၇. ပဝါရဏာသုတ္တဝဏ္ဏနာ

၂၁၅. တသ္မိံ အဟူတိ တသ္မိံ အဟနီတိ အာဟ ‘‘တသ္မိံ ဒိဝသေ’’တိ. အနသနေနာတိ သဗ္ဗသော အာဟာရဿ အဘုဉ္ဇနေန. သာသနိကသီလေန ဗာဟိရကအနသနေန ဝါ ဥပေတာ ဟုတွာတိ ယောဇနာ. ဝါ-သဒ္ဒေန ခီရပါနမဓုသာယနာဒီနိပိ သင်္ဂဏှာတိ. ပကာရေဟိ ဒိဋ္ဌာဒီဟိ ဝါရေတိ ကာယကမ္မာဒိကေ သရာပေတိ ဂါရယှေ ကရောတိ ဧတာယာတိ ပဝါရဏာ၊ ပဋိပတ္တိဝိသောဓနာယ အတ္တနော အတ္တနော ဝဇ္ဇသောဓနာယ ဩကာသဒါနံ. ယသ္မာ ယေဘုယျေန ဝဿံဝုဋ္ဌေဟိ ကာတဗ္ဗာ ဧသာ ဝိသုဒ္ဓိဒေသနာ၊ တသ္မာ ဝုတ္တံ ‘‘ဝဿံဝုဋ္ဌပဝါရဏာယ. ဝိသုဒ္ဓိပဝါရဏာတိပိ ဧတိဿာဝ နာမ’’န္တိ. တဒါ တဿ ဘိက္ခုသံဃဿ တုဏှီဘာဝဿ အနဝသေသတာယပိ ဝဏ္ဏံ ဒဿေတုံ ပါဠိယံ ‘‘တုဏှီဘူတ’’န္တိ ဝုတ္တန္တိ အာဟ ‘‘ယတော ယတော။ပေ။နတ္ထီ’’တိ. ဟတ္ထဿ ကုက္ကုစ္စတာ အသံယမော အသမ္ပဇညကိရိယာ ဟတ္ထကုက္ကုစ္စံ. တထာ ပါဒကုက္ကုစ္စံ ဝေဒိတဗ္ဗံ၊ ဝါ-သဒ္ဒေါ အဝုတ္တဝိကပ္ပတ္ထော၊ တေန တဒညေသမဘာဝေါ ဝိဘာဝိတောတိ ဒဋ္ဌဗ္ဗံ.

ပဉ္စပသာဒေဟီတိ ပဉ္စဝဏ္ဏေဟိ ပသာဒေဟိ. ဝေါဿဂ္ဂတ္ထော ယထာရုစိ ကိရိယာယ ဝေါဿဇ္ဇနံ. ပုစ္ဆနတ္ထေတိ ပဋိက္ခေပမုခေနေဝ ပုစ္ဆနတ္ထေ နကာရော၊ မေ ကိဉ္စိ ကိရိယံ ဝါ ဝါစသိကံ ဝါ န ဂရဟထ၊ ကိံ နု ဂရဟထ ကာယဝါစာဟီတိ အတ္ထော. ကေစိ ‘‘ဒွါရာနေဝါ’’တိ ဒွါရသီသေန ဒွါရပ္ပဝတ္တစရိယံ ဝဒန္တိ. ဝိသုဒ္ဓိပဝါရဏာယ အဓိပ္ပေတတ္တာ ယေန ပဝါရိတံ၊ တေနေဝ ဝိသုဒ္ဓီတိ ဉာယတိ၊ ယေန န ပဝါရိတံ. ကိံ နု တံ အဝိသုဒ္ဓန္တိ သိယာ ကဿစိ ပုထုဇ္ဇနဿ အာသင်္ကာ? တန္နိဝါရဏတ္ထမာဟ ‘‘နော အပရိသုဒ္ဓတ္တာ’’တိ. မနောဒွါရံ ပရိသုဒ္ဓံ အသုစိကာရကဥပက္ကိလေသာနံ ဒူရီကတတ္တာ. ဣဒါနိ ဧတရဟိ ဗုဒ္ဓကာလေ. ဧတ္ထာတိ မနောဒွါရပရိသုဒ္ဓိယံ.

