၃. နိဿဂ္ဂိယနိဒ္ဒေသဝဏ္ဏနာ

၁၇. ဣဒါနိ စီဝရဝိဓိံ ဒဿေတုံ ‘‘ဝိကပ္ပန’’န္တျာဒိမုဒ္ဓဋံ. ယော ဘိက္ခု အကာလစီဝရံ ဝိကပ္ပနဉ္စ အဓိဋ္ဌာနဉ္စ အကတွာ ဒသာဟံ အတိက္ကာမေတိ၊ တဿ ဘိက္ခုနော နိဿဂ္ဂိယံ သိယာတိ ပိဏ္ဍတ္ထော. တတ္ထ အကာလစီဝရန္တိ အကာလေ စီဝရံ၊ ခေါမံ ကပ္ပါသိကံ ကောသေယျံ ကမ္ဗလံ သာဏံ ဘင်္ဂန္တိ ဇာတိတော ဆ စီဝရာနိ၊ ဒုကူလံ ပဋ္ဋုဏ္ဏံ သောမာရပဋ္ဋံ စီနပဋ္ဋံ ဣဒ္ဓိဇံ ဒေဝဒိန္နန္တိ ဣမာနိ ပန ဆ အနုလောမစီဝရာနိ. တေသု ဒုကူလံ သာဏဿ အနုလောမံ ဝါကမယတ္တာ. ပဋ္ဋုဏ္ဏာဒီနိ တီဏိ ကောသေယျဿ အနုလောမာနိ ပါဏကေဟိ ကတသုတ္တမယတ္တာ. ဣဒ္ဓိဇာဒီနိ ဒွယာနိ ခေါမာဒီနံ အနုလောမာနိ တေသမညတရဘာဝတော. ဣမေသံ ဆန္နံ စီဝရာနံ အညတရံ အကာလစီဝရံ.

ဝိကပ္ပနမဓိဋ္ဌာနန္တိ ဧတ္ထ ပန ဝိကပ္ပနူပဂံ အဓိဋ္ဌာနူပဂဉ္စ ဧဝံ ဝေဒိတဗ္ဗံ. တတြာယံ ပါဠိ – ‘‘အနုဇာနာမိ၊ ဘိက္ခဝေ၊ အာယာမေန အဋ္ဌင်္ဂုလံ သုဂတင်္ဂုလေန စတုရင်္ဂုလဝိတ္ထတံ ပစ္ဆိမစီဝရံ ဝိကပ္ပေတု’’န္တိ (မဟာဝ. ၃၅၈). မဇ္ဈိမဿ ပုရိသဿ ဒီဃသော ဒွေ ဝိဒတ္ထိယော၊ တိရိယံ ဝိဒတ္ထိ. ဒွေ ဝိကပ္ပနာ သမ္မုခါဝိကပ္ပနာ စ ပရမ္မုခါဝိကပ္ပနာ စ. ကထံ? ‘‘ဣမံ စီဝရံ တုယှံ ဝိကပ္ပေမီ’’တိ ဝတ္တဗ္ဗံ၊ အယံ သမ္မုခါဝိကပ္ပနာ. ‘‘မယှံ သန္တကံ ပရိဘုဉ္ဇ ဝါ ဝိဿဇ္ဇေဟိ ဝါ ယထာပစ္စယံ ဝါ ကရောဟီ’’တိ၊ ဧကဿ သန္တိကေ ‘‘ဣမံ စီဝရံ တိဿဿ ဘိက္ခုနော ဝိကပ္ပေမီ’’တိ ဝတ္တဗ္ဗံ၊ အယံ အပရာပိ သမ္မုခါဝိကပ္ပနာ. တေန ဘိက္ခုနာ ‘‘တိဿဿ ဘိက္ခုနော သန္တကံ ပရိဘုဉ္ဇ ဝါ ဝိဿဇ္ဇေဟိ ဝါ ယထာပစ္စယံ ဝါ ကရောဟီ’’တိ၊ ‘‘ဣမံ စီဝရံ တုယှံ ဝိကပ္ပနတ္ထာယ ဒမ္မီ’’တိ ဝတ္တဗ္ဗံ၊ တေန ဝတ္တဗ္ဗော ‘‘ကော တေ မိတ္တော ဝါ သန္ဒိဋ္ဌော ဝါ သမ္ဘတ္တော ဝါ’’တိ၊ တတော ဣတရေန ‘‘တိဿော ဘိက္ခူ’’တိ ဝတ္တဗ္ဗံ၊ ပုန တေန ‘‘အဟံ တိဿဿ ဘိက္ခုနော ဒမ္မီ’’တိ ဝတ္တဗ္ဗံ၊ အယံ ပရမ္မုခါဝိကပ္ပနာ. ‘‘တိဿဿ ဘိက္ခုနော သန္တကံ ပရိဘုဉ္ဇ ဝါ ဝိဿဇ္ဇေဟိ ဝါ ယထာပစ္စယံ ဝါ ကရောဟီ’’တိ ဝုတ္တေ ပစ္စုဒ္ဓါရော နာမ ဟောတိ. ဗဟုကေ ‘‘ဣမာနီ’’တိ၊ အဟတ္ထပါသေ ‘‘ဧတံ၊ ဧတာနီ’’တိ ဝါ. ဧဝံ ဝိကပ္ပနဉ္စ အကတွာတိ အတ္ထော.

