၄. စတုတ္ထပါရာဇိကံ

ဝဂ္ဂုမုဒါတီရိယဘိက္ခုဝတ္ထုဝဏ္ဏနာ

၁၉၃. အဓိဋ္ဌေမာတိ သံဝိဒဟာမ. ဣရိယာပထံ သဏ္ဌပေတွာတိ ပဓာနာနုရူပံ ကတွာ. အနာဂတသမ္ဗန္ဓေ ပန အသတီတိ ဘာသိတော ဘဝိဿတီတိ ပါဌသေသံ ကတွာ အနာဂတသမ္ဗန္ဓေ အသတိ. ဘာသိတောတိ အတီတဝစနံ ကထံ အနာဂတဝစနေန သမ္ဗန္ဓမုပဂစ္ဆတီတိ အာဟ လက္ခဏံ ပနာတိအာဒိ. ဤဒိသေ ဟိ ဌာနေ ဓာတုသမ္ဗန္ဓေ ပစ္စယာတိ ဣမိနာ လက္ခဏေန ဓာတွတ္ထသမ္ဗန္ဓေ သတိ အယထာကာလဝိဟိတာပိ ပစ္စယာ သာဓဝေါ ဘဝန္တီတိ သဒ္ဒသတ္ထဝိဒူ ဝဒန္တိ.

၁၉၄. ဝဏ္ဏဝါတိ ဣမိနာ အဘိနဝုပ္ပန္နဝဏ္ဏတာ ဝုတ္တာ. ပသန္နမုခဝဏ္ဏာတိ ဣမိနာ မုခဝဏ္ဏဿ အတိပဏီတတာ ဝုတ္တာ. ဝိပ္ပသန္နစ္ဆဝိဝဏ္ဏာတိ ဣမိနာ ပကတိသရီရဝဏ္ဏဿေဝ ယထာဝုတ္တနယေန ဝိပ္ပသန္နတာ ဝုတ္တာ. ယသ္မာ ဣန္ဒြိယာနံ ဥပါဒါရူပတ္တာ နိဿယဝသေနေဝ ပီဏနန္တိ အာဟ ‘‘အဘိနိဝိဋ္ဌောကာသဿ ပရိပုဏ္ဏတ္တာ’’တိ. ပဉ္စပ္ပသာဒါနံ ဝိယ ဟဒယရူပဿာပိ ပရိပုဏ္ဏတာ ဝုတ္တာယေဝါတိ အာဟ ‘‘မနစ္ဆဋ္ဌာနံ ဣန္ဒြိယာန’’န္တိ. ဥဒ္ဒေသံ ပရိပုစ္ဆံ အနုယုဉ္ဇန္တာ ဣမံ သရီရသောဘံ နေဝ ပါပုဏိံသူတိ သမ္ဗန္ဓော. ယထာ တန္တိ ဧတ္ထ တန္တိ နိပါတမတ္တံ. စတုစက္ကန္တိ ဧတ္ထ ပဝတ္တနဋ္ဌေန ဣရိယာပထောဝ စက္ကန္တိ ဝုတ္တော.

၁၉၅. ဥပလဗ္ဘန္တီတိ ဒိဿန္တိ၊ ဉာယန္တီတိ အတ္ထော. ပစန္တောတိ ပီဠေန္တော၊ ဂေဟာဒီနိ ဝါ သယံ ဍဟန္တော၊ အညေဟိ ဝါ ပါစေန္တော. ဥဒ္ဓတေတိ ဥဒ္ဓစ္စပကတိကေ. ဥန္နဠေတိ ဥဂ္ဂတနဠသဒိသေန ဥဂ္ဂတတုစ္ဆမာနေန သဟိတေ. စပလေတိ ပတ္တစီဝရမဏ္ဍနာဒိနာ စာပလ္လေန ယုတ္တေ. မုခရေတိ ခရဝစနေ. ပါကတိန္ဒြိယေတိ အသံဝုတတ္တာ ဂိဟိကာလေ ဝိယ ပကတိယံ ဌိတိန္ဒြိယေ. ဣရိယာပထသဏ္ဌပနာဒီနီတိ အာဒိ-သဒ္ဒေန ပစ္စယပဋိသေဝနသာမန္တဇပ္ပါနံ ဂဟဏံ ဝေဒိတဗ္ဗံ. ပရမသလ္လေခဝုတ္တီဟိ မဟာအရိယဝံသေဟိ ဘိက္ခူဟိ နိဝုတ္ထသေနာသနာနိ လောကသမ္မတသေနာသနာနိ နာမ. ပရိပါစေတုန္တိ ဝိမှာပနဝသေန ပရိဏာမေတုံ. ဘိက္ခာစာရေ အသမ္ပဇ္ဇမာနေတိ ဣဒံ ဇနပဒစာရိကံ စရန္တီတိ ဣမိနာ သမ္ဗန္ဓိတဗ္ဗံ၊ န ပန ပါဠိံ ဝါစေန္တောတိအာဒီဟိ၊ တာနိ ပန ပဒါနိ အတ္တနော နိရန္တရဝါသဋ္ဌာနေပိ ဇနပဒေသုပိ ကတ္တဗ္ဗကိစ္စဒဿနဝသေန ဝုတ္တာနိ၊ တာနိ စ တေ ဝတ္တသီသေန ကရောန္တိ၊ န လာဘနိမိတ္တံ၊ တေနာဟ တန္တီတိအာဒိ. ကိစ္ဆေနာတိ ဣမဿေဝ ဝေဝစနံ ကသိရေနာတိ. တဒုဘယမ္ပိ ပါရမီပူရဏဝါယာမံ သန္ဓာယ ဝုတ္တံ. သာဓာရဏပရိက္ခာရဘာဝေနာတိ သံဃိကပရိက္ခာရဘာဝေန. တထာဘာဝတော ထေနေတွာတိ အဝိဿဇ္ဇိယအဝေဘင်္ဂိယဘာဝတော ထေနေတွာ၊ န ဌာနာစာဝနဝသေနာတိ အဓိပ္ပါယော၊ တေနာဟ ‘‘ကုလဒူသကဒုက္ကဋံ အာပဇ္ဇတီ’’တိ. အသန္တန္တိ ဣမဿ အဘူတန္တိ ဣဒံ ကာရဏဝစနံ၊ အနုပ္ပန္နတ္တာ အဝိဇ္ဇမာနန္တိ အတ္ထော. ကိတဝဿေဝါတိ ကိတဝဿ သကုဏဂဟဏမိဝ. ကေရာဋိကဿာတိ သဌဿ. သမဏောတိ ဂေါတ္တမတ္တံ အနုဘောန္တိ ဓာရေန္တီတိ ဂေါတြဘုနော၊ နာမမတ္တသမဏာတိ အတ္ထော. ဒုဇ္ဇာနပရိစ္ဆေဒန္တိ အနန္တဒုက္ခတ္တာ ‘‘ဧတ္တကံ ဒုက္ခ’’န္တိ သင်္ချာဝသေန ပရိစ္ဆိန္ဒိတွာ ဉာတုံ သဗ္ဗညုတညာဏေနာပိ ဒုက္ကရံ၊ န ပန သရူပဝသေန ဉာတုံ ဗုဒ္ဓဉာဏဿ အဝိသယဘာဝါ.

