ပါဋိဒေသနီယကထာ
၁၈၃၀. ယော စန္တရဃရံ ဘိက္ခု၊ ပဝိဋ္ဌာယ တု ဟတ္ထတော၊
အညာတိကာယ ယံ ကိဉ္စိ၊ တဿ ဘိက္ခုနိယာ ပန.
၁၈၃၁. သဟတ္ထာ ပဋိဂ္ဂဏှေယျ၊ ခါဒနံ ဘောဇနမ္ပိ ဝါ၊
ဂဟဏေ ဒုက္ကဋံ ဘောဂေ၊ ပါဋိဒေသနိယံ သိယာ.
၁၈၃၂. ရထိကာယပိ ဝါ ဗျူဟေ၊ သန္ဓိသိင်္ဃာဋကေသု ဝါ၊
ဟတ္ထိသာလာဒိကေ ဌတွာ၊ ဂဏှတောပိ အယံ နယော.
၁၈၃၃. ရထိကာယ သစေ ဌတွာ၊ ဒေတိ ဘိက္ခုနိ ဘောဇနံ၊
အာပတ္တိ အန္တရာရာမေ၊ ဌတွာ ဂဏှာတိ ဘိက္ခု စေ.
၁၈၃၄. ဧတ္ထန္တရဃရံ တဿာ၊ ပဝိဋ္ဌာယ ဟိ ဝါကျတော၊
ဘိက္ခုဿ စ ဌိတဋ္ဌာနံ၊ နပ္ပမာဏန္တိ ဝဏ္ဏိတံ.
၁၈၃၅. တသ္မာ ဘိက္ခုနိယာ ဌတွာ၊ အာရာမာဒီသု ဒေန္တိယာ၊
ဝီထိယာဒီသု စေ ဌတွာ၊ န ဒေါသော ပဋိဂဏှတော.
၁၈၃၆. ယာမကာလိကသတ္တာဟ-ကာလိကံ ယာဝဇီဝိကံ၊
အာဟာရတ္ထာယ ဂဟဏေ၊ အဇ္ဈောဟာရေ စ ဒုက္ကဋံ.
၁၈၃၇. အာမိသေန အသမ္ဘိန္န-ရသံ သန္ဓာယ ဘာသိတံ၊
ပါဋိဒေသနိယာပတ္တိ၊ သမ္ဘိန္နေကရသေ သိယာ.
၁၈၃၈. ဧကတောဥပသမ္ပန္န-ဟတ္ထတော ပဋိဂဏှတော၊
ကာလိကာနံ စတုန္နမ္ပိ၊ အာဟာရတ္ထာယ ဒုက္ကဋံ.
၁၈၃၉. ဉာတိကာယပိ အညာတိ-သညိနော ဝိမတိဿ ဝါ၊
ဒုက္ကဋံ ဉာတိသညိဿ၊ တထာ အညာတိကာယ ဝါ.
၁၈၄၀. ဒါပေန္တိယာ အနာပတ္တိ၊ ဒဒမာနာယ ဝါ ပန၊
နိက္ခိပိတွာန္တရာရာမာ-ဒီသု ဌတွာပိ ဒေန္တိယာ.
၁၈၄၁. ဂါမတော နီဟရိတွာ ဝါ၊ ဒေတိ စေ ဗဟိ ဝဋ္ဋတိ၊
‘‘ပစ္စယေ သတိ ဘုဉ္ဇာ’’တိ၊ ဒေတိ စေ ကာလိကတ္တယံ.
၁၈၄၂. ဟတ္ထတော သာမဏေရီနံ၊ သိက္ခမာနာယ ဝါ တထာ၊
ဣဒံ ဧဠကလောမေန၊ သမုဋ္ဌာနံ သမံ မတံ.
ပဌမပါဋိဒေသနီယကထာ.
