၁၀. သဇ္ဈာယသုတ္တဝဏ္ဏနာ

၂၃၀. နိဿရဏပရိယတ္တိဝသေနာတိ အဒ္ဓါ ဣမံ ပရိယတ္တိံ နိဿာယ ဝဋ္ဋဒုက္ခတော နိဿရိတုံ လဗ္ဘာတိ ဧဝံ နိဿရဏပရိယတ္တိဝသေန. သဇ္ဈာယနတောတိ ဝိမုတ္တာယတနသီသေ ဌတွာ သဇ္ဈာယနတော. ဣဒါနိ တဿ နိဿရဏပရိယတ္တိဝသေန သဇ္ဈာယနကရဏံ၊ ပဋိပတ္တိဝသေန ဝတ္တပဋိဝတ္တကရဏံ၊ ဝိပဿနာဘာဝနဉ္စ ဒဿေတုံ ‘‘သော ကိရာ’’တိအာဒိ ဝုတ္တံ. အရဟတ္တံ ပတ္တဒိဝသေ ပဋိပတ္တိကိတ္တနာယ ပုရိမဒိဝသေသုပိ တထာ ပဋိပဇ္ဇိ၊ ဝိပဿနံ ပန ဥဿုက္ကာပေတုံ နာသက္ခီတိ ဒဿေတိ. ကာလံ အတိဝတ္တေတီတိ ဣဒံ ‘‘သင်္ကသာယတီ’’တိ ပဒဿ အတ္ထဝစနံ. ထေရဿာတိ သဇ္ဈာယကတ္ထေရဿ.

ဓမ္မပဒါနီတိ သီလာဒိဓမ္မက္ခန္ဓဒီပကာနိ ပဒါနိ. တေနာဟ ‘‘သဗ္ဗမ္ပိ ဗုဒ္ဓဝစနံ အဓိပ္ပေတ’’န္တိ. န ဂဏှာသိ ဥဒ္ဒေသန္တိ အဓိပ္ပါယော. ပါဠိယံ ‘‘ဘိက္ခူဟိ သံဝသန္တော’’တိ ဣမိနာ တေသံ ဓမ္မဿဝနတ္ထာယပိ ဓမ္မော ပရိယာပုဏိတဗ္ဗောတိ ဒဿေတိ. ဝိရဇ္ဇတိ ဧတေနာတိ ဝိရာဂေါ၊ အရိယမဂ္ဂေါ. ဇာနိတွာတိ ပရိညာဘိသမယဝသေန ဒိဋ္ဌသုတာဒိံ ယာထာဝတော ဇာနိတွာ ပဋိဝိဇ္ဈိတွာ. ဝိဿဇ္ဇနန္တိ ပဟာနံ. န ဗုဒ္ဓဝစနဿ ဝိဿဇ္ဇနံ. ဘဏ္ဍာဂါရိကပရိယတ္တိယာပိ အနုညာတတ္တာ ပဂေဝ နိဿရဏတ္ထာယ၊ တတ္ထ ပန မတ္တာ ဇာနိတဗ္ဗာတိ ဒဿေန္တော ‘‘ဧတ္တာဝတာ’’တိအာဒိမာဟ.

သဇ္ဈာယသုတ္တဝဏ္ဏနာ နိဋ္ဌိတာ.