၃. သေရီသုတ္တဝဏ္ဏနာ

၁၀၄. ယံ ဒါနံ ဒေမီတိ ယံ ဒေယျဓမ္မံ ပရဿ ဒေမိ. တဿ ပတိ ဟုတွာတိ တဗ္ဗိသယံ လောဘံ သုဋ္ဌု အဘိဘဝန္တော တဿ အဓိပတိ ဟုတွာ ဒေမိ တေန အနာကဍ္ဎနီယတ္တာ. ‘‘န ဒါသော န သဟာယော’’တိ ဝတွာ တဒုဘယံ အနွယတော ဗျတိရေကတော ဒဿေတုံ ‘‘ယော ဟီ’’တိအာဒိ ဝုတ္တံ. ဒါသော ဟုတွာ ဒေတိ တဏှာယ ဒါသဗျဿ ဥပဂတတ္တာ. သဟာယော ဟုတွာ ဒေတိ တဿ ပိယဘာဝါဝိဿဇ္ဇနတော. သာမီ ဟုတွာ ဒေတိ တဏှာဒါသဗျတော အတ္တာနံ မောစေတွာ အဘိဘုယျ ပဝတ္တနတော. သာမိပရိဘောဂသဒိသာ ဟေတဿာယံ ပဝတ္တတီတိ.

အထ ဝါ ယော ဒါနသီလတာယ ဒါယကော ပုဂ္ဂလော၊ သော ဒါနေ ပဝတ္တိဘေဒေန ဒါနဒါသော ဒါနသဟာယော ဒါနပတီတိ တိပ္ပကာရော ဟောတီတိ ဒဿေတိ. တဒဿ တိပ္ပကာရတံ ဝိဘဇိတွာ ဒဿေတုံ ‘‘ယော ဟီ’’တိအာဒိ ဝုတ္တံ. ဒါတဗ္ဗဋ္ဌေန ဒါနံ၊ အန္နပါနာဒိ. တတ္ထ ယံ အတ္တနာ ပရိဘုဉ္ဇတိ တဏှာဓိပန္နတာယ၊ တဿ ဝသေ ဝတ္တနတော ဒါသော ဝိယ ဟောတိ. ယံ ပရေသံ ဒီယတိ၊ တတ္ထပိ အန္နပါနသာမညေန ဣဒံ ဝုတ္တံ ‘‘ဒါနသင်္ခါတဿ ဒေယျဓမ္မဿ ဒါသော ဟုတွာ ဒေတီ’’တိ. သဟာယော ဟုတွာ ဒေတိ အတ္တနာ ပရိဘုဉ္ဇိတဗ္ဗဿ ပရေသံ ဒါတဗ္ဗဿ စ သမသမဋ္ဌပနေန. ပတိ ဟုတွာ ဒေတိ သယံ ဒေယျဓမ္မဿ ဝသေ အဝတ္တိတွာ တဿ အတ္တနော ဝသေ ဝတ္တာပနတော.

အပရော နယော – ယော အတ္တနာ ပဏီတံ ပရိဘုဉ္ဇိတွာ ပရေသံ နိဟီနံ ဒေတိ၊ သော ဒါနဒါသော နာမ တန္နိမိတ္တနိဟီနဘာဝါပတ္တိတော. ယော ယာဒိသံ အတ္တနာ ပရိဘုဉ္ဇတိ၊ တာဒိသမေဝ ပရေသံ ဒေတိ၊ သော ဒါနသဟာယော နာမ တန္နိမိတ္တနိဟီနာဓိကဘာဝဝိဿဇ္ဇနေန သဒိသဘာဝါပတ္တိတော. ယော အတ္တနာ နိဟီနံ ပရိဘုဉ္ဇိတွာ ပရေသံ ပဏီတံ ဒေတိ၊ သော ဒါနပတိ နာမ တန္နိမိတ္တသေဋ္ဌဘာဝပ္ပတ္တိတော. ကမ္မသရိက္ခကော ဟိ ဝိပါကော၊ တသ္မာ ဒေဝပုတ္တော ‘‘ဒါနပတီ’’တိ ဝဒန္တော ‘‘အဟံ တာဒိသော အဟောသိ’’န္တိ ဒဿေတိ.