၁၈၄၃. အဝုတ္တေ ‘‘အပသက္ကာ’’တိ၊ ဧကေနာပိ စ ဘိက္ခုနာ၊
သစေဇ္ဈောဟရဏတ္ထာယ၊ အာမိသံ ပဋိဂဏှတိ.
၁၈၄၄. ဂဟဏေ ဒုက္ကဋံ ဘောဂေ၊ ပါဋိဒေသနိယံ သိယာ၊
ဧကတောဥပသမ္ပန္နံ၊ န ဝါရေန္တဿ ဒုက္ကဋံ.
၁၈၄၅. တထေဝါနုပသမ္ပန္နာ-ယုပသမ္ပန္နသညိနော၊
တတ္ထ ဝေမတိကဿာပိ၊ ဟောတိ အာပတ္တိ ဒုက္ကဋံ.
၁၈၄၆. အနာပတ္တိတ္တနော ဘတ္တံ၊ ပဒါပေတိ န ဒေတိ စေ၊
တထာ အညဿ ဘတ္တံ ဝါ၊ န ဒါပေတိ ပဒေတိ စေ.
၁၈၄၇. ယံ န ဒိန္နံ တံ ဒါပေတိ၊ န ဒိန္နံ ယတ္ထ ဝါပိ စ၊
တတ္ထ တမ္ပိ စ သဗ္ဗေသံ၊ သမံ ဒါပေတိ ဘိက္ခုနီ.
၁၈၄၈. ဝေါသာသန္တီ ဌိတာ သိက္ခ-မာနာ ဝါ သာမဏေရိကာ၊
ဘောဇနာနိ စ ပဉ္စေဝ၊ ဝိနာ၊ ဥမ္မတ္တကာဒိနော.
၁၈၄၉. ကထိနေန သမုဋ္ဌာနံ၊ သမာနန္တိ ပကာသိတံ၊
ကြိယာကြိယမိဒံ ဝုတ္တံ၊ တိစိတ္တဉ္စ တိဝေဒနံ.
ဒုတိယပါဋိဒေသနီယကထာ.
၁၈၅၀. သေက္ခန္တိ သမ္မတေ ဘိက္ခု၊ လဒ္ဓသမ္မုတိကေ ကုလေ၊
ဃရူပစာရောက္ကမနာ၊ ပုဗ္ဗေဝ အနိမန္တိတော.
၁၈၅၁. အဂိလာနော ဂဟေတွာ စေ၊ ပရိဘုဉ္ဇေယျ အာမိသံ၊
ဂဟဏေ ဒုက္ကဋံ ဘောဂေ၊ ပါဋိဒေသနိယံ သိယာ.
၁၈၅၂. ယာမကာလိကသတ္တာဟ-ကာလိကေ ယာဝဇီဝိကေ၊
ဂဟဏေ ပရိဘောဂေ စ၊ ဟောတိ အာပတ္တိ ဒုက္ကဋံ.
၁၈၅၃. အသေက္ခသမ္မတေ သေက္ခ-သမ္မတန္တိ စ သညိနော၊
တတ္ထ ဝေမတိကဿာပိ၊ တထေဝ ပရိဒီပိတံ.
၁၈၅၄. အနာပတ္တိ ဂိလာနဿ၊ ဂိလာနဿာဝသေသကေ၊
နိမန္တိတဿ ဝါ ဘိက္ခာ၊ အညေသံ တတ္ထ ဒီယတိ.
၁၈၅၅. ဃရတော နီဟရိတွာ ဝါ၊ ဒေန္တိ စေ ယတ္ထ ကတ္ထစိ၊
နိစ္စဘတ္တာဒိကေ ဝါပိ၊ တထာ ဥမ္မတ္တကာဒိနော.
၁၈၅၆. အနာဂတေ ဟိ ဘိက္ခုမှိ၊ ဃရတော ပဌမံ ပန၊
နီဟရိတွာ သစေ ဒွါရေ၊ သမ္ပတ္တေ ဒေန္တိ ဝဋ္ဋတိ.