ကာယဝစီသမာစာရပရိသုဒ္ဓိယာ ပဝေဒိတာယ မနောသမာစာရပရိသုဒ္ဓိ အတ္ထတော ပဝေဒိတာဝ ဟောတီတိ ‘‘ကာယိကံ ဝါ ဝါစသိကံ ဝါ’’ဣစ္စေဝါဟ. တထာ ဟိ ဝုတ္တံ ‘‘ကာယိကံ ဝါ ဝါစသိကံ ဝါတိ ဣဒံ စတုန္နံ အရက္ခိယတံ သန္ဓာယ ထေရော အာဟာ’’တိ. ‘‘ဘိက္ခဝေ၊ ပဝါရေမိ ဝေါ’’တိ ဘိက္ခုသံဃဝိသယတ္တာ ပဝါရဏာယ တတ္ထ ဘိက္ခုသံဃေန ဝတ္တဗ္ဗံ ပဋိဝစနံ ဒေန္တော ဓမ္မသေနာပတိ ‘‘ဘိက္ခုသံဃဿ ဘာရံ ဝဟန္တော’’တိ ဝုတ္တော. တေနာဟ ‘‘န ခေါ မယံ၊ ဘန္တေ’’တိအာဒိ. အရက္ခိယာနီတိ ပရာနုဝါဒတော န ဘာယိတဗ္ဗာနိ သုပရိသုဒ္ဓဘာဝတော.

‘‘အနုပ္ပန္နဿာ’’တိ ဣဒံ အဓိပ္ပါယိကဝစနန္တိ တဒဓိပ္ပါယံ ဝိဝရန္တော ‘‘ကဿပသမ္မာသမ္ဗုဒ္ဓတော ပဋ္ဌာယာ’’တိအာဒိမာဟ. ကဿပသမ္မာသမ္ဗုဒ္ဓတောတိ ဝိဘတ္တေ နိဿက္ကံ၊ တသ္မာ ကဿပသမ္မာသမ္ဗုဒ္ဓတော ဩရန္တိ အတ္ထောတိ. အညေနာတိ ဣတော ဘဂဝတော အညေန. အနုပ္ပါဒိတပုဗ္ဗဿာတိ ပရသန္တာနေ န ဥပ္ပါဒိတပုဗ္ဗဿ. သသန္တာနေ ပန ပစ္စေကဗုဒ္ဓါနံ ဝသေန န ဥပ္ပါဒိတောတိ န သက္ကာ ဝတ္တုံ. သမနုအာဂတာတိ သမ္မာ အနု ဥပဂတာ. ဘဂဝတော သီလာဒယော ဂုဏာတိ ဗုဒ္ဓဘူတဿ ဂုဏာ အဓိပ္ပေတာတိ အာဟ ‘‘အရဟတ္တမဂ္ဂမေဝ နိဿာယ အာဂတာ’’တိ. သဗ္ဗဂုဏာတိ ဒသဗလဉာဏာဒယော သဗ္ဗေ ဗုဒ္ဓဂုဏာ. ဘန္တေတိ ဧတ္ထ ဣတိသဒ္ဒေါ အာဒိအတ္ထော. တေန ‘‘ဣမေသံ ပန။ပေ။ ဝါစသိကံ ဝါ’’တိ ယာဝါယံ ပါဠိပဒေသော၊ တံ သဗ္ဗံ ဂဏှာတိ. တေနာဟ ‘‘ဣဒံ ထေရော။ပေ။ ပဝါရေန္တော အာဟာ’’တိ.