တိစီဝရဿ ပန ပမာဏံ ဥက္ကဋ္ဌပရိစ္ဆေဒေန သုဂတစီဝရတော ဦနကံ ဝဋ္ဋတိ၊ လာမကပရိစ္ဆေဒေန သင်္ဃာဋိယာ၊ ဥတ္တရာသင်္ဂဿ စ ဒီဃတော မုဋ္ဌိပဉ္စကံ၊ တိရိယံ မုဋ္ဌိတ္တိကံ၊ အန္တရဝါသကော ဒီဃတော မုဋ္ဌိပဉ္စကော၊ တိရိယံ ဒွိဟတ္ထောပိ အဍ္ဎတေယျော ဝါ ဝဋ္ဋတိ. ဝုတ္တပ္ပမာဏတော အဓိကဉ္စ ဦနကဉ္စ ‘‘ပရိက္ခာရစောဠ’’န္တိ အဓိဋ္ဌာတဗ္ဗံ. ဒွေ စီဝရဿ အဓိဋ္ဌာနာ ကာယေန ဝါ အဓိဋ္ဌေတိ၊ ဝါစာယ ဝါ အဓိဋ္ဌေတိ. တိစီဝရံ အဓိဋ္ဌဟန္တေန ရဇိတွာ ကပ္ပဗိန္ဒုံ ဒတွာ ပုရာဏသင်္ဃာဋိံ ‘‘ဣမံ သင်္ဃာဋိံ ပစ္စုဒ္ဓရာမီ’’တိ ပစ္စုဒ္ဓရိတွာ နဝံ သင်္ဃာဋိံ ဟတ္ထေန ဂဟေတွာ ‘‘ဣမံ သင်္ဃာဋိံ အဓိဋ္ဌာမီ’’တိ စိတ္တေန အာဘောဂံ ကတွာ ကာယဝိကာရံ ကရောန္တေန ကာယေန အဓိဋ္ဌာတဗ္ဗာ၊ ဣဒံ ကာယေန အဓိဋ္ဌာနံ. တံ ယေန ကေနစိ သရီရာဝယဝေန အဖုသန္တဿ န ဝဋ္ဋတိ. ဝါစာယ အဓိဋ္ဌာနံ ပန ဝစီဘေဒံ ကတွာ ဝါစာယ အဓိဋ္ဌာတဗ္ဗံ၊ သစေ ဟတ္ထပါသေ ‘‘ဣမံ သင်္ဃာဋိံ အဓိဋ္ဌာမီ’’တိ၊ သစေ အဟတ္ထပါသေ ဌပိတဋ္ဌာနံ သလ္လက္ခေတွာ ‘‘ဧတံ သင်္ဃာဋိံ အဓိဋ္ဌာမီ’’တိ ဝါစာ ဘိန္ဒိတဗ္ဗာ. ဧသ နယော ဥတ္တရာသင်္ဂေ၊ အန္တရဝါသကေ စ. တိစီဝရာဒီနိ သဗ္ဗာနိ ဧကတော ကတွာ ‘‘ဣမာနိ စီဝရာနိ ပရိက္ခာရစောဠာနိ အဓိဋ္ဌာမီ’’တိ အဓိဋ္ဌာတုမ္ပိ ဝဋ္ဋတီတိ. ဧဝံ အဓိဋ္ဌာနဉ္စ အကတွာတိ အတ္ထော.

