၆. ပဌမမိတ္တာမစ္စသုတ္တဝဏ္ဏနာ

၁၀၁၂. ဝေါဟာရမိတ္တာတိ တံတံဒါနဂ္ဂဟဏဝသေန ဝေါဟာရကာ မိတ္တာ. အာမန္တနပဋိမန္တနဣရိယာပထာဒီသုပီတိ အာလာပသလ္လာပဂမနနိသဇ္ဇာဒိအတ္ထသံဝိဓာနာဒီသု. ဧကတော ပဝတ္တကိစ္စာတိ သဟ ပဝတ္တကတ္တဗ္ဗာ. အမာ သဟ ဘဝန္တီတိ အမစ္စာ. ‘‘အမှာကံ ဣမေ’’တိ ဉာယန္တီတိ ဉာတီ၊ အာဝါဟဝိဝါဟသမ္ဗဒ္ဓါ. တေနာဟ ‘‘သဿုသသုရပက္ခိကာ’’တိ. ယောနိသမ္ဗန္ဓာ ဝါ သာလောဟိတာ. တေနာဟ ‘‘ဘာတိဘဂိနိမာတုလာဒယော’’တိ.