ယံ အတ္တနော ပုညာနုဘာဝသိဒ္ဓံ စက္ကရတနံ နိပ္ပရိယာယတော တေန ပဝတ္တိတံ နာမ၊ န ဣတရန္တိ ပဌမနယော ဝုတ္တော. ယသ္မာ ပဝတ္တိတဿေဝ အနုပဝတ္တနံ၊ ပဌမနယော စ တံသဒိသေ တဗ္ဗောဟာရဝသေန ဝုတ္တောတိ တံ အနာဒိယိတွာ ဒုတိယနယော ဝုတ္တော. ဒသဝိဓန္တိ အန္တောဇနသ္မိံ၊ ဗလကာယေ ရက္ခာဝရဏဂုတ္တိယာ သံဝိဓာနံ၊ ခတ္တိယေသု အနုယုတ္တေသု၊ ဗြာဟ္မဏဂဟပတိကေသု၊ နေဂမဇာနပဒေသု၊ သမဏဗြာဟ္မဏေသု၊ မိဂပက္ခီသု အဓမ္မစာရပဋိက္ခေပေါ၊ အဓနာနံ ဓနာနုပ္ပဒါနံ၊ သမဏဗြာဟ္မဏေ ဥပသင်္ကမိတွာ ပဉှပုစ္ဆနန္တိ ဧဝံ ဒသဝိဓံ. တတ္ထ ဂဟပတိကေ ပက္ခိဇာတေ စ ဝိသုံ ကတွာ ဂဟဏဝသေန ဒွါဒသဝိဓံ. စက္ကဝတ္တိဝတ္တန္တိ စက္ကဝတ္တိဘာဝါဝဟံ ဝတ္တံ. ယသ္မာ ယာထာဝတော ပဝတ္တိတံ၊ တဒနုရူပကံ ပန ဉာယေန ယုတ္တကေန ပဝတ္တိတံ နာမ ဟောတီတိ အာဟ ‘‘သမ္မာ နယေန ဟေတုနာ ကာရဏေနာ’’တိ. ဥဘတောဘာဂဝိမုတ္တာတိ ဥဘယဘာဂေဟိ ဥဘယဘာဂတော ဝိမုတ္တာတိ အယမေတ္ထ အတ္ထောတိ ဒဿေတိ ‘‘ဒွီဟိ ဘာဂေဟိ ဝိမုတ္တာ၊ အရူပါ။ပေ။ နာမကာယတော’’တိ ဣမိနာ. တေဝိဇ္ဇာဒိဘာဝန္တိ တေဝိဇ္ဇဆဠဘိညစတုပ္ပဋိသမ္ဘိဒဘာဝံ. ပညာဝိမုတ္တာ ဟိ တံ တိဝိဓံ အပ္ပတ္တာ ကေဝလံ ပညာယ ဧဝ ဝိမုတ္တာ.

ဝိသုဒ္ဓတ္ထာယာတိ ဝိသုဒ္ဓိပဝါရဏတ္ထာယ. သံယောဇနဋ္ဌေန သံယောဇနသင်္ခါတေ စေဝ ဗန္ဓနဋ္ဌေန ဗန္ဓနသင်္ခါတေ စ. ဝိဇိတသင်္ဂါမန္တိ ယထာ ရာဂါဒယော ပုန န သီသံ ဥက္ခိပန္တိ၊ ဧဝံ အရိယမဂ္ဂသေနာယ ဝသေန ဝိဇိတသင်္ဂါမံ. တေနာဟ ‘‘ဝိဇိတရာဂဒေါသမောဟသင်္ဂါမ’’န္တိ. မာရဗလဿာတိ မာရသေနာယ၊ မာရဿ ဝါ သာမတ္ထိယဿ. ဝေနေယျသတ္ထန္တိ ဝိနေတဗ္ဗဇနသမူဟံ. သကဋာဒိသတ္ထသဘာဂတော ဝိနေယျောဝ သတ္ထောတိ တံ ဝေနေယျသတ္ထံ. သီလသာရာဒိအဘာဝတော အန္တောတုစ္ဆော.

ပဝါရဏာသုတ္တဝဏ္ဏနာ နိဋ္ဌိတာ.