၆. သကုဏဂ္ဃိသုတ္တဝဏ္ဏနာ

၃၇၂. ပါကတိကသကုဏကုလေသု ဗလဝဘာဝတော တေသံ ဟနနတော သကုဏဂ္ဃိ. သေနောတိ ဝုတ္တံ ‘‘သေနဿေတံ အဓိဝစန’’န္တိ၊ သေနဝိသေသော ပန သော ဝေဒိတဗ္ဗော. အာမိသတ္ထာယ ပတ္တတ္တာ ‘‘လောဘသာဟသေန ပတ္တာ’’တိ ဝုတ္တံ၊ လောဘနိမိတ္တေန သာဟသာကာရေန ပတ္တာတိ အတ္ထော. နင်္ဂလေန ကဋ္ဌံ ကသိတံ နင်္ဂလကဋ္ဌံ၊ တံ ကရီယတိ ဧတ္ထာတိ နင်္ဂလကဋ္ဌကရဏန္တိ အာဟ – ‘‘အဓုနာ ကဋ္ဌံ ခေတ္တဋ္ဌာန’’န္တိ. လေဍ္ဍုယော တိဋ္ဌန္တိ ဧတ္ထာတိ လေဍ္ဍုဋ္ဌာနံ၊ လေဍ္ဍုနိမိတ္တံ ကသိတဋ္ဌာနံ. ဝဇ္ဇတီတိ ဝဒံ၊ ဝစနံ. ကုစ္ဆိတံ ဝဒံ အဝဒံ. ဂရဟနေ ဟိ အယံ အ-ကာရော ယထာ – ‘‘အပုတ္တော အဘရိယာ’’တိ. အဝဒံ မာနေတီတိ အဝဒမာနာ၊ အတ္တနော ဗလမဒေန လာပံ အတိမညိတွာ ဝဒန္တီတိ အတ္ထော. တေနေဝါဟ ‘‘ဂစ္ဆ ခေါ၊ တွံ လာပ၊ တတြပိ မေ ဂန္တွာ န မောက္ခသီ’’တိ. ယံ ပန အဋ္ဌကထာယံ ဝုတ္တံ ‘‘အတ္တနော ဗလဿ သုဋ္ဌု ဝဏ္ဏံ ဝဒမာနာ’’တိ၊ တတ္ထ အတ္တတော အာပန္နံ ဂဟေတွာ ဝုတ္တံ. ‘‘ဝဒမာနော’’တိ ဝါ ပါဌော၊ သာရမ္ဘဝသေန အဝှါယန္တောတိ အတ္ထော. တေနာဟ ‘‘ဧဟိ ခေါ ဒါနိ သကုဏဂ္ဃီ’’တိ. သုဋ္ဌု ဌပေတွာတိ ဇိယာမုတ္တသရဿ ဝိယ သီဃပါတယောဂျတာကရဏေန ဥဘော ပက္ခေ သမ္မာ ဌပေတွာ. အယန္တိ သကုဏဂ္ဃိ. ဉတွာတိ ယထာဘူတဒဿနေန အတ္တနော ဉာဏေန ဇာနိတွာ. ဖာလီယိတ္ထာတိ ဖာလစ္ဆေဒတိခိဏသိခရေ သုက္ခလေဍ္ဍုသ္မိံ ဘိဇ္ဇိတ္ထ.