၃. သီလဋ္ဌိတိဝဂ္ဂေါ

၁-၂. သီလသုတ္တာဒိဝဏ္ဏနာ

၃၈၇-၃၈၈. သီလာနီတိ ဗဟုဝစနံ အနေကဝိဓတ္တာ သီလဿ. တဉှိ သီလနဋ္ဌေန ဧကဝိဓမ္ပိ စာရိတ္တာဒိဝသေန အနေကဝိဓံ. တေနာဟ – ‘‘စတုပါရိသုဒ္ဓိသီလာနီ’’တိ. ပဉှမဂ္ဂေါတိ ဉာတုံ ဣစ္ဆိတဿ အတ္ထဿ ဝီမံသနံ. တေနာဟ – ‘‘ပဉှဂဝေသန’’န္တိ.

၃-၅. ပရိဟာနသုတ္တာဒိဝဏ္ဏနာ

၃၈၉-၃၉၁. ပုဂ္ဂလဝသေန ပရိဟာနံ ဟောတိ န ဓမ္မဝသေန. ယော န ဘာဝေတိ၊ တဿေဝ ပရိဟာယတိ. တေနာဟ ‘‘ယော ဟီ’’တိအာဒိ.

၆. ပဒေသသုတ္တဝဏ္ဏနာ

၃၉၂. ပဒေသတော ဘာဝိတတ္တာတိ ဧကဒေသတော ဘာဝိတတ္တာ ဘာဝနာပါရိပူရိယာ အနနုပ္ပတ္တတ္တာ. တေနာဟ – ‘‘စတ္တာရော ဟိ မဂ္ဂေ’’တိအာဒိ.

၇. သမတ္တသုတ္တဝဏ္ဏနာ

၃၉၃. သမတ္တာ ဘာဝိတတ္တာတိ ပရိယတ္တာ ဘာဝိတတ္တာ.

၈-၁၀. လောကသုတ္တာဒိဝဏ္ဏနာ

၃၉၄-၃၉၆. မဟာဝိသယတ္တာ မဟတိယော အဘိညာ ဧတဿာတိ မဟာဘိညော၊ တဿ ဘာဝေါတိ သဗ္ဗံ ဝတ္တဗ္ဗံ. ‘‘သတတဝိဟာရဝသေန ဝုတ္တ’’န္တိ ဝတွာ တမတ္ထံ ပါကဋံ ကာတုံ ‘‘ထေရော ကိရာ’’တိအာဒိ ဝုတ္တံ. တဿာတိ ထေရဿ. အာဝဇ္ဇနဿ ဂတိန္တိ ဧကာဝဇ္ဇနဿေဝ ဂမနဝီထိံ. အနုဗန္ဓတိ စက္ကဝါဠာနံ သဟဿံ ဧကာဝဇ္ဇနေနေဝ သဟဿလောကဓာတုယာ ဣစ္ဆိတမတ္ထံ ဇာနိတုံ သမတ္ထောတိ ဒဿေတိ.

သီလဋ္ဌိတိဝဂ္ဂဝဏ္ဏနာ နိဋ္ဌိတာ.