အဓိမာနဝတ္ထုဝဏ္ဏနာ

၁၉၆. အရဟတ္တေတိ အဂ္ဂဖလေ. ဉာဏစက္ခုနာတိ ပစ္စဝေက္ခဏဉာဏသင်္ခါတေန စက္ခုနာ၊ အထ ဝါ ဖလစိတ္တသမ္ပယုတ္တေနေဝ ဉာဏစက္ခုနာ. အတ္တနာ သမ္ပယုတ္တေနာပိ ဟိ ဉာဏေန အသမ္မောဟတော သယံ ဒိဋ္ဌံ နာမ ဟောတိ၊ တထာ တသ္မိံ အဒိဋ္ဌေတိ အတ္ထော. သဗ္ဗေသံ ကိလေသာနံ ပဟာယကဝသေန အာဇာနာတိ၊ သမန္တတော သဗ္ဗေန ဝါ ပကာရေန ဇာနာတီတိ ‘‘အညာ’’တိ အဂ္ဂမဂ္ဂေါ ဝုစ္စတိ၊ တဒုပစာရေန ပန တပ္ဖလမ္ပီတိ အာဟ ‘‘အညံ ဗျာကရိံသူတိ အရဟတ္တံ ဗျာကရိံသူ’’တိ. အန္တရာ ဌပေတီတိ သေခဘူမိယံ အဓိမာနော ဌပေတိ. ကိလေသသမုဒါစာရံ အပဿန္တောတိ ပုရိမမဂ္ဂတ္တယဝဇ္ဈာနံယေဝ ကိလေသာနံ ဝသေန ဝုတ္တံ၊ န ဘဝရာဂါဒီနံ.

သဝိဘင်္ဂသိက္ခာပဒဝဏ္ဏနာ

၁၉၇. ပကတိမနုဿေဟိ ဥတ္တရိတရာနံ ဗုဒ္ဓါဒိဥတ္တမပုရိသာနံ အဓိဂမဓမ္မော ဥတ္တရိမနုဿဓမ္မောတိ အာဟ ဥတ္တရိမနုဿာနန္တိအာဒိ. ပါဠိယံ (ပါရာ. ၁၉၈) ‘‘အတ္ထိ စ မေ ဧတေ ဓမ္မာ မယီ’’တိ ဧတ္ထ မေတိ ဣဒံ ပဒပူရဏမတ္တံ. အဓိဂန္တဗ္ဗတော အဓိဂမသင်္ခါတဿ ဈာနာဒိနော ပုစ္ဆာ အဓိဂမပုစ္ဆာ၊ သာ စ ဈာနာဒီသု သာမညတော ပဝတ္တာတိ ဣဒါနိ တတ္ထ ပဌမဇ္ဈာနံ ဝါ ဒုတိယာဒီသု အညတရံ ဝါ တတ္ထာပိ ကသိဏာဒိအာရမ္မဏေသု ကတရမာရမ္မဏံ ဈာနံ ဝါ လောကုတ္တရေသု စ သောတာပတ္တိမဂ္ဂံ ဝါ သကဒါဂါမိမဂ္ဂါဒီသု အညတရံ ဝါ တတ္ထာပိ သုညတဝိမောက္ခံ ဝါ အပ္ပဏိဟိတဝိမောက္ခာဒီသု အညတရံ ဝါတိ ဧဝံ ပစ္စေကံ ဘေဒနိဒ္ဓါရဏဝသေန ပုစ္ဆနာကာရံ ဒဿေတုံ ပါဠိယံ (ပါရာ. ၁၉၈) ‘‘ပုန ကတမေသံ တွံ ဓမ္မာနံ လာဘီ’’တိ အယံ ပုစ္ဆာ ဒဿိတာတိ ဒဋ္ဌဗ္ဗာ၊ တေနာဟ ပဌမမဂ္ဂါဒီသူတိအာဒိ. ယာယ အနုက္ကမပဋိပတ္တိယာ လောကုတ္တရော အဓိဂမော အာဂစ္ဆတိ၊ သာ ပုဗ္ဗဘာဂပဋိပတ္တိ အာဂမနပဋိပဒါ. န သုဇ္ဈတီတိ ပုစ္ဆိယမာနော ပဋိပတ္တိက္ကမံ ဥလ္လင်္ဃိတွာ ကထေတိ. အပနေတဗ္ဗောတိ တယာ ဝုတ္တက္ကမေနာယံ န သက္ကာ အဓိဂန္တုန္တိ အဓိဂတမာနတော အပနေတဗ္ဗော. သန္နိဟိတေသု ကပ္ပိယေသုပိ စတူသု ပစ္စယေသု အလဂ္ဂတ္တာ ‘‘အာကာသေ ပါဏိသမေန စေတသာ’’တိ ဝုတ္တံ. ဝုတ္တသဒိသံ ဗျာကရဏံ ဟောတီတိ ယောဇနာ. ခီဏာသဝပဋိပတ္တိသဒိသာ ပဋိပဒါ ဟောတိ သုဝိက္ခမ္ဘိတကိလေသတ္တာ. ဣဒဉ္စ အရဟတ္တံ ပဋိဇာနန္တဿ ဝသေန ဝုတ္တံ၊ တေနာဟ ခီဏာသဝဿ နာမာတိအာဒိ. ဧဝံ သုဝိက္ခမ္ဘိတကိလေသဿ ဝတ္တနသေက္ခဓမ္မပဋိဇာနနံ ဣမိနာ ဘယုပ္ပါဒနေန၊ အမ္ဗိလာဒိဒဿနေ ခေဠုပ္ပါဒါဒိနာ စ န သက္ကာ ဝီမံသိတုံ၊ တသ္မာ တဿ ဝစနေနေဝ တံ သဒ္ဓါတဗ္ဗံ. အယံ ဘိက္ခု သမ္ပန္နဗျာကရဏောတိ ဣဒံ န ကေဝလံ အဘာယနကမေဝ သန္ဓာယ ဝုတ္တံ ဧကစ္စဿ သူရဇာတိကဿ ပုထုဇ္ဇနဿာပိ အဘာယနတော၊ ရဇ္ဇနီယာရမ္မဏာနံ ဗဒရသာဠဝါဒိအမ္ဗိလမဒ္ဒနာဒီနံ ဥပနယနေပိ ခေဠုပ္ပါဒါဒိတဏှာပဝတ္တရဟိတံ သဗ္ဗထာ သုသောဓိတမေဝ သန္ဓာယ ဝုတ္တန္တိ ဂဟေတဗ္ဗံ.

