၃. ပေသလသုတ္တဝဏ္ဏနာ

၂၁၁. ဧတေသန္တိ ဧတေသံ မဟလ္လကာနံ. န ပါဠိ အာဂစ္ဆတိ အပ္ပဂုဏဘာဝတော. န စ ပါဠိ ဥပဋ္ဌာတိ၊ ဧကာယ ပါဠိယာ သတိ ပါဠိဂတိယာ တထာ တထာ ဥပဋ္ဌာနမ္ပိ နေသံ နတ္ထီတိ ဝဒတိ. န အဋ္ဌကထာတိ ဧတ္ထာပိ ဧသေဝ နယော. သိထိလဓနိတာဒိတံတံဗျဉ္ဇနဗုဒ္ဓိံ အဟာပေတွာ ဥစ္စာရဏံ ပဒဗျဉ္ဇနမဓုရတာ. အတိက္ကမိတွာ မညတိ အညေ ဘိက္ခူ. ဟီဠနဝသေန အဘိဘဝိတွာ ပဋိဘာနသုတေန အတ္တာနံ ပသံသတိ သမ္ဘာဝေတိ. မာနဿ ပဝတ္တိတာယ သဟဇာတနိဿယာဒိပစ္စယဓမ္မာ တံသဟဘုဓမ္မာ. မာနဝသေန ဝိပ္ပဋိသာရီ အဟုဝါ. မာ အဟောသီတိ ယောဇနာ. ဝဏ္ဏဘဏနန္တိ ပရေဟိ ကိရိယမာနံ ဂုဏာဘိတ္ထဝံ. အခိလောတိ ပဉ္စစေတောခိလရဟိတော. နိဿေသံ နဝဝိဓန္တိ နဝဝိဓမ္ပိ မာနံ ကဿစိ ဧကဒေသဿပိ အသေသတော. ဝိဇ္ဇာယာတိ အဂ္ဂမဂ္ဂဝိဇ္ဇာယ. အစ္စန္တမေဝ သမိတတာယ ဝူပသမိတတာယ သမိတာဝီ.

ပေသလသုတ္တဝဏ္ဏနာ နိဋ္ဌိတာ.