၉. ကဋ္ဌောပမသုတ္တဝဏ္ဏနာ

၅၀၉. ဒွိန္နံ အရဏီနန္တိ အဓရုတ္တရာရဏီနံ. ကိဉ္စိ ဒွယံ သင်္ဃဋ္ဋိတမတ္တံ ဟုတွာ န သမောဓာနဂတံ ဟောတီတိ တံနိဝတ္တနတ္ထံ ‘‘သင်္ဃဋ္ဋနသမောဓာနာ’’တိ ဝုတ္တံ. ပုနပ္ပုနံ သင်္ဃဋ္ဋနေန ဟိ တေဇောပါတုဘာဝေါ. အဓရာရဏီ ဝိယ ဝတ္ထာရမ္မဏံ အသတိပိ ဝါယာမေ တဇ္ဇသမ္ဖဿပစ္စယတော. ဥတ္တရာရဏီ ဝိယ ဖဿော ဝတ္ထာရမ္မဏာဒိဖဿေန ပဝတ္တနတော. သင်္ဃဋ္ဋော ဝိယ ဖဿသင်္ဃဋ္ဋနံ အရဏိဒွယသင်္ဃဋ္ဋနာ ဝိယ ဖဿဿေဝ ဝတ္ထာရမ္မဏေသု သင်္ဃဋ္ဋနာကာရေန ပဝတ္တိတော. အဂ္ဂိ ဝိယ ဝေဒနာ အနုဒဟနဋ္ဌေန ခဏိကာဝါယဉ္စ. ဝတ္ထာရမ္မဏံ ဝါ ဥတ္တရာရဏီ ဝိယ ဣန္ဓနာပါတဂဟဏာဒီသု ဥဿာဟဿ ဝိယ ပဝတ္တိသမ္ဘဝတော. ဖဿော အဓရာရဏီ ဝိယ နိရုဿာဟနိရီဟတာဝသေန အတ္တသာဓနတော.