာဟိ၊ ဝုစ္စမာနာ တထေဝ စ.
၁၉၉၄. အစဇန္တီဝ တံ ဝတ္ထုံ၊ ဂဟေတွာ ယဒိ တိဋ္ဌတိ၊
တဿ ကမ္မဿ ဩသာနေ၊ ဥက္ခိတ္တဿာနုဝတ္တိကာ.
၁၉၉၅. ဟောတိ ပါရာဇိကာပန္နာ၊ ဟောတာသာကိယဓီတရာ၊
ပုန အပ္ပဋိသန္ဓေယာ၊ ဒွိဓာ ဘိန္နာ သိလာ ဝိယ.
၁၉၉၆. အဓမ္မေ ပန ကမ္မသ္မိံ၊ နိဒ္ဒိဋ္ဌံ တိကဒုက္ကဋံ၊
သမုဋ္ဌာနာဒယော သဗ္ဗေ၊ ဝုတ္တာ သမနုဘာသနေ.
ဥက္ခိတ္တာနုဝတ္တိကကထာ.
၁၉၉၇. အပါရာဇိကခေတ္တဿ၊ ဂဟဏံ ယဿ ကဿစိ၊
အင်္ဂဿ ပန တံ ဟတ္ထ-ဂ္ဂဟဏန္တိ ပဝုစ္စတိ.
၁၉၉၈. ပါရုတဿ နိဝတ္ထဿ၊ ဂဟဏံ ယဿ ကဿစိ၊
ဧတံ သင်္ဃာဋိယာ ကဏ္ဏ-ဂ္ဂဟဏန္တိ ပဝုစ္စတိ.
၁၉၉၉. ကာယသံသဂ္ဂသင်္ခါတ-အသဒ္ဓမ္မဿ ကာရဏာ၊
ဘိက္ခုနီ ဟတ္ထပါသသ္မိံ၊ တိဋ္ဌေယျ ပုရိသဿ ဝါ.
၂၀၀၀. သလ္လပေယျ တထာ တတ္ထ၊ ဌတွာ တု ပုရိသေန ဝါ၊
သင်္ကေတံ ဝါပိ ဂစ္ဆေယျ၊ ဣစ္ဆေယျာ ဂမနဿ ဝါ.
၂၀၀၁. တဒတ္ထာယ ပဋိစ္ဆန္န-ဋ္ဌာနဉ္စ ပဝိသေယျ ဝါ၊
ဥပသံဟရေယျ ကာယံ ဝါ၊ ဟတ္ထပါသေ ဌိတာ ပန.
၂၀၀၂. အယမဿမဏီ ဟောတိ၊ ဝိနဋ္ဌာ အဋ္ဌဝတ္ထုကာ၊
အဘဗ္ဗာ ပုနရုဠှာယ၊ ဆိန္နော တာလောဝ မတ္ထကေ.
၂၀၀၃. အနုလောမေန ဝါ ဝတ္ထုံ၊ ပဋိလောမေန ဝါ စုတာ၊
အဋ္ဌမံ ပရိပူရေန္တီ၊ တထေကန္တရိကာယ ဝါ.
၂၀၀၄. အထာဒိတော ပနေကံ ဝါ၊ ဒွေ ဝါ တီဏိပိ သတ္တ ဝါ၊
သတက္ခတ္တုမ္ပိ ပူရေန္တီ၊ နေဝ ပါရာဇိကာ သိယာ.
၂၀၀၅. အာပတ္တိယော ပနာပန္နာ၊ ဒေသေတွာ တာဟိ မုစ္စတိ၊
ဓုရနိက္ခေပနံ ကတွာ၊ ဒေသိတာ ဂဏနူပိကာ.
၂၀၀၆. န ဟောတာပတ္တိယာ အင်္ဂံ၊ သဥဿာဟာယ ဒေသိတာ၊
ဒေသနာဂဏနံ နေတိ၊ ဒေသိတာပိ အဒေသိတာ.
