၂. အာနန္ဒဘဒ္ဒေကရတ္တသုတ္တဝဏ္ဏနာ

၂၇၆. ဗဟိဒ္ဓါ ပုထုတ္တာရမ္မဏတော နိဝတ္တေတွာ ဧကသ္မိံယေဝ အာရမ္မဏေ စိတ္တဿ သမ္မဒေဝ လယနံ အပ္ပနံ ပဋိသလ္လာနံ၊ ယော ကောစိ သမာပတ္တိဝိဟာရော၊ ဣဓ ပန အရိယဝိဟာရော အဓိပ္ပေတောတိ အာဟ – ‘‘ပဋိသလ္လာနာ ဝုဋ္ဌိတော’’တိအာဒိ. ဇာနန္တောဝ ဘဂဝါ ကထာသမုဋ္ဌာပနတ္ထံ ပုစ္ဆိ. ဝုတ္တဉှေတံ – ‘‘ဇာနန္တာပိ တထာဂတာ ပုစ္ဆန္တိ၊ ဇာနန္တာပိ န ပုစ္ဆန္တီ’’တိအာဒိ (ပါရာ. ၁၆).

၂၇၈. သာဓုကာရမဒါသီတိ သာဓုသဒ္ဒံ သာဝေသိ. တံ ပန ပသံသာ ဟောတီတိ ပသံသတ္ထော သာဓုသဒ္ဒေါ. တေနာဟ ‘‘ဒေသနံ ပသံသန္တော’’တိ. ဝိဇ္ဇမာနေဟိ ဝဏ္ဏေဟိ ဂုဏဝန္တေ ဥဒဂ္ဂတာကရဏံ သမ္ပဟံသနံ၊ ကေဝလံ ဂုဏသံကိတ္တနဝသေန ထောမနာ ပသံသာတိ အယမေတေသံ ဝိသေသော.

အာနန္ဒဘဒ္ဒေကရတ္တသုတ္တဝဏ္ဏနာယ လီနတ္ထပ္ပကာသနာ သမတ္တာ.