၇. ပါဒုကဝဂ္ဂဝဏ္ဏနာ

၆၄၇. သတ္တမဝဂ္ဂေ ရုက္ခတော ပတိတောတိ ဧကံ ဩလမ္ဗနသာခံ ဂဟေတွာ ပတိတော. ပါဠိယာတိ အတ္တနော အာစာရပ္ပကာသကဂန္ထဿ. ဓီရတ္ထူတိ ဓီ အတ္ထု၊ နိန္ဒာ ဟောတူတိ အတ္ထော. ဝိနိပါတနဟေတုနာတိ ဝိနိပါတနဿ ဟေတုဘာဝေန. တွန္တိ ဥပယောဂတ္ထေ ပစ္စတ္တဝစနံ၊ တံ ဣစ္စေဝ ဝါ ပါဌော. အသ္မာတိ ပါသာဏော.

၆၄၉. န ကထေတဗ္ဗန္တိ ထေရေန အတ္တနော ကင်္ခါဋ္ဌာနဿ ပုစ္ဆိတတ္တာ ဝုတ္တံ. ဒဟရဿ အတ္ထကောသလ္လံ ဉာတုံ ပုစ္ဆိတေန ဥစ္စာသနေ နိသိန္နဿ အာစရိယဿ အနုယောဂဒါနနယေန ဝတ္တုံ ဝဋ္ဋတိ.

၆၅၂. ခေဠေန စေတ္ထ သိင်္ဃာဏိကာပိ သင်္ဂဟိတာတိ ဧတ္ထ ဥဒကဂဏ္ဍုသကံ ကတွာ ဥစ္ဆုကစဝရာဒိဉ္စ မုခေနေဝ ဟရိတုံ ဥဒကေသု ဆဍ္ဍေတုံ ဝဋ္ဋတီတိ ဒဋ္ဌဗ္ဗံ. သေသံ သဗ္ဗတ္ထ ဥတ္တာနမေဝ.

ပါဒုကဝဂ္ဂဝဏ္ဏနာ နိဋ္ဌိတာ.

သေခိယဝဏ္ဏနာနယော နိဋ္ဌိတော.

၆၅၅. အဓိကရဏသမထေသု စ ဣဓ ဝတ္တဗ္ဗံ နတ္ထိ.

ဣတိ သမန္တပါသာဒိကာယ ဝိနယဋ္ဌကထာယ ဝိမတိဝိနောဒနိယံ

ဘိက္ခုဝိဘင်္ဂဝဏ္ဏနာနယော နိဋ္ဌိတော.

နမော တဿ ဘဂဝတော အရဟတော သမ္မာသမ္ဗုဒ္ဓဿ