၂၀၀၇. အနာပတ္တိ အသဉ္စိစ္စ၊ အဇာနိတွာ ကရောန္တိယာ၊
သမုဋ္ဌာနာဒယော သဗ္ဗေ၊ အနန္တရသမာ မတာ.
၂၀၀၈. ‘‘အသဒ္ဓမ္မော’’တိ နာမေတ္ထ၊ ကာယသံသဂ္ဂနာမကော၊
အယမုဒ္ဒိသိတော အတ္ထော၊ သဗ္ဗအဋ္ဌကထာသုပိ.
၂၀၀၉. ဝိညူ ပဋိဗလော ကာယ-သံသဂ္ဂံ ပဋိပဇ္ဇိတုံ၊
ကာယသံသဂ္ဂဘာဝေ တု၊ သာဓကံ ဝစနံ ဣဒံ.
အဋ္ဌဝတ္ထုကကထာ.
၂၀၁၀. အဝဿုတာ ပဋိစ္ဆာဒီ၊ ဥက္ခိတ္တာ အဋ္ဌဝတ္ထုကာ၊
အသာဓာရဏပညတ္တာ၊ စတဿောဝ မဟေသိနာ.
ပါရာဇိကကထာ နိဋ္ဌိတာ.
သံဃာဒိသေသကထာ
၂၀၁၁. ယာ ပန ဘိက္ခုနီ ဥဿယဝါဒါ၊
အဋ္ဋကရီ မုခရီ ဝိဟရေယျ၊
ယေန ကေနစိ နရေနိဓ သဒ္ဓိံ၊
သာ ဂရုကံ ကိရ ဒေါသမုပေတိ.
၂၀၁၂. သက္ခိံ ဝါပိ သဟာယံ ဝါ၊ ပရိယေသတိ ဒုက္ကဋံ၊
ပဒေ ပဒေ တထာ အဋ္ဋံ၊ ကာတုံ ဂစ္ဆန္တိယာပိ စ.
၂၀၁၃. အာရောစေတိ သစေ ပုဗ္ဗံ၊ ဘိက္ခုနီ အတ္တနော ကထံ၊
ဒိသွာ ဝေါဟာရိကံ တဿာ၊ ဟောတိ အာပတ္တိ ဒုက္ကဋံ.
၂၀၁၄. အာရောစေတိ သစေ ပစ္ဆာ၊ ဣတရော အတ္တနော ကထံ၊
ဟောတိ ဘိက္ခုနိယာ တဿာ၊ ထုလ္လစ္စယမနန္တရံ.
၂၀၁၅. အာရောစေတိတရော ပုဗ္ဗံ၊ သစေ သော အတ္တနော ကထံ၊
ပစ္ဆာ ဘိက္ခုနီ စေ ပုဗ္ဗ-သဒိသောဝ ဝိနိစ္ဆယော.
၂၀၁၆. ‘‘အာရောစေဟီ’’တိ ဝုတ္တာ စေ၊ ‘‘ကထံ တဝ မမာပိ စ’’၊
အာရောစေတု ယထာကာမံ၊ ပဌမေ ဒုက္ကဋံ သိယာ.
၂၀၁၇. ဒုတိယာရောစနေ တဿာ၊ ထုလ္လစ္စယမုဒီရိတံ၊
ဥပါသကေန ဝုတ္တေပိ၊ အယမေဝ ဝိနိစ္ဆယော.
၂၀၁၈. အာရောစိတကထံ သုတွာ၊ ဥဘိန္နမ္ပိ ယထာ တထာ၊
ဝိနိစ္ဆယေ ကတေ တေဟိ၊ အဋ္ဋေ ပန စ နိဋ္ဌိတေ.
၂၀၁၉. အဋ္ဋဿ ပရိယောသာနေ၊ ဇယေ ဘိက္ခုနိယာ ပန၊
ပရာဇယေပိ ဝါ တဿာ၊ ဟောတိ သံဃာဒိသေသတာ.