၁၈၅၇. ဘိက္ခုံ ပန စ ဒိသွာဝ၊ နီဟရိတွာန ဂေဟတော၊
န ဝဋ္ဋတိ သစေ ဒေန္တိ၊ သမုဋ္ဌာနေဠကူပမံ.
တတိယပါဋိဒေသနီယကထာ.
၁၈၅၈. ဂဟဋ္ဌေနာဂဟဋ္ဌေန၊ ဣတ္ထိယာ ပုရိသေန ဝါ၊
အာရာမံ ဥပစာရံ ဝါ၊ ပဝိသိတွာ သစေ ပန.
၁၈၅၉. ‘‘ဣတ္ထန္နာမဿ တေ ဘတ္တံ၊ ယာဂု ဝါ အာဟရီယတိ’’၊
ဧဝမာရောစိတံ ဝုတ္တံ၊ ပဋိသံဝိဒိတန္တိ ဟိ.
၁၈၆၀. အာဟရီယတု တံ ပစ္ဆာ၊ ယထာရောစိတမေဝ ဝါ၊
တဿ ဝါ ပရိဝါရမ္ပိ၊ အညံ ကတွာ ဗဟုံ ပန.
၁၈၆၁. ယာဂုယာ ဝိဒိတံ ကတွာ၊ ပူဝံ ဘတ္တံ ဟရန္တိ စေ၊
ဣဒမ္ပိ ဝိဒိတံ ဝုတ္တံ၊ ဝဋ္ဋတီတိ ကုရုန္ဒိယံ.
၁၈၆၂. ကုလာနိ ပန အညာနိ၊ ဒေယျဓမ္မံ ပနတ္တနော၊
ဟရန္တိ တေန သဒ္ဓိံ စေ၊ သဗ္ဗံ ဝဋ္ဋတိ တမ္ပိ စ.
၁၈၆၃. အနာရောစိတမေဝံ ယံ၊ ယံ အာရာမမနာဘတံ၊
တံ အသံဝိဒိတံ နာမ၊ သဟဓမ္မိကဉာပိတံ.
၁၈၆၄. ယံ အသံဝိဒိတံ ကတွာ၊ အာဘတံ ပန တံ ဗဟိ၊
အာရာမံ ပန ပေသေတွာ၊ ကာရာပေတွာ တမာဟရေ.
၁၈၆၅. ဂန္တွာ ဝါ အန္တရာမဂ္ဂေ၊ ဂဟေတဗ္ဗံ တု ဘိက္ခုနာ၊
သစေ ဧဝမကတွာ တံ၊ အာရာမေ ဥပစာရတော.
၁၈၆၆. ဂဟေတွာဇ္ဈောဟရန္တဿ၊ ဂဟဏေ ဒုက္ကဋံ သိယာ၊
အဇ္ဈောဟာရပယောဂေသု၊ ပါဋိဒေသနိယံ မတံ.
၁၈၆၇. ပဋိသံဝိဒိတေယေဝ၊ အသံဝိဒိတသညိနော၊
တတ္ထ ဝေမတိကဿာပိ၊ ဟောတိ အာပတ္တိ ဒုက္ကဋံ.
၁၈၆၈. ပဋိသံဝိဒိတေ တဿ၊ ဂိလာနဿာဝသေသကေ၊
ဗဟာရာမေ ဂဟေတွာ ဝါ၊ အန္တောယေဝဿ ဘုဉ္ဇတော.
၁၈၆၉. တတ္ထဇာတဖလာဒီနိ၊ အနာပတ္တေဝ ခါဒတော၊
သမုဋ္ဌာနာဒယော သဗ္ဗေ၊ ကထိနေန သမာ မတာ.
စတုတ္ထပါဋိဒေသနီယကထာ.
ဣတိ ဝိနယဝိနိစ္ဆယေ ပါဋိဒေသနီယကထာ နိဋ္ဌိတာ.