၁. သမာဓိမူလကသမာပတ္တိသုတ္တဝဏ္ဏနာ

၆၆၂. သမာဓိကုသလောတိ သမာဓိသ္မိံ ကုသလော. တယိဒံ သမာဓိကောသလ္လတ္တံ သဟ ဈာနင်္ဂယောဂေန စတုဗ္ဗိဓော ဈာနသမာဓိ၊ တသ္မာ တံ တံ ဝိဘာဂံ ဇာနန္တဿ သိဒ္ဓံ ဟောတီတိ အာဟ – ‘‘ပဌမံ ဈာန’’န္တိအာဒိ. တတ္ထ ဝိတက္ကဝိစာရပီတိသုခေကဂ္ဂတာဝသေန ပဌမံ ပဉ္စင်္ဂိကံ၊ ပီတိသုခေကဂ္ဂတာဝသေန ဒုတိယံ တိဝင်္ဂိကံ၊ သုခေကဂ္ဂတာဝသေန တတိယံ ဒုဝင်္ဂိကံ၊ ဥပေက္ခေကဂ္ဂတာဝသေန စတုတ္ထံ ဒုဝင်္ဂိကမေဝါတိ ဧဝံ တသ္မိံ တသ္မိံ ဈာနေ တံတံအင်္ဂါနံ ဝဝတ္ထာနေ ကုသလော. သမာပတ္တိကုသလောတိ သမာပဇ္ဇနေ ကုသလော. ဟာသေတွာတိ တောသေတွာ. ကလ္လံ ကတွာတိ သမာဓာနဿ ပဋိပက္ခဓမ္မာနံ ဒူရီကရဏေန သဟကာရီကာရဏဉ္စ သမာဓာနေန သမာပဇ္ဇနေ စိတ္တံ သမတ္ထံ ကတွာ. သေသပဒါနီတိ သေသာ တယော ကောဋ္ဌာသာ. တတိယာဒီသု နယေသု အကုသလောပိ ဈာနတ္ထာယ ပဋိပန္နတ္တာ ‘‘ဈာယီတေဝါ’’တိ ဝုတ္တော.

သမာဓိမူလကသမာပတ္တိသုတ္တဝဏ္ဏနာ နိဋ္ဌိတာ.