၄. သမ္ဗဟုလသုတ္တဝဏ္ဏနာ

၂၂၄. သမ္ဗဟုလာတိ သုတ္တန္တနယေန သမ္ဗဟုလာ. သုတ္တန္တေ သဇ္ဈာယိံသူတိ သုတ္တန္တိကာ. ဝိနယံ ဓာရေန္တီတိ ဝိနယဓရာ. ယုဉ္ဇန္တီတိ ဝါသဓုရေ ယောဂံ ကရောန္တိ. ဃဋေန္တီတိ တတ္ထ ဝါယာမံ ကရောန္တိ. ကရောန္တာနံယေဝ အရုဏော ဥဂ္ဂစ္ဆတီတိ သမ္ဗန္ဓော.

ကောမေတိ ကိံ ဣမေ? တေနာဟ ‘‘ကဟံ ဣမေ’’တိ? ဝဇ္ဇိဘူမိံ ဝဇ္ဇိရဋ္ဌံ ဂတာတိ ဝဇ္ဇိဘူမိယာ. တေနာဟ ‘‘ဝဇ္ဇိရဋ္ဌာဘိမုခါ ဂတာ’’တိ. နတ္ထိ ဧတေသံ နိကေဘံ နိဗဒ္ဓနိဝါသဋ္ဌာနန္တိ အနိကေတာ တေနာဟ ‘‘အဂေဟာ’’တိ. ဥတု ဧဝ သပ္ပါယံ၊ ဥတုဝသေန ဝါ ကာယစိတ္တာနံ ကလ္လတ္တာ သပ္ပါယံ. ဧသ နယော သေသေသုပိ.

သမ္ဗဟုလသုတ္တဝဏ္ဏနာ နိဋ္ဌိတာ.