၂၀၂၀. ဒူတံ ဝါပိ ပဟိဏိတွာ၊ အာဂန္တွာန သယမ္ပိ ဝါ၊
ပစ္စတ္ထိကမနုဿေဟိ၊ အာကဍ္ဎီယတိ ယာ ပန.
၂၀၂၁. အာရာမေ ပန အညေဟိ၊ အနာစာရံ ကတံ သစေ၊
အနောဒိဿ ပရံ ကိဉ္စိ၊ ရက္ခံ ယာစတိ တတ္ထ ယာ.
၂၀၂၂. ယာယ ကိဉ္စိ အဝုတ္တာဝ၊ ဓမ္မဋ္ဌာ သယမေဝ တု၊
သုတွာ တံ အညတော အဋ္ဋံ၊ နိဋ္ဌာပေန္တိ သစေ ပန.
၂၀၂၃. တဿာ၊ ဥမ္မတ္တိကာဒီန-မနာပတ္တိ ပကာသိတာ၊
ကထိနေန သမုဋ္ဌာနံ၊ တုလျံ သကိရိယံ ဣဒံ.
အဋ္ဋကာရိကထာ.
၂၀၂၄. ဇာနန္တီ ဘိက္ခုနီ စောရိံ၊ ဝဇ္ဈံ ဝိဒိတမေဝ ယာ၊
သံဃံ အနပလောကေတွာ၊ ရာဇာနံ ဂဏမေဝ ဝါ.
၂၀၂၅. ဝုဋ္ဌာပေယျ ဝိနာ ကပ္ပံ၊ စောရိဝုဋ္ဌာပနံ ပန၊
သံဃာဒိသေသမာပတ္တိ-မာပန္နာ နာမ ဟောတိ သာ.
၂၀၂၆. ပဉ္စမာသဂ္ဃနံ ယာယ၊ ဟရိတံ ပရသန္တကံ၊
အတိရေကဂ္ဃနံ ဝါပိ၊ အယံ ‘‘စောရီ’’တိ ဝုစ္စတိ.
၂၀၂၇. ဘိက္ခုနီသု ပနညာသု၊ တိတ္ထိယေသုပိ ဝါ တထာ၊
ယာ ပဗ္ဗဇိတပုဗ္ဗာ သာ၊ အယံ ‘‘ကပ္ပါ’’တိ ဝုစ္စတိ.
၂၀၂၈. ဝုဋ္ဌာပေတိ စ ယာ စောရိံ၊ ဌပေတွာ ကပ္ပမေဝိဒံ၊
သစေ အာစရိနိံ ပတ္တံ၊ စီဝရံ ပရိယေသတိ.
၂၀၂၉. သမ္မန္နတိ စ သီမံ ဝါ၊ တဿာ အာပတ္တိ ဒုက္ကဋံ၊
ဉတ္တိယာ ဒုက္ကဋံ ဒွီဟိ၊ ကမ္မဝါစာဟိ စ ဒွယံ.
၂၀၃၀. ထုလ္လစ္စယဿ၊ ကမ္မန္တေ၊ ဂရုကံ နိဒ္ဒိသေ ဗုဓော၊
ဂဏော အာစရိနီ စေဝ၊ န စ မုစ္စတိ ဒုက္ကဋံ.
၂၀၃၁. အနာပတ္တိ အဇာနန္တီ၊ ဝုဋ္ဌာပေတိ၊ တထေဝ စ၊
ကပ္ပံ ဝါ အပလောကေတွာ၊ တဿာ ဥမ္မတ္တိကာယ ဝါ.
၂၀၃၂. စောရိဝုဋ္ဌာပနံ နာမ၊ ဇာယတေ ဝါစစိတ္တတော၊
ကာယဝါစာဒိတော စေဝ၊ သစိတ္တဉ္စ ကြိယာကြိယံ.
စောရိဝုဋ္ဌာပနကထာ.