အသန္တဂုဏသမ္ဘာဝနလက္ခဏာ ပါပိစ္ဆာတိ အာဟ ယာ သာ ဣဓေကစ္စောတိအာဒိ. အာဒိ-သဒ္ဒေန အဿဒ္ဓေါတိအာဒိပါဌံ သင်္ဂဏှာတိ. သာမညံ ဒုပ္ပရာမဋ္ဌန္တိ သမဏဓမ္မသင်္ခါတံ သာမညံ ခဏ္ဍသီလာဒိတာယ ဒုပ္ပရာမဋ္ဌံ ဒုဋ္ဌု ဂဟိတံ နိရယာယ နိရယဒုက္ခာယ တံ ပုဂ္ဂလံ တတ္ထ နိရယေ ဥပကဍ္ဎတိ နိဗ္ဗတ္တာပေတီတိ အတ္ထော. သိထိလောတိ ဩလီယိတွာ ကရဏေန သိထိလဂါဟေန ကတော၊ သထေန ဝါ သာဌေယျေန အာဒိဏ္ဏော သိထိလော. ပရိဗ္ဗဇောတိ သမဏဘာဝေါ. ဘိယျောတိ ပုဗ္ဗေ ဝိဇ္ဇမာနာနံ ရာဂရဇာဒီနံ ဥပရိ အပရမ္ပိ ရဇံ အာကိရတီတိ အတ္ထော. ဘိက္ခုဘာဝေါတိ အဓမ္မိကပဋိညာမတ္တသိဒ္ဓေါ ဘိက္ခုဘာဝေါ. အဇာနမေဝါတိ ဧတ္ထ ဧဝ-သဒ္ဒေါ အဝဓာရဏေ အဇာနန္တော ဧဝါတိ၊ ‘‘အဇာနမေဝ’’န္တိပိ ပါဌော၊ တတ္ထ ပန ဧဝံ ဇာနာမိ ဧဝံ ပဿာမီတိ ယောဇေတဗ္ဗံ.

ပဒဘာဇနီယဝဏ္ဏနာ

၁၉၉. ဧဝန္တိ စ ပဌမဇ္ဈာနာဒိပရာမသနံ ပဌမဇ္ဈာနံ ဇာနာမိ ဒုတိယာဒိဈာနန္တိ. အသုဘဇ္ဈာနာဒီနီတိ အာဒိ-သဒ္ဒေန ကာယဂတာသတိဇ္ဈာနံ ကသိဏဇ္ဈာနံ ကသိဏမူလကာနိ အာရုပ္ပဇ္ဈာနာနိ စ သင်္ဂဏှာတိ. ဝိမောက္ခောတိ စတုဗ္ဗိဓော မဂ္ဂေါ၊ တဿ သဂုဏတော သုညတာဒိနာမံ ဒဿေန္တော အာဟ သော ပနာယန္တိအာဒိ. မဂ္ဂေါ ဟိ နာမ ပဉ္စဟိ ကာရဏေဟိ နာမံ လဘတိ သရသေန ဝါ ပစ္စနီကေန ဝါ သဂုဏေန ဝါ အာရမ္မဏေန ဝါ အာဂမနေန ဝါ. သစေ ဟိ သင်္ခါရုပေက္ခာ အနိစ္စတော သင်္ခါရေ သမ္မသိတွာ ဝုဋ္ဌာတိ၊ မဂ္ဂေါ အနိမိတ္တဝိမောက္ခေန ဝိမုစ္စတိ. သစေ ဒုက္ခတော သမ္မသိတွာ ဝုဋ္ဌာတိ၊ အပ္ပဏိဟိတဝိမောက္ခေန ဝိမုစ္စတိ. သစေ အနတ္တတော သမ္မသိတွာ ဝုဋ္ဌာတိ၊ သုညတဝိမောက္ခေန ဝိမုစ္စတိ၊ ဣဒံ သရသတော နာမံ နာမ. ယသ္မာ ပနေသ သင်္ခါရေသု အနိစ္စာနုပဿနာယ နိစ္စနိမိတ္တံ ပဇဟန္တော အာဂတော၊ တသ္မာ အနိမိတ္တော. ဒုက္ခာနုပဿနာယ သုခသညံ ပဏိဓိံ ပတ္ထနံ ပဟာယ အာဂတတ္တာ အပ္ပဏိဟိတော. အနတ္တာနုပဿနာယ အတ္တသညံ ပဟာယ အတ္တသုညတာဒဿနဝသေန သုညတာ ဟောတိ၊ ဣဒံ ပစ္စနီကတော နာမံ နာမ. ရာဂါဒီဟိ ပနေသ သုညတတ္တာ သုညတော၊ ရူပနိမိတ္တာဒီနံ၊ ရာဂနိမိတ္တာဒီနံ ဧဝ ဝါ အဘာဝေန အနိမိတ္တော၊ ရာဂပဏိဓိအာဒီနံ အဘာဝတော အပ္ပဏိဟိတောတိ ဝုစ္စတိ၊ ဣဒံ အဿ သဂုဏတော နာမံ. ရာဂါဒိသုညံ အနိမိတ္တံ အပ္ပဏိဟိတဉ္စ နိဗ္ဗာနံ အာရမ္မဏံ ကရောတီတိ သုညတော အနိမိတ္တော အပ္ပဏိဟိတောတိ ဝုစ္စတိ၊ ဣဒမဿ အာရမ္မဏတော နာမံ. အာဂမနံ ပန ဒုဝိဓံ ဝိပဿနာဂမနံ မဂ္ဂါဂမနဉ္စ. တတ္ထ မဂ္ဂေ ဝိပဿနာဂမနမေဝ၊ ဖလေ ပန မဂ္ဂါနန္တရေ မဂ္ဂါဂမနံ၊ ဖလသမာပတ္တိယံ ဝိပဿနာဂမနမ္ပိ. အနတ္တာနုပဿနာဝသေန မဂ္ဂေါ သုညတော အနိစ္စဒုက္ခာနုပဿနာဟိ အနိမိတ္တော အပ္ပဏိဟိတောတိ ဧဝံ ဝိပဿနာ အတ္တနော နာမံ မဂ္ဂဿ ဒေတိ၊ မဂ္ဂေါ ဖလဿာတိ ဣဒံ အာဂမနတော နာမံ.

