၈. အပ္ပမာဒပေယျာလဝဂ္ဂေါ

၁. တထာဂတသုတ္တဝဏ္ဏနာ

၁၃၉. ကာရာပကအပ္ပမာဒေါ နာမ ‘‘ဣမေ အကုသလာ ဓမ္မာ ပဟာတဗ္ဗာ၊ ဣမေ ကုသလာ ဓမ္မာ ဥပ္ပါဒေတဗ္ဗာ’’တိ ဝုတ္တဝဇ္ဇေတဗ္ဗဝဇ္ဇနသမ္ပာဒေတဗ္ဗသမ္ပာဒနဝသေန ပဝတ္တော အပ္ပမာဒေါ. ဧသာတိ အပ္ပမာဒေါ. လောကိယောဝ. န လောကုတ္တရော. အယန္တိ ဧသာတိ စ အပ္ပမာဒမေဝ ဝဒတိ. တေသန္တိ စတုဘူမကဓမ္မာနံ. ပဋိလာဘကဋ္ဌေနာတိ ပဋိလာဘာပနဋ္ဌေန.

တထာဂတသုတ္တဝဏ္ဏနာ နိဋ္ဌိတာ.

၂. ပဒသုတ္တဝဏ္ဏနာ

၁၄၀. ဇင်္ဂလာနန္တိ ဇင်္ဂလဝါသီနံ. ဇင်္ဂလ-သဒ္ဒေါ စေတ္ထ ထဒ္ဓဘာဝသာမညေန ပထဝီပရိယာယော၊ န အနုပဋ္ဌာနဝိဒူရဒေသဝါစီ. တေနာဟ – ‘‘ပထဝီတလဝါသီန’’န္တိ. ပဒါနံ ဝုစ္စမာနတ္တာ ‘‘သပါဒကပါဏာန’’န္တိ ဝိသေသေတွာ ဝုတ္တံ. သမောဓာနန္တိ အန္တောဂဓဘာဝံ. တေနာဟ – ‘‘ဩဓာနံ ဥပက္ခေပ’’န္တိ၊ ဥပနေတွာ ပက္ခိပိတဗ္ဗန္တိ အတ္ထော.

ပဒသုတ္တဝဏ္ဏနာ နိဋ္ဌိတာ.

၃-၁၀. ကူဋသုတ္တာဒိဝဏ္ဏနာ

၁၄၁-၁၄၈. ဝဿိကာယ ပုပ္ဖံ ဝဿိကံ ယထာ ‘‘အာမလကိယာ ဖလံ အာမလက’’န္တိ. မဟာတလသ္မိန္တိ ဥပရိပါသာဒေ. ‘‘ယာနိ ကာနိစီ’’တိ ပဒေဟိ ဣတရာနိ သမာနာဓိကရဏာနိ ဘဝိတုံ ယုတ္တာနီတိ ‘‘ပစ္စတ္တေ သာမိဝစန’’န္တိ ဝတွာ တထာ ဝိဘတ္တိဝိပရိဏာမော ကတော. ‘‘တန္တာဝုတာန’’န္တိ ပဒံ နိဒ္ဓါရဏေ သာမိဝစနန္တိ တတ္ထ ‘‘ဝတ္ထာနီ’’တိ ဝစနသေသေန အတ္ထံ ဒဿေတုံ ‘‘အထ ဝါ’’တိအာဒိ ဝုတ္တံ.

ကူဋသုတ္တာဒိဝဏ္ဏနာ နိဋ္ဌိတာ.

အပ္ပမာဒဝဂ္ဂဝဏ္ဏနာ နိဋ္ဌိတာ.