ဒသ အဟာနိ ဒသာဟံ. အတိမာပေတီတိ အတိက္ကာမေတိ. တဿာတိ တဿ ဘိက္ခုနော. နိဿဂ္ဂိယန္တိ နိဿဇ္ဇနံ နိဿဂ္ဂိယံ၊ ပုဗ္ဗဘာဂေ ကတ္တဗ္ဗဿ ဝိနယကမ္မဿေတံ နာမံ၊ နိဿဂ္ဂိယမဿ အတ္ထီတိ နိဿဂ္ဂိယံ၊ ကိံ တံ? ပါစိတ္တိယံ၊ တံ အတိက္ကာမယတော သဟနိဿဂ္ဂိယဝိနယကမ္မံ ပါစိတ္တိယံ သိယာ၊ အယမေတ္ထ အတ္ထော. တံ ပနေတံ စီဝရံ ယံ ဒိဝသံ ဥပ္ပန္နံ၊ တဿ ယော အရုဏော၊ သော ဥပ္ပန္နဒိဝသနိဿိတော၊ တသ္မာ စီဝရုပ္ပါဒဒိဝသေန သဒ္ဓိံ ဧကာဒသေ အရုဏုဂ္ဂမနေ ဒသာဟာတိက္ကမိတံ ဟောတီတိ. စီဝရဿ အတ္တနော သန္တကတာ၊ ဇာတိပ္ပမာဏယုတ္တတာ၊ ဆိန္နပလိဗောဓဘာဝေါ၊ အတိရေကစီဝရတာ၊ ဒသာဟာတိက္ကမောတိ ဣမာနေတ္ထ ပဉ္စ အင်္ဂါနိ. ပဌမကထိနသိက္ခာပဒံ.

၁၈. ဣဒါနိ ဒုတိယံ ဒဿေတုံ ‘‘ဘိက္ခုသမ္မုတိယာ’’တျာဒိမာရဒ္ဓံ. ယော ဘိက္ခုသမ္မုတိံ ဝဇ္ဇေတွာ ကာလဉ္စ ဝိနာ အဓိဋ္ဌိတံ တိစီဝရံ ဧကာဟံ အတိက္ကမာပေတိ၊ တဿ နိဿဂ္ဂိယံ သိယာတိ သမ္ဗန္ဓော. တတ္ထ ဘိက္ခုသမ္မုတိယာညတြာတိ ယံ သံဃော ဂိလာနဿ ဘိက္ခုနော တိစီဝရေန ဝိပ္ပဝါသသမ္မုတိံ ဒေတိ၊ တံ ဌပေတွာ. တိစီဝရမဓိဋ္ဌိတန္တိ ကရဏတ္ထေ ဥပယောဂဝစနံ၊ တေန တိစီဝရာဓိဋ္ဌာနနယေန အဓိဋ္ဌိတေသု သင်္ဃာဋိအာဒီသု ယေန ကေနစိ စီဝရေန. ဧကာဟန္တိ ဧကရတ္တံ. အတိမာပေတီတိ ဝိပ္ပဝသတိ၊ ဝိယုတ္တော ဝသတီတိ အတ္ထော. တဿ အလဒ္ဓသမ္မုတိကဿ ဘိက္ခုနော ဧကရတ္တမ္ပိ စီဝရေန ဝိပ္ပဝါသတော နိဿဂ္ဂိယံ ပါစိတ္တိယံ သိယာတိ အတ္ထော. သမယံ ဝိနာတိ စီဝရကာလံ ဝဇ္ဇေတွာ. အဓိဋ္ဌိတစီဝရတာ၊ အနတ္ထတကထိနတာ၊ အလဒ္ဓသမ္မုတိတာ၊ ရတ္တိဝိပ္ပဝါသောတိ ဣမာနေတ္ထ စတ္တာရိ အင်္ဂါနိ. ဒုတိယကထိနသိက္ခာပဒံ.

