၈. သူဒသုတ္တဝဏ္ဏနာ

၃၇၄. အာဟာရသမ္ပာဒနေန တံတံအာဟာရဝတ္ထုဂတေ သူဒေတိ ပဂ္ဃရေတီတိ သူဒေါ၊ ဘတ္တကာရကော. ဒဟရေဟိ မနာပတရံ အစ္စေတဗ္ဗတော အတိက္ကမိတဗ္ဗတော အစ္စယာ၊ ဘောဇနေ ရသဝိသေသာ၊ တသ္မာ နာနစ္စယေဟီတိ နာနပ္ပကာရရသဝိသေသေဟီတိ အတ္ထော. တေန ဝုတ္တံ ‘‘နာနစ္စယေဟီ’’တိအာဒိ. အဂ္ဂီယတိ အသင်္ကရတော ဝိဘဇီယတီတိ အဂ္ဂေါ၊ အမ္ဗိလမေဝ အဂ္ဂေါ အမ္ဗိလဂ္ဂေါတိ အာဟ – ‘‘အမ္ဗိလဂ္ဂေဟီတိ အမ္ဗိလကောဋ္ဌာသေဟီ’’တိ. ဒါတုံ အဘိဟရိတဗ္ဗတာယ အဘိဟာရာ၊ ဒေယျဓမ္မာ. တေနာဟ – ‘‘အဘိဟဋာနံ ဒါယာန’’န္တိ. ဣဒံ မေ ကမ္မဋ္ဌာနံ အနုလောမံဝါတိ ဣဒံ မမ ကမ္မဋ္ဌာနံ ဧဝံ ပဝတ္တမာနံ အနုလောမာဝသာနမေဝ ဟုတွာ တိဋ္ဌတိ. ဧဝံ ပုန ပဝတ္တမာနံ ဥဿက္ကိတွာ ဝိသေသနိဗ္ဗတ္တနတ္ထမေဝ ဟောတီတိ ဧဝံ နိမိတ္တံ ဂဟေတုံ န သက္ကောတိ ဗာလော အဗျတ္တော၊ ပဏ္ဍိတော ပန သက္ကောတိ. အတ္တနော စိတ္တဿာတိ အတ္တနော ဘာဝနာစိတ္တဿ. ပုဗ္ဗဘာဂဝိပဿနာ သတိပဋ္ဌာနာဝ ကထိတာ ‘‘သကဿ စိတ္တဿ နိမိတ္တံ ဥဂ္ဂဏှာတီ’’တိ ဝုတ္တတ္တာ.