၄. ဂိလာနသုတ္တဝဏ္ဏနာ

၁၀၅၀. န ခေါ ပနေတန္တိ န ခေါ ဧတံ၊ နောတိ စ အမှေဟီတိ အတ္ထောတိ အာဟ ‘‘န ခေါ အမှေဟီ’’တိအာဒိ. အဿသန္တီတိ အဿာသနီယာတိ အာဟ ‘‘အဿာသကရေဟီ’’တိ. မရိဿတီတိ မာရိသော၊ ဧကန္တဘာဝိမရဏော၊ သော ပန မရဏာဓီနဝုတ္တိကောတိ ဝုတ္တံ ‘‘မရဏပဋိဗဒ္ဓေါ’’တိ. အဓိမုစ္စေဟီတိ အဓိမုတ္တိံ ဥပ္ပါဒေဟိ. တံ ပန တထာ စိတ္တဿ ပဏိဓာနံ ဌပနန္တိ အာဟ ‘‘ဌပေဟီ’’တိ. အာဂမနီယဂုဏေသူတိ ပုဗ္ဗဘာဂဂုဏေသု. ပမာဏံ နာမ နတ္ထိ အနန္တာပရိမာဏတ္တာ. နာနာကရဏံ နတ္ထိ ဝိမုတ္တိယာ နိန္နာနတ္တာ.