၁. ပဌမဝဂ္ဂေါ

၁. မာရသုတ္တဝဏ္ဏနာ

၁၆၀. မာရသဒ္ဒေါယံ ဘာဝသာဓနောတိ ဒဿေန္တော ‘‘မာရော ဝါ အဿာတိ မရဏံ ဝါ ဘဝေယျာ’’တိ အာဟ. မာရေတာတိ မရိတဗ္ဗော မာရံ မရဏံ ဧတဗ္ဗောတိ အာဟ ‘‘မာရေတဗ္ဗော’’တိ. အနုပါဒါနိဗ္ဗာနတ္ထာတိ ဖလဝိမုတ္တိသင်္ခါတာ အရဟတော အရဟန္တတာ နာမ ယာဝဒေဝ အနုပါဒါနိဗ္ဗာနတ္ထာ. နိဗ္ဗာနဗ္ဘန္တရေတိ အနုပါဒါနိဗ္ဗာနာဓိဂမဿ အဗ္ဘန္တရေ တတော ဩရမေဝ ဣဒံ မဂ္ဂံ ဗြဟ္မစရိယံ ဝုဿတိ၊ န တတော ပရံ. အဿာတိ ဗြဟ္မစရိယဿ.

မာရသုတ္တဝဏ္ဏနာ နိဋ္ဌိတာ.

၂-၁၀. သတ္တသုတ္တာဒိဝဏ္ဏနာ

၁၆၁-၁၆၉. လဂ္ဂပုစ္ဆာတိ လဂ္ဂနဿ ဗဇ္ဈနဿ ပုစ္ဆာ. ယဒိ ရူပါဒီသု သတ္တတ္တာ သတ္တော၊ ခီဏာသဝါ ကထံ သတ္တာတိ? သတ္တဘူတပုဗ္ဗာတိ ကတွာ. ကီဠာဝိဂမန္တိ ကီဠာယ အပနယနံ ဩရမဏံ. ယန္တရဇ္ဇု ဝိယ ဘဝပဗန္ဓဿ နယနတော ဘဝရဇ္ဇူတိ တဏှာ ဝုတ္တာ.

သတ္တသုတ္တာဒိဝဏ္ဏနာ နိဋ္ဌိတာ.

ပဌမဝဂ္ဂဝဏ္ဏနာ နိဋ္ဌိတာ.