၁၂. ဒုဗ္ဗစသိက္ခာပဒဝဏ္ဏနာ

၄၂၄. ဒွါဒသမေ ဝမ္ဘနဝစနန္တိ ဂရဟဝစနံ. သဋ-သဒ္ဒေါ ပတိတသဒ္ဒေန သမာနတ္ထော၊ တဿ စ ဝိသေသနဿ ပရနိပါတောတိ အာဟ ‘‘တတ္ထ တတ္ထ ပတိတံ တိဏကဋ္ဌပဏ္ဏ’’န္တိ. ကေနာပီတိ ဝါတာဒိသဒိသေန ဥပဇ္ဈာယာဒိနာ.

၄၂၆. စိတ္တပရိယောနာဟော ဒဠှကောဓောဝ ဥပနာဟော. တတောပိ ဗလဝတရော ဒုမ္မောစနီယော ကောဓာဘိသင်္ဂေါ. စောဒကံ ပဋိပ္ဖရဏတာတိ စောဒကဿ ပဋိဝိရုဒ္ဓေါ ဟုတွာ အဝဋ္ဌာနံ. စောဒကံ အပသာဒနာတိ ဝါစာယ ဃဋ္ဋနာ. ပစ္စာရောပနာတိ ‘‘တွမ္ပိ သာပတ္တိကော’’တိ စောဒကဿ အာပတ္တိအာရောပနာ. ပဋိစရဏတာတိ ပဋိစ္ဆာဒနတာ. အပဒါနေနာတိ အတ္တနော စရိယာယ. န သမ္ပာယနတာတိ ‘‘ယံ တွံ စောဒကော ဝဒေသိ ‘မယာ ဧသ အာပတ္တိံ အာပန္နော ဒိဋ္ဌော’တိ၊ တွံ တသ္မိံ သမယေ ကိံ ကရောသိ၊ အယံ ကိံ ကရောတိ၊ ကတ္ထ စ တွံ အဟောသိ၊ ကတ္ထ အယ’’န္တိအာဒိနာ နယေန စရိယံ ပုဋ္ဌေန သမ္ပာဒေတွာ အကထနံ.

‘‘ယဿ သိယာ အာပတ္တီ’’တိ (မဟာဝ. ၁၃၄) ဣမိနာ နိဒါနဝစနေန သဗ္ဗာပိ အာပတ္တိယော သင်္ဂဟိတာတိ အာဟ ‘‘ယဿ သိယာ’’တိအာဒိ. အင်္ဂါနိ စေတ္ထ ပဌမသံဃဘေဒသဒိသာနိ၊ အယံ ပန ဝိသေသော ယထာ တတ္ထ ဘေဒါယ ပရက္ကမနံ၊ ဣဓ အဝစနီယကရဏတာ ဒဋ္ဌဗ္ဗာ.

ဒုဗ္ဗစသိက္ခာပဒဝဏ္ဏနာ နိဋ္ဌိတာ.