၇. နဒုဗ္ဘိယသုတ္တဝဏ္ဏနာ

၂၅၃. သုပစ္စတ္ထိကောတိ သုဋ္ဌု အတိဝိယ ပစ္စတ္ထိကော ပဋိသတ္တု. ဂဟိတောသီတိ ဒေဝပါသေန ဗန္ဓိတွာ ဂဟိတော အသိ. ဗဒ္ဓေါဝ အဟောသိ သက္ကဿ ပုညာနုဘာဝေန. စေတိယရာဇာ ကိရ ဣမသ္မိံ ကပ္ပေ တတော ပုဗ္ဗေ ကေနစိ အဝုတ္တပုဗ္ဗံ ခရမုသာဝါဒံ အဘာသိ၊ တာဝဒေဝ ဝိရဇ္ဈိတွာ မဟာပထဝိယာ ဝိဝရေ ဒိနေ နိပတိတွာ အဝီစိအဂ္ဂိဇာလာနမိန္ဒနမဟောသိ. တံ သန္ဓာယ ဝုတ္တံ ‘‘စေတိယရညော ပါပံ သန္ဓာယာ’’တိ. မဟာပါပါနီတိ မဟန္တာနိ ဂရုတရာနိ ပါပါနိ. တထာ ဟိ ဝေပစိတ္တိနော သပထကရဏေ နိဒဿနဘာဝေန ဧတာနိ အဋ္ဌကထာယံ အာဂတာနီတိ.

နဒုဗ္ဘိယသုတ္တဝဏ္ဏနာ နိဋ္ဌိတာ.