သုညတ္တာတိ ဝိဝိတ္တတ္တာ. ရာဂါဒယောဝ ပတိဋ္ဌာနဋ္ဌေန ပဏိဓီတိ အာဟ ‘‘ရာဂဒေါသမောဟပဏိဓီန’’န္တိ. ဣမိဿာ ဝိဇ္ဇာယာတိ ဒိဗ္ဗစက္ခုဝိဇ္ဇာယာတိအာဒိနာ ဧကေကဝိဇ္ဇံ သန္ဓာယ ဝဒန္တိ. ဧဝံ ဧကိဿာပိ နာမံ အဂ္ဂဟေတွာပိ တာ ဧဝ သန္ဓာယ ‘‘ဝိဇ္ဇာနံ လာဘိမှီ’’တိ ဘဏန္တောပိ ပါရာဇိကော ဟောတီတိ သင်္ခေပဋ္ဌကထာယံ အဓိပ္ပါယော. ဝတ္ထုဝိဇ္ဇာဒီနိ ပန သန္ဓာယ ဝဒန္တော န ဟောတိ. ဧကေကကောဋ္ဌာသဝသေနာတိ မဟာအဋ္ဌကထာယံ ဝုတ္တနယေန လောကုတ္တရဝိသေသံ အကတွာ ကေဝလံ ‘‘သတိပဋ္ဌာနာနံ လာဘီ’’တိ ဧကေကကောဋ္ဌာသဝသေနာတိ အဓိပ္ပါယော. တတ္ထာတိ တေသု ကောဋ္ဌာသေသု. ကိလေသာနံ ပဟာနံ နာမ အဘာဝမတ္တမ္ပိ လောကုတ္တရကိစ္စတ္တာ လောကုတ္တရန္တိ သမတ္ထေတုံ တံ ပနာတိအာဒိ ဝုတ္တံ. ရာဂါ စိတ္တံ ဝိနီဝရဏတာတိ ရာဂတော စိတ္တဿ ဝိနီဝရဏတာ၊ တတော ရာဂတော ဝိမုတ္တတ္တာ ဧဝ ဝီတရာဂနီဝရဏတာတိ အတ္ထော၊ ယာ စ ပဉ္စ ဝိဇ္ဇာတိ ယောဇေတဗ္ဗံ. န အာဂတာတိ ဣဓ ပဒဘာဇနေ ‘‘ဉာဏန္တိ တိဿော ဝိဇ္ဇာ’’တိ (ပါရာ. ၁၉၉) ဝုတ္တတ္တာ သေသာ ပဉ္စ ဝိဇ္ဇာ န အာဂတာတိ အတ္ထော. နိဗ္ဗတ္တိတလောကုတ္တရတ္တာတိ လောကိယဓမ္မသာဓာရဏသင်္ခတဿာပိ အဘာဝါ လောကိယေဟိ သဗ္ဗထာ အသမ္မိဿလောကုတ္တရတ္တာ. အညန္တိ သင်္ခေပဋ္ဌကထာဒိံ ဝဒန္တိ၊ တမ္ပိ တတ္ထေဝ ပဋိက္ခိတ္တန္တိ သမ္ဗန္ဓော.

၂၀၀. ပုန အာနေတွာ ပဌမဇ္ဈာနာဒီဟိ န ယောဇိတန္တိ ဧတ္ထ ‘‘ပဌမဇ္ဈာနေနာတိ ပါဌော’’တိ ကေစိ ဝဒန္တိ၊ တံ ယုတ္တမေဝ အာဒိ-သဒ္ဒေန ဂဟေတဗ္ဗဿ ဈာနဿ အဘာဝါ. ပဌမဇ္ဈာနမူလကဉှိ ဧကမေဝ ခဏ္ဍစက္ကံ. ကတ္တုသာဓနောပိ ဘဏိတ-သဒ္ဒေါ ဟောတီတိ အာဟ အထ ဝါတိအာဒိ. ယေန စိတ္တေန မုသာ ဘဏတိ၊ တေနေဝ စိတ္တေန န သက္ကာ ‘‘မုသာ ဘဏာမီ’’တိ ဇာနိတုံ၊ အန္တရန္တရာ ပန အညာဟိ မနောဒွါရဝီထီဟိ ‘‘မုသာ ဘဏာမီ’’တိ ဇာနာတီတိ ဝုတ္တံ ‘‘ဘဏန္တဿ ဟောတိ မုသာ ဘဏာမီ’’တိ. အယမေတ္ထ အတ္ထော ဒဿိတောတိ တီဟိ အင်္ဂေဟိ သမန္နာဂတော မုသာဝါဒေါတိ အယမတ္ထော ဒဿိတော. ဒဝါတိ သဟသာ. ရဝါတိ အညံ ဝတ္တုကာမဿ ခလိတွာ အညဘဏနံ. တံ ဇာနာတီတိ တံဉာဏံ၊ တဿ ဘာဝေါ တံဉာဏတာ၊ ဉာဏဿ ဝိသယဝိသယီဘာဝေန အတ္တသံဝေဒနန္တိ အတ္ထော. ဉာဏသမောဓာနန္တိ ဗဟူနံ ဉာဏာနံ ဧကသ္မိံ ခဏေ သမောဓာနံ၊ သဟုပ္ပတ္တီတိ အတ္ထော. ယေန စိတ္တေန ‘‘မုသာ ဘဏိဿ’’န္တိ ဇာနာတီတိ ဣဒံ ပုဗ္ဗဘာဂစေတနဉ္စ သန္နိဋ္ဌာနစေတနဉ္စ ဧကတော ကတွာ ဝုတ္တံ. ယေန စိတ္တေန ပုဗ္ဗဘာဂစေတနာဘူတေန သန္နိဋ္ဌာနစေတနာဘူတေန စ ဝိသံဝါဒိတဗ္ဗသတ္တသင်္ခါရေ ဇာနာတိ၊ ယေန စိတ္တေန မုသာ ဘဏိဿန္တိ အတ္ထော. တေနေဝ။ပေ။ ပရိစ္စဇိတဗ္ဗာတိ တေနေဝ စိတ္တေန ‘‘ဧဝံ အဟံ မုသာ ဘဏာမီ’’တိ ဝါ ‘‘ဘဏိတ’’န္တိ ဝါ တဒေဝ မုသာဝါဒစိတ္တမာရမ္မဏံ ကတွာ ဘိက္ခု ဇာနာတီတိ ဧဝံ ပုဗ္ဗာပရသန္နိဋ္ဌာနစေတနာက္ခဏေသု တီသု ဧကေနေဝ စိတ္တေန ဉာဏဝိသယဉ္စ ဉာဏဉ္စာတိ ဥဘယမ္ပိ ဧကက္ခဏေ ပုဂ္ဂလော ဇာနာတီတိ အယံ တံဉာဏတာ ပရိစ္စဇိတဗ္ဗာ ဝိသယဿေဝ တဒါ ပကာသနတောတိ အဓိပ္ပါယော၊ တေနာဟ န ဟီတိအာဒိ. ယဒိ ဉာဏဿ အတ္တနော သရူပံ န ဉာယတိ၊ ကထံ ပစ္ဆိမံ စိတ္တံ ဇာနာတီတိ အာဟ ပုရိမံ ပုရိမန္တိအာဒိ. တတ္ထ ဘဏိဿာမီတိအာဒိနာ တီသု ကာလေသု ဥပ္ပန္နံ ပုရိမပုရိမစိတ္တံ အတ္တာနံ ဝိသယံ ကတွာ ဥပ္ပဇ္ဇမာနဿ ပစ္ဆိမဿ ပစ္ဆိမဿ စိတ္တဿ တထာ ဥပ္ပတ္တိယာ ပစ္စယော ဟောတီတိ အတ္ထော. တေနာတိ ယေန ကာရဏေန တီသု ခဏေသု စိတ္တာနိ တဒညေဟေဝ စိတ္တေဟိ ဇာနိတဗ္ဗာနိ၊ တာနိ စ ပုရိမပုရိမစိတ္တေနေဝ အဝဿံ ဥပ္ပဇ္ဇန္တိ၊ တေန ကာရဏေနာတိ အတ္ထော. တသ္မိံ သတီတိ ဘဏိဿာမီတိ ပုဗ္ဗဘာဂေ သတိ. သေသဒွယန္တိ ဘဏာမိ၊ ဘဏိတန္တိ ဣဒံ ဒွယံ န ဟေဿတီတိ ဧတံ နတ္ထီတိ ယောဇနာ ဟောတိယေဝါတိ အတ္ထော. ဧကံ ဝိယ ပကာသတီတိ ဘိန္နက္ခဏာနမ္ပိ နိရန္တရုပ္ပတ္တိယာ ‘‘တဒေဝေဒ’’န္တိ ဂဟေတဗ္ဗတံ သန္ဓာယ ဝဒတိ.

