၃. ခမ္ဘကတဝဂ္ဂဝဏ္ဏနာ

၆၀၃. ပတ္တေ ဂဟဏသညာ အဿ အတ္ထီတိ ပတ္တသညီတိ ဣမမတ္ထံ ဒဿေတုံ ‘‘ပတ္တေ သညံ ကတွာ’’တိ ဝုတ္တံ.

၆၀၄. ဩလောဏီတိ ဧကာ ဗျဉ္ဇနဝိကတိ. ကဉ္ဇိကတက္ကာဒိရသောတိ ကေစိ. မံသရသာဒီနီတိ အာဒိ-သဒ္ဒေန အဝသေသာ သဗ္ဗာပိ ဗျဉ္ဇနဝိကတိ သင်္ဂဟိတာ.

၆၀၅. သမဘရိတန္တိ ရစိတံ. ဟေဋ္ဌာ ဩရောဟတီတိ သမန္တာ ဩကာသသမ္ဘဝတော ဟတ္ထေန သမံ ကရိယမာနံ ဟေဋ္ဌာ ဘဿတိ. ပတ္တမတ္ထကေ ဌပိတာနိ ပူဝါနိ ဧဝ ဝဋံသကာကာရေန ဌပိတတ္တာ ‘‘ပူဝဝဋံသက’’န္တိ ဝုတ္တာနိ. ကေစိ ပန ‘‘ပတ္တံ ဂဟေတွာ ထူပီကတံ ပိဏ္ဍပါတံ ရစိတွာ ဒိယျမာနမေဝ ဂဏှတော အာပတ္တိ၊ ဟတ္ထဂတေ ဧဝ ပန ပတ္တေ ဒိယျမာနေ ထူပီကတမ္ပိ ဂဟေတုံ ဝဋ္ဋတီ’’တိ ဝဒန္တိ၊ တံ န ဂဟေတဗ္ဗမေဝ ‘‘သမတိတ္တိက’’န္တိ ဘာဝနပုံသကဝသေန သာမညတော ဝုတ္တတ္တာ.

ခမ္ဘကတဝဂ္ဂဝဏ္ဏနာ နိဋ္ဌိတာ.