၁၉. ဣဒါနိ ပုရာဏစီဝရံ ဒဿေတုံ ‘‘အညာတိကာ’’တျာဒိ အာရဒ္ဓံ. တတ္ထ အညာတိကာတိ အညာတိကာယ ‘‘ပဋိသင်္ခါ ယောနိသော’’တိအာဒီသု ဝိယ၊ အညာတိကာယ နေဝ မာတုသမ္ဗန္ဓေန န ပိတုသမ္ဗန္ဓေန သမ္ဗဒ္ဓါယာတိ ဝုတ္တံ ဟောတိ. ဘိက္ခုနိယာတိ အဋ္ဌဝါစိကကမ္မေန ဥပသမ္ပန္နာယ. အာကောဋာပေတီတိ ပဟရာပေတိ. တန္တိ နိဿဂ္ဂိယံ ပါစိတ္တိယံ ဘဝေယျာတိ အတ္ထော. ပုရာဏစီဝရတာ၊ ဥပစာရေ ဌတွာ အညာတိကာယ ဘိက္ခုနိယာ အာဏာပနံ၊ တဿာ ဓောဝနာဒီနိ စာတိ ဣမာနေတ္ထ တီဏိ အင်္ဂါနိ. ပုရာဏစီဝရသိက္ခာပဒံ.

၂၀. ကိဉ္စိ မူလကန္တိ ကိဉ္စိ ပါဘတံ. စီဝရာဒါနေတိ စီဝရဿ အာဒါနေ စီဝရပ္ပဋိဂ္ဂဟဏေ. ဝိကပ္ပနူပဂစီဝရတာ၊ ပါရိဝတ္တကာဘာဝေါ၊ အညာတိကာယ ဟတ္ထတော ဂဟဏန္တိ ဣမာနေတ္ထ တီဏိ အင်္ဂါနိ. စီဝရပ္ပဋိဂ္ဂဟဏသိက္ခာပဒံ.

၂၁. အပ္ပဝါရိတန္တိ ‘‘ဝဒေယျာထ၊ ဘန္တေ၊ ယေန အတ္ထော’’တိ ဣစ္ဆာပိတံ ဣစ္ဆံ ရုစိံ ဥပ္ပါဒိတံ၊ န ပဝါရိတန္တိ အပ္ပဝါရိတံ. ဝိညာပေန္တဿာတိ ယာစန္တဿ. အညတြ သမယာတိ နဋ္ဌစီဝရကာလံ ဌပေတွာ. ဝိကပ္ပနူပဂစီဝရတာ၊ သမယာဘာဝေါ၊ အညာတကဝိညတ္တိ၊ တာယ စ ပဋိလာဘောတိ ဣမာနေတ္ထ စတ္တာရိ အင်္ဂါနိ. အညာတကဝိညတ္တိသိက္ခာပဒံ.