ဗလဝဓမ္မဝိနိဓာနဝသေနာတိ ဗလဝဂါဟဿ ဝိနိဓာနဝသေန. ဒုဗ္ဗလဒုဗ္ဗလာနန္တိ ဒုဗ္ဗလဒုဗ္ဗလာနံ ဂါဟာနံ. သကဘာဝပရိစ္စဇနဝသေနာတိ အတ္တနော သန္တကဘာဝဿ ပရိစ္စဇနဝသေန.

၂၀၇. ဥတ္တာသိတတ္တာတိ ဘယံ ဇနေတွာ ဝိယ ပလာပိတတ္တာ. ဧဝံ ပလာပိတော န ပုန တံ ဌာနံ အာဂစ္ဆတီတိ အာဟ ‘‘ပုန အနလ္လီယနဘာဝဒဿနဝသေနာ’’တိ. ခေဋ-သဒ္ဒံ သဒ္ဒတ္ထဝိဒူ ဥတ္တာသတ္ထေ ပဌန္တီတိ အာဟ သွာယမတ္ထောတိအာဒိ. အဏု ဧဝ အဏုသဟဂတံ၊ အဏုတ္တေန ဝါ ယုတ္တန္တိ အတ္ထော.

ဝတ္တုကာမဝါရကထာဝဏ္ဏနာ

၂၁၅. ကေဝလဉှိယန္တိ ကေဝလဉှိ အယံ ဝါရောတိ အဇ္ဈာဟရိတဗ္ဗံ. တင်္ခဏညေဝ ဇာနာတီတိ ပကတိယာ ဝစနာနန္တရံ ဝိဇာနနံ သန္ဓာယ ဝုတ္တံ. ဧဝံ ပန ဝစီဘေဒံ အကတွာ ‘‘ယော ဣမမှာ အာဝါသာ ပဌမံ ပက္ကမိဿတိ၊ နံ မယံ ‘အရဟာ’တိ ဇာနိဿာမာ’’တိ ဧဝံ ကတသင်္ကေတာ ဝိဟာရာ ပဌမံ ပက္ကမနေန တသ္မိံ ခဏေ အဝီတိဝတ္တေပိ နိက္ခန္တမတ္တေပိ ပါရာဇိကံ အညတရော ဘိက္ခု ‘‘မံ ‘အရဟာ’တိ ဇာနန္တူ’’တိ တမှာ အာဝါသာ ပဌမံ ပက္ကာမီတိ အာဂတဝတ္ထုမှိ (ပါရာ. ၂၂၇) ဝိယ. ဝိညတ္တိပထေတိ ကာယဝစီဝိညတ္တီနံ ဂဟဏယောဂ္ဂေ ပဒေသေ၊ တေန ဝိညတ္တိပထံ အတိက္ကမိတွာ ဌိတော ကောစိ ဒိဗ္ဗေန စက္ခုနာ ကာယဝိကာရံ ဒိသွာ ဒိဗ္ဗာယ သောတဓာတုယာ ဝစီဘေဒဉ္စ သုတွာ ဇာနာတိ၊ န ပါရာဇိကန္တိ ဒီပေတိ. ပါဠိယံ ‘‘ပဋိဝိဇာနန္တဿ အာပတ္တိ ပါရာဇိကဿာ’’တိ (ပါရာ. ၂၁၅) ဣမသ္မိံ ပဋိဝိဇာနနဝါရေ ယသ္မိံ အက္ခရေ ဝါ ဥစ္စာရိတေ ကာယပ္ပယောဂေ ဝါ ကတေယေဝ အယံ ပဌမဇ္ဈာနံ သမာပန္နောတိအာဒိအတ္ထံ ပရော ဝိဇာနာတိ၊ တတော ပုရိမေသု အက္ခရုစ္စာရဏာဒိပ္ပယောဂေသု ထုလ္လစ္စယံ အာပဇ္ဇိတွာ ပစ္ဆိမေဝ ပဋိဝိဇာနနပယောဂက္ခဏေ ပါရာဇိကံ အာပဇ္ဇတီတိ ဝေဒိတဗ္ဗံ ထုလ္လစ္စယဿေဝေတ္ထ သာမန္တတ္တာ၊ တေနေဝ ဗုဒ္ဓဒတ္တာစရိယေန –

‘‘ဒုက္ကဋံ ပဌမဿေဝ၊ သာမန္တမိတိ ဝဏ္ဏိတံ၊

သေသာနံ ပန တိဏ္ဏမ္ပိ၊ ထုလ္လစ္စယမုဒီရိတ’’န္တိ –

ဝုတ္တံ၊ အယဉ္စတ္ထော ‘‘န ပဋိဝိဇာနန္တဿ အာပတ္တိ ထုလ္လစ္စယဿာ’’တိ ဣမိနာ သုတ္တေန သင်္ဂဟိတောတိ ဒဋ္ဌဗ္ဗော. ဥဂ္ဂဟပရိပုစ္ဆာဒိဝသေနာတိအာဒိနာ ဈာနသမာဓိအာဒိသဒ္ဒါနမတ္ထေသု ပုဗ္ဗေ အကတပရိစယတ္တာ သုတွာ ‘‘အတ္ထံ ဤဒိသ’’န္တိ အဇာနိတွာ ကေဝလံ ‘‘ဝိသိဋ္ဌော ကောစိ သမဏဂုဏော အနေန လဒ္ဓေါ’’တိ ပရေန ဉာတေပိ ပါရာဇိကမေဝါတိ ဒဿေတိ.

အနာပတ္တိဘေဒကထာဝဏ္ဏနာ

၂၂၀. အနုလ္လပနာဓိပ္ပါယဿာတိ ‘‘ဧဝံ ဝုတ္တေ ဥတ္တရိမနုဿဓမ္မော မယာ ပကာသိတော ဟောတီ’’တိ အမနသိကတွာ ‘‘နာဟံ၊ အာဝုသော၊ မစ္စုနော ဘာယာမီ’’တိအာဒိကံ ကထေန္တဿ. ဧဝံ ကထေန္တော စ ဝေါဟာရတော အညံ ဗျာကရောန္တော နာမ ဟောတီတိ ဝုတ္တံ ‘‘အညံ ဗျာကရောန္တဿာ’’တိ. ဘာယန္တောတိ ‘‘ဉတွာ ဂရဟန္တိ နု ခေါ’’တိ ဘာယန္တော.

ပဒဘာဇနီယဝဏ္ဏနာနယော နိဋ္ဌိတော.

