၈. အာဝရဏနီဝရဏသုတ္တဝဏ္ဏနာ

၂၁၉. ပညာ ဒုဗ္ဗလာ ဟောတိ၊ န ဗလဝတီ ပဋိပက္ခေန ဥပက္ကိလိဋ္ဌဘာဝတော. တေနာဟ ‘‘မန္ဒာ အဝိသဒါ’’တိ.

ပဉ္စ နီဝရဏာ ဒူရေ ဟောန္တိ အာဝရဏာဘာဝတော. တမေဝ ပီတိန္တိ သပ္ပါယဓမ္မသဝနေ ဥပ္ပန္နံ ပီတိံ. တဿာ တဒါ ဥပ္ပန္နာကာရသလ္လက္ခဏေန အဝိဇဟန္တော ပုနပ္ပုနံ တဿာ နိဗ္ဗတ္တနေန. တေနာဟ ‘‘ပဉ္စ နီဝရဏေ ဝိက္ခမ္ဘေတွာ’’တိ. ဣဒံ သန္ဓာယာတိ ဧတ္တကေ ဒိဝသေပိ န ဝိနဿန္တိ၊ သာ ဓမ္မပီတိ လဒ္ဓပစ္စယာ ဟုတွာ ဝိသေသာဝဟာတိ ဣမမတ္ထံ သန္ဓာယ ဧတံ ‘‘ဣမဿ ပဉ္စ နီဝရဏာ တသ္မိံ သမယေ န ဟောန္တီ’’တိအာဒိ ဝုတ္တံ. ပီတိပါမောဇ္ဇပက္ခိယာတိ ပီတိပါမောဇ္ဇပစ္စယာ. နဿန္တီတိ နိရောဓပစ္စယဝသေန ပဝတ္တနတော နဿန္တိ. သဘာဂပစ္စယဝသေန ပုန ဥပ္ပဇ္ဇန္တာပိ။ပေ။ ဝုစ္စတိ ကိစ္စသာဓနဝသေန ပဝတ္တနတော.