၂၂. ရဇတန္တိ ရူပိယံ. ဇာတရူပန္တိ သုဝဏ္ဏံ. မာသကန္တိ တယော မာသကာ လောဟမာသကော ဒါရုမာသကော ဇတုမာသကောတိ. တတ္ထ လောဟမာသကောတိ တမ္ဗလောဟာဒီဟိ ကတမာသကော. ဒါရုမာသကောတိ သာရဒါရုနာ ဝါ ဝေဠုပေသိကာယ ဝါ အန္တမသော တာလပဏ္ဏေနပိ ရူပံ ဆိန္ဒိတွာ ကတမာသကော. ဇတုမာသကောတိ လာခါယ ဝါ နိယျာသေန ဝါ ရူပံ သမုဋ္ဌာပေတွာ ကတမာသကော. ကဟာပဏန္တိ သုဝဏ္ဏမယံ ဝါ ရူပိယမယံ ဝါ ပါကတိကံ ဝါ. ဂဏှေယျာတိ အတ္တနော အတ္ထာယ ဒီယမာနံ ဝါ ကတ္ထစိ ဌိတံ ဝါ နိပ္ပရိဂ္ဂဟံ ဒိသွာ သယံ ဂဏှေယျ. ဂဏှာပေယျာတိ တဒေဝ အညေန ဂါဟာပေယျ. နိဿဂ္ဂီတိ ဂဟဏာဒီသု ယံ ကိဉ္စိ ကရောန္တဿ အဃနဗဒ္ဓေသု ဝတ္ထုဂဏနာယ နိဿဂ္ဂိ သိယာတိ အတ္ထော. သာဒိယေယျ ဝါတိ ကာယဝါစာဟိ အပ္ပဋိက္ခိပိတွာ စိတ္တေန အဓိဝါသေယျ. ဇာတရူပရဇတဘာဝေါ၊ အတ္တုဒ္ဒေသိကတာ၊ ဂဟဏာဒီသု အညတရဘာဝေါတိ ဣမာနေတ္ထ တီဏိ အင်္ဂါနိ. ရူပိယပ္ပဋိဂ္ဂဟဏသိက္ခာပဒံ.

၂၃. ရဇတာဒိစတုဗ္ဗိဓံ အကပ္ပိယံ ကပ္ပိယေနာပိ ပရိဝတ္တေယျ သဟဓမ္မိကေ ဌပေတွာ၊ နိဿဂ္ဂိယံ သိယာတိ သမ္ဗန္ဓော. တတ္ထ အကပ္ပိယန္တိ အကပ္ပိယဝတ္ထုံ. ကပ္ပိယေနာတိ ကပ္ပိယဝတ္ထုနာ. သဟဓမ္မိကေတိ ဘိက္ခုဘိက္ခုနိသာမဏေရသာမဏေရိသိက္ခမာနသင်္ခါတေ ပဉ္စ သဟဓမ္မိကေ. ရူပိယဘာဝေါ၊ ပရိဝတ္တနဉ္စာတိ ဣမာနေတ္ထ ဒွေ အင်္ဂါနိ. ရူပိယပရိဝတ္တနသိက္ခာပဒံ.