ဝိနီတဝတ္ထုဝဏ္ဏနာ

၂၂၃. သေက္ခဘူမိယန္တိ ဣမိနာ ဈာနဘူမိမ္ပိ သင်္ဂဏှာတိ. တိဏ္ဏံ ဝိဝေကာနန္တိ ကာယစိတ္တဥပဓိဝိဝေကာနံ. ပိဏ္ဍာယ စရဏဿ ဘောဇနပရိယောသာနတာယ ဝုတ္တံ ‘‘ယာဝ ဘောဇနပအယောသာန’’န္တိ. အန္တရဃရေ ဘုတွာ အာဂစ္ဆန္တဿာပိ ဝုတ္တနယေနေဝ သမ္ဘာဝနိစ္ဆာယ စီဝရသဏ္ဌာပနာဒီနိ ကရောန္တဿ ဒုက္ကဋမေဝ၊ ပါဠိယံ ပန ဒုက္ကရာဒိဝတ္ထူသု ‘‘အနာပတ္တိ အနုလ္လပနာဓိပ္ပါယဿာ’’တိ ဣဒံ ထုလ္လစ္စယေနာပိ အနာပတ္တိဒဿနတ္ထံ ဝုတ္တံ. ဥလ္လပနာဓိပ္ပါယဿာပိ ဟိ ‘‘နာဝုသော၊ ဒုက္ကရံ အညံ ဗျာကာတု’’န္တိ ဝုတ္တေ ထုလ္လစ္စယမေဝ အတ္တုပနာယိကတ္တာဘာဝတောတိ ဒဋ္ဌဗ္ဗံ.

၂၂၇. န ဒါနာဟံ တတ္ထ ဂမိဿာမီတိ ပုန တတ္ထ ဝသိတဋ္ဌာနေ န ဂမိဿာမိ၊ ဧဝံ သတိ ပဌမံ ဂတော အယံ ပုန စ နာဂတော၊ တသ္မာ အရဟာတိ မညိဿန္တီတိ အဓိပ္ပါယော. တံ ဌာနန္တိ အာဝါသံ ဝါတိအာဒိနာ ပုဗ္ဗေ ပရိစ္ဆိန္နဋ္ဌာနံ. ပဒသာ ဂမနံ သန္ဓာယ ကတိကာယ ကတတ္တာ ယာနေနာတိအာဒိ ဝုတ္တံ. ဝိဇ္ဇာမယိဒ္ဓိံ သန္ဓာယ ‘‘ဣဒ္ဓိယာ’’တိ ဝုတ္တံ ဥလ္လပနာဓိပ္ပါယဿ အဘိညိဒ္ဓိယာ အသမ္ဘဝတော. အညမညံ ရက္ခန္တီတိ ဥလ္လပနာဓိပ္ပါယေ သတိပိ ဧကဿာပိ ပဌမဂမနာဘာဝါ ရက္ခန္တိ. သစေ ပန ကတိကံ ကတွာ နိသိန္နေသု ဧကံ ဒွေ ဌပေတွာ အဝသေသာ ဥလ္လပနာဓိပ္ပါယေန ဧကတော ဂစ္ဆန္တိ၊ ဂတာနံ သဗ္ဗေသံ ပါရာဇိကမေဝ. တေသု ယဿ ဥလ္လပနာဓိပ္ပါယော နတ္ထိ၊ တဿ အနာပတ္တိ. ဧတန္တိ ဟေဋ္ဌာ ဝုတ္တံ သဗ္ဗံ ကတိကဝတ္တံ. နာနာဝေရဇ္ဇကာတိ နာနာဇနပဒဝါသိနော. သံဃလာဘောတိ ယထာဝုဍ္ဎံ ပါပုဏနကကောဋ္ဌာသော. အယဉ္စ ပဋိက္ခေပေါ အဝိသေသေတွာ ကရဏံ သန္ဓာယ ကတော၊ ဝိသေသေတွာ ပန ‘‘ဧတ္တကော အသုကဿာ’’တိ ပရိစ္ဆိန္ဒိတွာ အပလောကေတွာ ဒါတုံ ဝဋ္ဋတိ.

၂၂၈. ဓမ္မဓာတူတိ သဗ္ဗညုတညာဏံ၊ ဓမ္မာနံ သဘာဝေါ ဝါ. ဥပပတ္တီတိ အတ္တဘာဝံ သန္ဓာယ ဝဒတိ. ဒုဿဒ္ဓါပယာ ဟောန္တီတိ ပုထုဇ္ဇနေ သန္ဓာယ ဝုတ္တံ၊ န လက္ခဏတ္ထေရာဒိကေ အရိယပုဂ္ဂလေ. ဝိတုဍေန္တီတိ ဝိနိဝိဇ္ဈိတွာ ဍေန္တိ ဂစ္ဆန္တိ၊ ဖာသုဠန္တရိကာယော ဆိဒ္ဒါဝဆိဒ္ဒံ ကတွာ တာဟိ ဂစ္ဆန္တီတိ နိဿက္ကဝသေန အတ္ထော. ဝိတုဒေန္တီတိ ပါဌေ ဖာသုဠန္တရိကာဟီတိ အာဓာရတ္ထေ နိဿက္ကဝစနံ. လောဟတုဏ္ဍေဟီတိ ကာဠလောဟမယေဟိ တုဏ္ဍေဟိ. အစ္ဆရိယံ ဝတာတိ ဂရဟိတဗ္ဗတာယ အစ္ဆရံ ပဟရိတုံ ယုတ္တရူပံ. စက္ခုဘူတာတိ လောကဿ စက္ခု ဝိယ ဘူတာ သဉ္ဇာတာ၊ စက္ခုသဒိသာတိပိ အတ္ထော. တဿေဝ ကမ္မဿာတိ ယေန ဂေါဃာတကကမ္မေနေဝ နိရယေ နိဗ္ဗတ္တော၊ တဿေဝါတိ အတ္ထေ ဂယှမာနေ ဧကာယ စေတနာယ ဗဟုပဋိသန္ဓိယော ဟောန္တီတိ အာပဇ္ဇတိ၊ န စေတံ ယုတ္တံ ဧကဿ အမ္ဗာဒိဗီဇဿ အနေကင်္ကုရုပ္ပတ္တိ ဝိယာတိ တံ ပရိဟရန္တော အာဟ တဿ နာနာစေတနာဟိ အာယူဟိတဿာတိအာဒိ၊ တေန ဂေါဃာတကကမ္မက္ခဏေ ပုဗ္ဗစေတနာ အပရစေတနာ သန္နိဋ္ဌာပကစေတနာတိ ဧကသ္မိမ္ပိ ပါဏာတိပါတေ ဗဟူ စေတနာ ဟောန္တိ၊ နာနာပါဏာတိပါတေသု ဝတ္တဗ္ဗမေဝ နတ္ထိ. တတ္ထ ဧကာယ စေတနာယ နရကေ ပစိတွာ တဒညစေတနာသု ဧကာယ အပရာပရိယစေတနာယ ဣမသ္မိံ ပေတတ္တဘာဝေ နိဗ္ဗတ္တောတိ ဒဿေတိ၊ တေနာဟ ‘‘အဝသေသကမ္မံ ဝါ ကမ္မနိမိတ္တံ ဝါ’’တိ. ဧတ္ထ စ ကမ္မသရိက္ခဝိပါကုပ္ပတ္တိံ သန္ဓာယ ကမ္မကမ္မနိမိတ္တာနမေဝ ဂဟဏံ ကတံ၊ န ဂတိနိမိတ္တဿ၊ တေနာဟ ‘‘အဋ္ဌိရာသိယေဝ နိမိတ္တံ အဟောသီ’’တိ. ပါဠိယံ ဝိတစ္ဆေန္တီတိ တုဏ္ဍေဟိ တစ္ဆေန္တော ဝိယ လုဉ္စန္တိ. ဝိရာဇေန္တီတိ ဝိလိခန္တိ.

