၇. ဆဖဿာယတနသုတ္တဝဏ္ဏနာ

၁၅၃. သဉ္ဇာယတိ ဧတသ္မာတိ သဉ္ဇာတိ၊ သော ဧဝ သမ္ပယုတ္တဓမ္မော သမောသရတိ ဧတ္ထာတိ သမောသရဏံ၊ သော ဧဝ အတ္ထော၊ တေန သဉ္ဇာတိသမောသရဏဋ္ဌေန. ဘယဘေရဝံ သဒ္ဒန္တိ ဘာယတိ ဧတသ္မာတိ ဘယံ၊ တဒေဝ ယဿ ကဿစိ ဘေရဝါဝဟတ္တာ ဘေရဝံ၊ ဒေဝါဒိသဒ္ဒန္တိ အတ္ထော. ဝိဂတဝလာဟကေ ဒေဝေ ဥပ္ပါတဝသေန ဥပ္ပဇ္ဇနကသဒ္ဒေါ ဒေဝဒုန္ဒုဘိ. အသနိပါတာဒိသဒ္ဒေါ အသနိပါတသဒ္ဒေါ. ဥန္ဒြီယတီတိ ဝိပရိဝတ္တတိ. လောကော အဓိမုစ္ဆိတောတိ အတိထဒ္ဓကာယော ဝိယ မုစ္ဆံ အာပန္နော. မာရဿာတိ ကိလေသမာရဿ. ဌာနဘူတန္တိ ပဝတ္တိဋ္ဌာနဘူတံ.

ဆဖဿာယတနသုတ္တဝဏ္ဏနာ နိဋ္ဌိတာ.