၂၄. ‘‘ဣမံ ပတ္တံ တုယှံ ဝိကပ္ပေမီ’’တိအာဒိနာ ဝိကပ္ပနဉ္စ ‘‘ဣမံ ပတ္တံ အဓိဋ္ဌာမီ’’တိအာဒိနာ အဓိဋ္ဌာနဉ္စ အကတွာတိ အတ္ထော. ပမာဏိကန္တိ ဧတ္ထာယံ ဝိနိစ္ဆယော – အနုပဟတပုရာဏသာလိတဏ္ဍုလာနံ သုကောဋ္ဋိတပရိသုဒ္ဓါနံ ဒွေ မဂဓနာဠိယော ဂဟေတွာ တေဟိ တဏ္ဍုလေဟိ အနုတ္တဏ္ဍုလမကိလိန္နမပိဏ္ဍိတံ သုဝိသဒံ ကုန္ဒမကုဠရာသိသဒိသံ အဝဿာဝိတောဒနံ ပစိတွာ နိရဝသေသံ ပတ္တေ ပက္ခိပိတွာ တဿ ဩဒနဿ စတုတ္ထဘာဂပ္ပမာဏော နာတိဃနော နာတိတနုကော ဟတ္ထဟာရိယော သဗ္ဗသမ္ဘာရသင်္ခတော မုဂ္ဂသူပေါ ပက္ခိပိတဗ္ဗော၊ တတော အာလောပဿ အနုရူပံ ယာဝစရိမာလောပပ္ပဟောနကံ မစ္ဆမံသာဒိဗျဉ္ဇနံ ပက္ခိပိတဗ္ဗံ. သပ္ပိတေလတက္ကရသကဉ္ဇိကာဒီနိ ပန အဂဏနူပဂါနိ ဟောန္တိ. တာနိ ဟိ ဩဒနဂတိကာနိ နေဝ ဟာပေတုံ၊ န ဝဍ္ဎေတုံ သက္ကောန္တိ. ဧဝမေတံ သဗ္ဗမ္ပိ ပက္ခိတ္တံ သစေ ပန ပတ္တဿ မုခဝဋ္ဋိယာ ဟေဋ္ဌိမရာဇိသမံ တိဋ္ဌတိ၊ သုတ္တေန ဝါ ဟီရေန ဝါ ဆိန္ဒန္တဿ သုတ္တဿ ဝါ ဟီရဿ ဝါ ဟေဋ္ဌိမန္တံ ဖုသတိ၊ အယံ ဥက္ကဋ္ဌော နာမ ပတ္တော. သစေ တံ ရာဇိံ အတိက္ကမ္မ ထူပီကတံ တိဋ္ဌတိ၊ အယံ ဥက္ကဋ္ဌောမကော နာမ ပတ္တော. သစေ တံ ရာဇိံ န သမ္ပာပုဏာတိ၊ အန္တောဂတမေဝ ဟောတိ၊ အယံ ဥက္ကဋ္ဌုက္ကဋ္ဌော နာမ. ဥက္ကဋ္ဌတော ဥပဍ္ဎပ္ပမာဏော မဇ္ဈိမော. မဇ္ဈိမတော ဥပဍ္ဎပ္ပမာဏော ဩမကော. တေသမ္ပိ ဝုတ္တနယေနေဝ ပဘေဒေါ ဝေဒိတဗ္ဗော. ဣစ္စေတေသု ဥက္ကဋ္ဌုက္ကဋ္ဌော စ ဩမကောမကော စာတိ ဒွေ အပတ္တာ၊ သေသာ သတ္တ ပတ္တာ ပမာဏယုတ္တာ နာမာတိ ဧဝံ ပမာဏေန ယုတ္တော ပမာဏိကော၊ တံ ပမာဏိကံ. ပတ္တန္တိ သတ္တသု ပတ္တေသု အညတရံ ပတ္တံ. ပတ္တဿ အတ္တနော သန္တကတာ၊ ပမာဏယုတ္တတာ၊ အဓိဋ္ဌာနူပဂတာ၊ အတိရေကပတ္တတာ၊ ဒသာဟာတိက္ကမောတိ ဣမာနေတ္ထ ပဉ္စ အင်္ဂါနိ. ပဌမပတ္တသိက္ခာပဒံ.

၂၅. ယော ဘိက္ခု ပဉ္စဗန္ဓနတော ဦနပတ္တေ သတိ ပရံ ပန နဝံ ပတ္တံ ဝိညာပေတိ၊ တဿပိ ဘိက္ခုနော နိဿဂ္ဂိယံ သိယာတိ သမ္ဗန္ဓော. တတ္ထ ပရန္တိ အညံ၊ ‘‘နဝံ ပတ္တ’’န္တိမိနာ တုလျာဓိကရဏံ. အဓိဋ္ဌာနူပဂပတ္တဿ ဦနပဉ္စဗန္ဓနတာ၊ အတ္တုဒ္ဒေသိကတာ၊ ကတဝိညတ္တိ၊ တာယ စ ပဋိလာဘောတိ ဣမာနေတ္ထ စတ္တာရိ အင်္ဂါနိ. ဦနပဉ္စဗန္ဓနသိက္ခာပဒံ.

၂၆. ယော သပ္ပိတေလာဒိကံ ပန ဘေသဇ္ဇံ ပဋိဂ္ဂဟေတွာ သတ္တာဟပရမံ သန္နိဓိကာရကံ ဘုဉ္ဇန္တော သတ္တာဟံ အတိက္ကာမေတိ၊ တဿ နိဿဂ္ဂိယံ သိယာတိ အတ္ထော. တတ္ထ သပ္ပိတေလာဒိကန္တိ ဧတ္ထ အာဒိ-သဒ္ဒေါ နဝနီတမဓုဖာဏိတံ သင်္ဂဏှာတိ. တတ္ထ သပ္ပိ နာမ ဂဝါဒီနံ သပ္ပိ၊ ယေသံ မံသံ ကပ္ပတိ၊ တေသံ သပ္ပိ၊ တထာ နဝနီတံ. တေလံ နာမ တိလသာသပမဓုကဧရဏ္ဍဝသာဒီဟိ နိဗ္ဗတ္တံ. မဓု နာမ မက္ခိကာမဓုမေဝ. ဥစ္ဆုရသံ ဥပါဒါယ ပန အပက္ကာ ဝါ အဝတ္ထုကပက္ကာ ဝါ သဗ္ဗာပိ ဥစ္ဆုဝိကတိ ဖာဏိတန္တိ ဝေဒိတဗ္ဗံ. ဘေသဇ္ဇဝိဓာနသိက္ခာပဒံ.