၂၂၉. ဝလ္လူရဝိက္ကယေနာတိ သုက္ခာပိတမံသဝိက္ကယေန. နိပ္ပက္ခစမ္မေတိ ဝိဂတပက္ခလောမစမ္မေ. ဧကံ မိဂန္တိ ဒီပကမိဂံ. ကာရဏာဟီတိ ဃာတနာဟိ. ဉတွာတိ ကမ္မဋ္ဌာနံ ဉတွာ.

၂၃၀. မင်္ဂနဝသေန ဥလတီတိ မင်္ဂုလိ၊ ဝိရူပဗီဘစ္ဆဘာဝေန ပဝတ္တတီတိ အတ္ထော. စိတ္တကေဠိန္တိ စိတ္တရုစိယံ အနာစာရကီဠံ.

၂၃၁. နိဿေဝါလပဏကကဒ္ဒမောတိ တိလဗီဇကာဒိသေဝါလေန နီလမဏ္ဍူကပိဋ္ဌိဝဏ္ဏေန ဥဒကပိဋ္ဌေ ဥဒကံ နီလဝဏ္ဏံ ကုရုမာနေန ပဏကေန ကဒ္ဒမေန စ ဝိရဟိတော. ဥဏှဘာဝေန တပနတော တပံ ဥဒကံ အဿာတိ တပေါဒကာတိ ဝတ္တဗ္ဗေ က-ကာရလောပံ ကတွာ ‘‘တပေါဒါ’’တိ ဝုစ္စတိ. ပေတလောကောတိ ပကဋ္ဌေန အကုသလကမ္မေန သုဂတိတော ဒုဂ္ဂတိံ ဣတာနံ ဂတာနံ လောကော သမူဟော၊ နိဝါသဋ္ဌာနံ ဝါ. ကတဟတ္ထာတိ ဓနုသိပ္ပေ သုဋ္ဌု သိက္ခိတဟတ္ထာ၊ အဝိရဇ္ဈနလက္ခဝေဓာတိ အတ္ထော. သိပ္ပဒဿနဝသေန ရာဇကုလာဒီသု ရာဇသမူဟံ ဥပေစ္စ ကတံ အသနံ သရက္ခေပေါ ဧတေသန္တိ ကတုပါသနာ၊ သဗ္ဗတ္ထ ဒဿိတသိပ္ပါတိ အတ္ထော. ပဘဂ္ဂေါတိ ပဘဉ္ဇိတော၊ ပရာဇိတောတိ အတ္ထော.

၂၃၂. အာနေဉ္ဇသမာဓိန္တိ အရူပသမာပတ္တိယံ နိရုဒ္ဓေ သတိပိ သဒ္ဒကဏ္ဋကေန ဥဋ္ဌာနာရဟော ရူပါဝစရသမာဓိယေဝ ဣဓ ဝတ္တဗ္ဗောတိ အာဟ အနေဇံ အစလန္တိအာဒိ. သမာဓိပရိပန္ထကေတိ ဝိတက္ကာဒိကေ သန္ဓာယ ဝဒတိ၊ ဣဒံ ပန ပဌမဗောဓိယံ ဥပ္ပန္နမ္ပိ ဝတ္ထုံ အနာစာရမတ္တဝသေန ဘိက္ခူဟိ စောဒိတေပိ ဘဂဝတာ ‘‘အနာပတ္တိ၊ ဘိက္ခဝေ၊ မောဂ္ဂလ္လာနဿာ’’တိ (ပါရာ. ၂၂၈) ဧဝံ အာယတိံ အတ္တနာ ပညပိယမာနပါရာဇိကာနုဂုဏံ တဒါ ဧဝ ဝိနီတန္တိ ဓမ္မသင်္ဂါဟကတ္ထေရေဟိ ပစ္ဆာ ပညတ္တဿ ဣမဿ သိက္ခာပဒဿ ဝိနီတဝတ္ထုဘာဝေန သင်္ဂဟမာရောပိတန္တိ ဒဋ္ဌဗ္ဗံ. သာဝကာနံ ဥပ္ပဋိပါဋိယာ အနုဿရဏာဘာဝံ ဒဿေတုံ ‘‘န ဥပ္ပဋိပါဋိယာ’’တိ ဝုတ္တံ. ဒုက္ကရံ ကတန္တိ အနန္တရေ ပဉ္စကပ္ပသတိကေ ကာလေ ဝိညာဏသန္တတိံ အဒိသွာပိ အသမ္မုယှိတွာ ပရတော တတိယတ္တဘာဝေ ဒိဋ္ဌစုတိစိတ္တေန သဒ္ဓိံ ဝတ္တမာနဘဝပဋိသန္ဓိယာ အနုမာနေနာပိ ကာရိယကာရဏာဘာဝဂဟဏံ နာမ သာဝကာနံ ဒုက္ကရတ္တာ ဝုတ္တံ. ပဋိဝိဒ္ဓါတိ ပဋိဝိဒ္ဓသဒိသာ. ယထာ နာမ သတ္တဓာ ဖာလိတဿ စာမရဝါလလောမဿ ဧကာယ အဂ္ဂကောဋိယာ အပရဿ ဝါလလောမံသုနော ကောဋိံ ဒူရေ ဌတွာ ဝိဇ္ဈေယျ အာဝုနန္တော ဝိယ ပဋိပါဒေယျ၊ ဧဝမေဝ ဣမိနာပိ ဒုက္ကရံ ကတန္တိ ဝုတ္တံ ဟောတိ. ဧတဒဂ္ဂန္တိ ဧသော အဂ္ဂေါ. ယဒိဒန္တိ ယော အယံ.

