၁၄. ဂန္ဓတ္ထေနသုတ္တဝဏ္ဏနာ

၂၃၄. ဂန္ဓာရမ္မဏံ ဥပနိဇ္ဈာယတီတိ ဂန္ဓသင်္ခါတံ အာရမ္မဏံ ဥပေစ္စ နိဇ္ဈာယတိ၊ ရူပါရမ္မဏေန ဝိယ ဝိညာဏေန ရူပံ၊ ဂန္ဓာရမ္မဏေန တံ ဥပေစ္စ နိဇ္ဈာယတိ ပစ္စက္ခတော၊ ယာထာဝတော သဘာဝတော ပဋိဝိဇ္ဈတီတိ အတ္ထော. ဥပသိင်္ဃိဿတီတိ တဏှာဝသေန ဥပဂန္တွာ သိင်္ဃိဿတိ.

ဧကင်္ဂမေတံ ထေယျာနန္တိ အာရမ္မဏဝသေန ထေယျဝတ္ထူသု ဝိဘဇိယမာနေသု ဧကမင်္ဂမေတံ ဂန္ဓာရမ္မဏန္တိ အာဟ ‘‘ထေနိတဗ္ဗာန’’န္တိအာဒိ. ဩဇာပေက္ခာယ ထေယျာယ ပဝတ္တမာနာယ ဓမ္မာရမ္မဏတာပိ တဿာ သိယာ၊ သာ ပန န မဓုရာ ထေယျကတာ စာတိ ‘‘ပဉ္စကောဋ္ဌာသာန’’န္တိ ဝုတ္တံ. ကာမဉ္စ တံ ဂန္ဓာရမ္မဏံ ကေနစိ ပရိဂ္ဂဟိတံ န ဟောတီတိ အာဒိယိတုံ သက္ကာ၊ သတ္ထာရာ ပန အနနုညာတတ္တာ န ယုတ္တော တဿ ပရိဘောဂေါ. ယံ ပန တေန ဘိက္ခုနာ ဝုတ္တံ ‘‘န ဟရာမိ န ဘဉ္ဇာမီ’’တိ၊ တဿပိ အယမေဝ ပရိဟာရော. ဝဏ္ဏီယတိ ဖလံ ဧတေနာတိ ဝဏ္ဏံ၊ ကာရဏန္တိ ဝုတ္တံ ‘‘ဝဏ္ဏေနာတိ ကာရဏေနာ’’တိ.

တသ္မိန္တိ တသ္မိံ ဘိက္ခုသ္မိံ. အာကိဏ္ဏကမ္မန္တောတိ တဏှာဒိဋ္ဌိအာဒိဝသေန အကုသလကမ္မန္တော ဒိဋ္ဌိမောဟတဏှာဒိဝသေန အာဒိတော ပဋ္ဌာယ ကုသလကမ္မာနံ ပဋိက္ခေပနတော. ဒိဋ္ဌိဝသေန စ ကထိနကက္ခဠခရိဂတတ္တာ ‘‘အခီဏကမ္မန္တော ကက္ခဠကမ္မန္တော’’တိ ဝုတ္တံ.

အာကိဏ္ဏလုဒ္ဒေါတိ အာကိဏ္ဏော ဟုတွာ ကက္ခဠော. တေနာဟ ‘‘ဗဟုပါပေါ’’တိအာဒိ. မက္ခိတောတိ လိတ္တော. တန္တိ ဒေဝတာစောဒနံ. တသ္မာတိ အတိက္ကမ္မ ဌိတတ္တာ‘‘တွဉ္စာရဟာမိ ဝတ္တဝေ’’တိ ဧဝမာဟ.

ဂဝေသန္တဿ အတ္တနော သန္တာနေ ဥပ္ပါဒနဝသေန ပရိယေသန္တဿ. အနေကယောဇနာယာမဝိတ္ထာရံ ဂဂနတလံ ဗျာပေတွာ ဥပ္ပန္နဝလာဟကကူဋပ္ပမာဏံ ဝိယ. သုဒ္ဓေါတိ သီလေန ပရိသုဒ္ဓေါ အယန္တိ ဇာနာသိ. သုဂတိန္တိ သုန္ဒရနိဗ္ဗတ္တိံ. တေန နိဗ္ဗာနဿပိ သင်္ဂဟော သိဒ္ဓေါ.

ဂန္ဓတ္ထေနသုတ္တဝဏ္ဏနာ နိဋ္ဌိတာ.

သာရတ္ထပ္ပကာသိနိယာ သံယုတ္တနိကာယ-အဋ္ဌကထာယ

ဝနသံယုတ္တဝဏ္ဏနာယ လီနတ္ထပ္ပကာသနာ သမတ္တာ.