၁၀. ဝဇိရာသုတ္တဝဏ္ဏနာ

၁၇၁. သုဒ္ဓသင်္ခါရပုဉ္ဇေတိ ရူပါရူပဝိဘာဂေ ကိလေသသင်္ခါရသမူဟေ. ပရမတ္ထတောတိ သဘာဝေန. ယထာ န ဟိ သတ္တသညိတသင်္ခါရပုဉ္ဇော နာမ ပရမတ္ထတော ဥပလဗ္ဘတိ၊ ဧဝံ တဗ္ဗိနိမုတ္တော နာမ ကောစိ န ဥပလဗ္ဘတိ အဝိဇ္ဇမာနတ္တာ. ဝိဇ္ဇမာနေသူတိ ယထာပစ္စယသမ္ပတ္တိယာ လဗ္ဘမာနေသု. တေနာကာရေနာတိ ဣတ္ထိပုရိသာဒိအာကာရေန. ဝဝတ္ထိတေသူတိ ပစ္စေကံ ပစ္စယဝိသေသသမုဋ္ဌိတံ သဏ္ဌာနဝိသေသံ ဥပါဒါယ ‘‘ပုရိသော ဟတ္ထီ အဿော’’တိအာဒိနာ အဘိသင်္ဂတော ပဝတ္တေသု. သမ္မုတီတိ သတ္တောတိ ဝေါဟာရော. တေနာဟ ‘‘သမညာမတ္တမေဝါ’’တိ. ပဉ္စက္ခန္ဓဒုက္ခန္တိ ပဉ္စက္ခန္ဓသညိတံ ဒုက္ခံ. ဝုတ္တံ ဟေတံ ဘဂဝတာ ‘‘သံခိတ္တေန ပဉ္စုပါဒါနက္ခန္ဓာ ဒုက္ခာ’’တိ (ဒီ. နိ. ၂.၃၈၇၊ မ. နိ. ၁.၁၂၀၊ ၃.၃၇၃၊ ဝိဘ. ၂၀၂) အညော နေဝ သမ္ဘောတိ ယထာဝုတ္တဒုက္ခတော အညဿ သင်္ခတဓမ္မဿ အဘာဝတော. န နိရုဇ္ဈတီတိ တတော အညံ န နိရုဇ္ဈတိ၊ ဥပ္ပါဒတော ဟောတိ နိရောဓောတိ.

ဝဇိရာသုတ္တဝဏ္ဏနာ နိဋ္ဌိတာ.

သာရတ္ထပ္ပကာသိနိယာ သံယုတ္တနိကာယ-အဋ္ဌကထာယ

ဘိက္ခုနီသံယုတ္တဝဏ္ဏနာယ လီနတ္ထပ္ပကာသနာ သမတ္တာ.