နိဂမနဝဏ္ဏနာ

၂၃၃. ဣဓာတိ ဘိက္ခုဝိဘင်္ဂေ. ဥဒ္ဒိဋ္ဌပါရာဇိကပရိဒီပနန္တိ သိက္ခာပဒေသု ပါတိမောက္ခုဒ္ဒေသဝသေန ဥဒ္ဒိဋ္ဌပါရာဇိကပရိဒီပနံ၊ န ပန သဗ္ဗသ္မိံ ပါရာဇိကဝိဘင်္ဂေ အာဂတအာပတ္တိပရိဒီပနံ တတ္ထ ထုလ္လစ္စယာဒီနမ္ပိ အာဂတတ္တာ တေနေဝ ဥဒ္ဒိဋ္ဌ-သဒ္ဒေန ဝုတ္တဝိဘင်္ဂဿ နိဒ္ဒေသတ္တာ. ဘိက္ခုနီနံ အသာဓာရဏာနိ စတ္တာရီတိ ဥဗ္ဘဇာဏုမဏ္ဍလိကာ (ပါစိ. ၆၅၈) ဝဇ္ဇပ္ပဋိစ္ဆာဒိကာ (ပါစိ. ၆၆၅) ဥက္ခိတ္တာနုဝတ္တိကာ (ပါစိ. ၆၆၉) အဋ္ဌဝတ္ထုကာတိ (ပါစိ. ၆၇၅) ဣမာနိ ဘိက္ခူဟိ အသာဓာရဏာနိ ဘိက္ခုနီနံ ဧဝ ပညတ္တာနိ ပါရာဇိကာနီတိ အတ္ထော. ဝတ္ထုဝိပန္နာတိ ပဗ္ဗဇ္ဇုပသမ္ပဒါနံ ဝတ္ထုဘာဝေါ ဝတ္ထု နာမ၊ တေန ဝတ္ထုမတ္တေန ဝိပန္နာ၊ ဝိပန္နဝတ္ထုကာတိ အတ္ထော. အဟေတုကပဋိသန္ဓိကာတိ မဂ္ဂါနုပ္ပတ္တိကာရဏမာဟ. ကိဉ္စာပိ ဒုဟေတုကာနမ္ပိ မဂ္ဂေါ နုပ္ပဇ္ဇတိ၊ တေ ပန ပဗ္ဗဇ္ဇုပသမ္ပဒါသု ဌတွာ အာယတိံ မဂ္ဂဟေတုံ သမ္ပာဒေတုံ သက္ကောန္တိ၊ အဟေတုကာ ပန ပရိသုဒ္ဓေ စတုပါရိသုဒ္ဓိသီလေ ဌတွာ သမ္ပာဒေတုံ န သက္ကောန္တိ၊ တသ္မာ တေ တမ္ပိ ပဋိစ္စ ဝတ္ထုဝိပန္နာဝါတိ ဝေဒိတဗ္ဗာ. ပါရာဇိကာတိ ကမ္မဝိပတ္တိယာ ပဋိသန္ဓိက္ခဏေယေဝ ပရာဇယံ အာပန္နာ. ထေယျသံဝါသကာဒီနံ ဂိဟိဘာဝေ ဌတွာ ဝိပဿနာယ ဝါယမန္တာနမ္ပိ တသ္မိံ အတ္တဘာဝေ မဂ္ဂုပ္ပတ္တိအဘာဝတော ‘‘မဂ္ဂေါ ပန ဝါရိတော’’တိ ဝုတ္တံ. ဒီဃတာယ လမ္ဗမာနံ အင်္ဂဇာတံ လမ္ဗံ နာမ၊ တံ ယဿ အတ္ထိ သော လမ္ဗီ. သော ဧတ္တာဝတာ န ပါရာဇိကော၊ တံ ပန ဒီဃံ အင်္ဂဇာတံ အတ္တနော မုခေ ဝါ ဝစ္စမဂ္ဂေ ဝါ သေဝနာဓိပ္ပါယေန ပဝေသေန္တောဝ ပါရာဇိကော၊ ဣဓ ပန ဝစ္စမဂ္ဂေ ပဝေသေန္တောဝ အဓိပ္ပေတော မုဒုပိဋ္ဌိကေနေဝ မုခေ ပဝေသနဿ ဝုတ္တတ္တာ. သောပိ ဟိ ကတပရိကမ္မတာယ မုဒုဘူတာယ ပိဋ္ဌိယာ ဩနမိတွာ အတ္တနော အင်္ဂဇာတံ မုခေန ဂဏှန္တောဝ ပါရာဇိကော ဟောတိ၊ န ကေဝလော. ယော ပန မုခေန အတ္တနော ဝစ္စမဂ္ဂံ ဝါ ပရေသံ ဝစ္စမဂ္ဂမုခံ ဝါ ဣတ္ထီနံ ပဿာဝမဂ္ဂံ ဝါ ဂဏှာတိ၊ တဿ စ ပုရိသနိမိတ္တေန ပုရိသနိမိတ္တံ ဆုပန္တဿ စ မဂ္ဂေန မဂ္ဂပဋိပါဒနေပိ ပါရာဇိကံ န ဟောတိ ပုရိသနိမိတ္တေန တဒိတရမဂ္ဂသမ္ပဋိပါဒနေနေဝ မေထုနဓမ္မဝေါဟာရတော. ပရဿ အင်္ဂဇာတေ အဘိနိသီဒတီတိ ပရဿ ဥတ္တာနံ သယန္တဿ ကမ္မနိယေ အင်္ဂဇာတေ အတ္တနော ဝစ္စမဂ္ဂံ ပဝေသေန္တော တဿူပရိ နိသီဒတိ၊ ဣဒဉ္စ ဥပလက္ခဏမတ္တံ ပရေသံ အင်္ဂဇာတံ ဝစ္စမဂ္ဂေ ပဝေသေန္တော သာဒိယန္တောပိ ပါရာဇိကောဝ၊ ဗလက္ကာရေန ပန ဝစ္စမဂ္ဂေ ဝါ မုခေ ဝါ ပရေန ပဝေသိယမာနော ယဒိ န သာဒိယတိ၊ အနာပတ္တိကောဝ. ဧတ္ထ အသာဒိယနံ နာမ ဒုက္ကရံ ဝိရဇ္ဇိတဗ္ဗတော. ဧတ္ထ စ အနုပသမ္ပန္နဘာဝေ ဌတွာ မာတုပိတုအရဟန္တေသု အညတရံ ဃာတေန္တော ဘိက္ခုနိံ ဒူသေန္တော စ သာမဏေရပဗ္ဗဇ္ဇမ္ပိ န လဘတီတိ ဒဿနတ္ထံ ဝိသုံ ဂဟိတတ္တာ မာတုဃာတကာဒီနံ စတုန္နံ တတိယပဌမပါရာဇိကေသု အန္တောဂဓတာ ဝေဒိတဗ္ဗာ. ယထာ ဧတ္ထ၊ ဧဝံ ဂိဟိဘာဝေ ဌတွာ လောဟိတုပ္ပါဒံ ကရောန္တော လောဟိတုပ္ပါဒကောဝါတိ ဂဟေတဗ္ဗံ. ဧတေန ပရိယာယေနာတိ ဥဘိန္နံ ရာဂပရိယုဋ္ဌာနသင်္ခါတေန ပရိယာယေန. ဒုတိယဝိကပ္ပေ ကစ္စိ အတ္ထာတိ ပဒစ္ဆေဒေါ ဝေဒိတဗ္ဗော.

ဣတိ သမန္တပါသာဒိကာယ ဝိနယဋ္ဌကထာယ ဝိမတိဝိနောဒနိယံ

စတုတ္ထပါရာဇိကဝဏ္ဏနာနယော နိဋ္ဌိတော.

နိဋ္ဌိတော စ ပါရာဇိကကဏ္ဍဝဏ္ဏနာနယော.