‘‘စတူသု ဒွါရေသု ဒါနံ ဒီယိတ္ထာ’’တိ ပါဠိယံ သင်္ခေပတော ဝုတ္တမတ္ထံ ဝိတ္ထာရေတွာ ဒဿေတုံ ‘‘တဿ ကိရာ’’တိအာဒိ ဝုတ္တံ. ဒါနန္တိ ယိဋ္ဌံ၊ တဉ္စ ခေါ သဗ္ဗသာဓာရဏဝသေန ကတန္တိ အာဟ ‘‘သမဏ ။ပေ။ ယာစကာန’’န္တိ. ပဗ္ဗဇ္ဇူပဂတာတိ ယံ ကိဉ္စိ ပဗ္ဗဇ္ဇံ ဥပဂတာ. ဘောဝါဒိနောတိ ဇာတိမတ္တဗြာဟ္မဏေ ဝဒတိ. နာလတ္ထ ဗုဒ္ဓသုညတ္တာ တဒါ လောကဿ. ဒုဂ္ဂတာတိ ဒုက္ခဇီဝိကကပ္ပကာ ကသိရဝုတ္တိကာ. တေနာဟ ‘‘ဒလိဒ္ဒမနုဿာ’’တိ. ကသိဝါဏိဇ္ဇာဒိဇီဝိကံ အနုဋ္ဌာတုံ အသမတ္ထာ ဣဓ ‘‘ကပဏာ’’တိ အဓိပ္ပေတာတိ အာဟ ‘‘ကာဏကုဏိအာဒယော’’တိ. ပထာဝိနောတိ အဒ္ဓိကာ. ဝနိဗ္ဗကာတိ ဒါယကာနံ ဂုဏကိတ္တနကမ္မဖလကိတ္တနဝသေန ယာစကာ သေယျထာပိ နဂ္ဂါဒယော. တေနာဟ ‘‘ဣဋ္ဌံ ဒိန္န’’န္တိအာဒိ. ပသတမတ္တန္တိ ဝီဟိတဏ္ဍုလာဒိဝသေန ဝုတ္တံ. သရာဝမတ္တန္တိ ယာဂုဘတ္တာဒိဝသေန. ယထာ ဂါမလာဘော ဂါမေ ဥပ္ပဇ္ဇနကော အာယလာဘော၊ ဧဝံ တတ္ထ ဒွါရလာဘောတိ အာဟ ‘‘တတ္ထ ဥပ္ပဇ္ဇနကသတသဟဿေ’’တိ. မဟန္တတရံ ဒါနံ အဒံသု အညဿပိ ဓနဿ ဝိနိယောဂံ ဂတတ္တာ. တံ သန္ဓာယာတိ တံ မဟန္တတရံ ဒါနံ ကတံ သန္ဓာယ. ရညော ဟိ တတ္ထ ဒါနံ ဣတ္ထာဂါရဿ ဒါနေန မဟတာ အဘိဘူတံ ဝိယ ပဋိနိဝတ္တံ ဟောတီတိ အာဟ ‘‘ပဋိနိဝတ္တီ’’တိ. ကောစီတိ ဘုမ္မတ္ထေ ပစ္စတ္တဝစနံ. တေနာဟ ‘‘ကတ္ထစီ’’တိ. အနေကဝဿသဟဿာယုကကာလေ တဿ ဥပ္ပန္နတ္တာ အသီတိဝဿသဟဿာနိ သော ရာဇာ ဒါနမဒါသီတိ.

သေရီသုတ္တဝဏ္ဏနာ နိဋ္ဌိတာ.