၂. ဂါရဝသုတ္တဝဏ္ဏနာ

၁၇၃. အယံ ဝိတက္ကောတိ အယံ ‘‘ကိန္တာဟံ ဝိဟရေယျ’’န္တိ ဧဝံ ပဝတ္တိတဝိတက္ကော. အညသ္မိန္တိ ပရသ္မိံ. အတ္တာ န ဟောတီတိ ဟိ အညော၊ ပရော. သော ပနေတ္ထ န ယော ကောစိ အဓိပ္ပေတော၊ အထ ခေါ ဂရုဋ္ဌာနီယော. တေနာဟ ‘‘ကဉ္စိ ဂရုဋ္ဌာနေ အဋ္ဌပေတွာ’’တိ. ပတိဿဝတိ ဂရုနော ‘‘အာမာ’’တိ သမ္ပဋိစ္ဆတီတိ ပတိဿော၊ န ပတိဿောတိ အပ္ပတိဿော. ပတိဿယရဟိတော ဂရုပဿယရဟိတောတိ အတ္ထော.

သဒေဝကေတိ အဝယဝေန ဝိဂ္ဂဟော သမုဒါယော သမာသတ္ထော. သဒေဝကဂ္ဂဟဏေန ပဉ္စကာမာဝစရဒေဝဂ္ဂဟဏံ ပါရိသေသဉာယေန ဣတရေသံ ပဒန္တရေဟိ သင်္ဂဟိတတ္တာ၊ သမာရကဂ္ဂဟဏေန ဆဋ္ဌကာမာဝစရဒေဝဂ္ဂဟဏံ ပစ္စာသတ္တိဉာယေန. တတ္ထ ဟိ မာရော ဇာတော တန္နိဝါသီ စ ဟောတိ. သဗြဟ္မကဝစနေန ဗြဟ္မကာယိကာဒိဗြဟ္မဂ္ဂဟဏံ ပစ္စာသတ္တိဉာယေနေဝ. ‘‘သဿမဏဗြာဟ္မဏိယာ ပဇာယာ’’တိ သာသနဿ ပစ္စတ္ထိကသမဏဗြာဟ္မဏဂ္ဂဟဏံ. နိဒဿနမတ္တဉ္စေတံ အပစ္စတ္ထိကာနံ အသမိတပါပါနံ အဗာဟိတပါပါနဉ္စ သမဏဗြာဟ္မဏာနံ တေနေဝ ဝစနေန ဂဟိတတ္တာ. ကာမံ ‘‘သဒေဝကေ’’တိအာဒိဝိသေသနာနံ ဝသေန သတ္တဝိသယော လောကသဒ္ဒေါတိ ဝိညာယတိ တုလျယောဂဝိသယတ္တာ တေသံ. ‘‘သလောမကော သပက္ခကော’’တိအာဒီသု ပန အတုလျယောဂေပိ အယံ သမာသော လဗ္ဘတီတိ ဗျဘိစာရဒဿနတော ပဇာဂဟဏန္တိ ပဇာဝစနေန သတ္တလောကဂ္ဂဟဏံ. ဒေဝဘာဝသာမညေန မာရဗြဟ္မေသု ဂဟိတေသုပိ ဣတရေဟိ တေသံ လဗ္ဘမာနဝိသေသဒဿနတ္ထံ ဝိသုံ ဂဟဏန္တိ ဒဿေန္တော ‘‘မာရော နာမာ’’တိအာဒိမာဟ. မာရော ဗြဟ္မာနမ္ပိ ဝိစက္ခုကမ္မာယ ပဟောတီတိ အာဟ ‘‘သဗ္ဗေသ’’န္တိ. ဥပရီတိ ဥပရိဘာဝေ. ဗြဟ္မာတိ ဒသသဟဿိဗြဟ္မာနံ သန္ဓာယာဟ. တထာ စာဟ ‘‘ဒသဟိ အင်္ဂုလီဟီ’’တိအာဒိ. ဣဓ ဒီဃနိကာယာဒယော ဝိယ ဗာဟိရကာနမ္ပိ ဂန္ထနိကာယော လဗ္ဘတီတိ အာဟ ‘‘ဧကနိကာယာဒိဝသေနာ’’တိ.

ဝတ္ထုဝိဇ္ဇာဒီတိ အာဒိ-သဒ္ဒေန ဝိဇ္ဇာဋ္ဌာနာနိ သင်္ဂဟိတာနိ. ယထာသကံ ကမ္မကိလေသေဟိ ပဇာတတ္တာ နိဗ္ဗတ္တတ္တာ ပဇာ၊ သတ္တနိကာယော. တဿာ ပဇာယ. သဒေဝမနုဿာယာတိ ဝါ ဣမိနာ သမ္မုတိဒေဝဂ္ဂဟဏံ တဒဝသိဋ္ဌမနုဿလောကဂ္ဂဟဏဉ္စ ဒဋ္ဌဗ္ဗံ. ဧဝံ ဘာဂသော လောကံ ဂဟေတွာ ယောဇနံ ဒဿေတွာ ဣဒါနိ အဘာဂသော လောကံ ဂဟေတွာ ယောဇနံ ဒဿေတုံ ‘‘အပိစေတ္ထာ’’တိအာဒိ ဝုတ္တံ. လောကဝသေန ဝုတ္တာနိ ‘‘လောကီယန္တိ ဧတ္ထ ကမ္မကမ္မဖလာနီ’’တိ ကတွာ၊ ပဇာဝသေန ‘‘ဟေတုပစ္စယေဟိ ပဇာယတီ’’တိ ကတွာ. သီလသမ္ပန္နတရန္တိ ဧတ္ထ ပရိပုဏ္ဏသမ္ပန္နတာ အဓိပ္ပေတာ ‘‘သမ္ပန္နံ သာလိကေဒါရ’’န္တိအာဒီသု (ဇာ. ၁.၁၄.၁) ဝိယ. တေနာဟ ‘‘အဓိကတရန္တိ အတ္ထော’’တိ. ပရိပုဏ္ဏမ္ပိ ‘‘အဓိကတရ’’န္တိ ဝတ္တဗ္ဗတမရဟတိ. သေသေသူတိ ‘‘သမာဓိသမ္ပန္နတရ’’န္တိအာဒီသု.

ကာရဏန္တိအာဒီသု ကာရဏန္တိ ယုတ္တိံ. အတ္ထန္တိ အဝိပရီတတ္ထံ. ဝုဍ္ဎိန္တိ အဘိဝုဍ္ဎိနိမိတ္တံ.

ဣမိနာ ဝစနေနာတိ ဣမသ္မိံ သုတ္တေ အနန္တရံ ဝုတ္တဝစနေန. န ကေဝလံ ဣမိနာဝ၊ သုတ္တန္တရမ္ပိ အာနေတွာ ပဋိဗာဟိတဗ္ဗောတိ ဒဿေန္တော ‘‘န မေ အာစရိယော အတ္ထီ’’တိအာဒိမာဟ. ဧတ္ထ ယံ ဝတ္တဗ္ဗံ၊ တံ သုမင်္ဂလဝိလာသိနိယာ ဒီဃနိကာယဋ္ဌကထာယ (ဒီ. နိ. အဋ္ဌ. ၃.၁၆၂) ဝုတ္တမေဝ. သရန္တိ ကရဏေ ဧတံ ပစ္စတ္တဝစနန္တိ အာဟ ‘‘သရန္တေနာ’’တိ၊ သရန္တိ ဝါ သရဏဟေတူတိ အတ္ထော.

ဂါရဝသုတ္တဝဏ္ဏနာ နိဋ္ဌိတာ.