၂၇. ဘိက္ခုဿ စီဝရံ ဒတွာ ပုန တံ စီဝရံ သကသညာယ အစ္ဆိန္ဒန္တဿ ဝါ အစ္ဆိန္ဒာပယတောပိ ဝါ နိဿဂ္ဂိယံ သိယာတိ ယောဇနာ. တတ္ထ ဒတွာတိ ဝေယျာဝစ္စာဒီနိ ပစ္စာသီသမာနော ဒတွာ. အစ္ဆိန္ဒန္တဿာတိ ဝေယျာဝစ္စာဒီနိ အကရောန္တံ ဒိသွာ ဗလက္ကာရေန ဂဏှန္တဿ၊ တထာ အစ္ဆိန္ဒာပယတောတိ. ဝိကပ္ပနူပဂစီဝရတာ၊ သာမံဒိန္နတာ၊ သကသညိတာ၊ ဥပသမ္ပန္နတာ၊ ကောဓဝသေန အစ္ဆိန္ဒနံ ဝါ အစ္ဆိန္ဒာပနံ ဝါတိ ဣမာနေတ္ထ ပဉ္စ အင်္ဂါနိ. အစ္ဆိန္ဒနသိက္ခာပဒံ.

၂၈. အပ္ပဝါရိတံ အညာတိံ ဂဟပတိံ သုတ္တံ ယာစိတွာ ဉာတိပ္ပဝါရိတေ ဝဇ္ဇေတွာ တန္တဝါယေဟိ စီဝရံ ဝါယာပေန္တဿ နိဿဂ္ဂိယံ သိယာတိ ပိဏ္ဍတ္ထော. တတ္ထ သုတ္တန္တိ ဆဗ္ဗိဓံ ခေါမသုတ္တာဒိကံ ဝါ တေသံ အနုလောမံ ဝါ. ယာစိယာတိ စီဝရတ္ထာယ ယာစိတွာ. စီဝရတ္ထာယ ဝိညာပိတသုတ္တံ၊ အတ္တုဒ္ဒေသိကတာ၊ အကပ္ပိယတန္တဝါယေန အကပ္ပိယဝိညတ္တိယာ ဝါယာပနန္တိ ဣမာနေတ္ထ တီဏိ အင်္ဂါနိ. သုတ္တဝိညတ္တိသိက္ခာပဒံ.

၂၉. ယော ဘိက္ခု သံဃဿ ပရိဏတံ လာဘံ ဇာနန္တော အတ္တနော ပရိဏာမေတိ၊ တဿ နိဿဂ္ဂိယံ သိယာတိ အတ္ထော. တတ္ထ ဇာနန္တိ ဇာနန္တော. လာဘန္တိ လဘိတဗ္ဗံ စီဝရာဒိဝတ္ထုံ. ပရိဏတန္တိ သံဃဿ နိန္နံ သံဃဿ ပေါဏံ သံဃဿ ပဗ္ဘာရံ ဟုတွာ ဌိတံ. အတ္တနော ပရိဏာမေတီတိ ‘‘မယှံ ဒေထာ’’တိအာဒီနိ ဝဒန္တော အတ္တနိ နိန္နံ ကရောတိ. သံဃေ ပရိဏတဘာဝေါ၊ တံ ဉတွာ အတ္တနော ပရိဏာမနံ၊ ပဋိလာဘောတိ ဣမာနေတ္ထ တီဏိ အင်္ဂါနိ. ပရိဏာမနသိက္ခာပဒံ.

နိဿဂ္ဂိယနိဒ္ဒေသဝဏ္ဏနာ နိဋ္ဌိတာ.