၄၇. သုဒ္ဓိနိဒ္ဒေသော

သုဒ္ဓီတိ –

၄၅၅. ဒေသနာ သံဝရော ဧဋ္ဌိပစ္စဝေက္ခဏ ဘေဒတော၊

သုဒ္ဓီ စတုဗ္ဗိဓာ ပါတိမောက္ခသံဝရသမ္မတံ၊

ဒေသနာယ ဝိသုဒ္ဓတ္တာ၊ ဒေသနာသုဒ္ဓိ ဝုစ္စတိ.

၄၅၆. ‘‘န ပုနေဝံ ကရိဿ’’န္တိ၊ စိတ္တာဓိဋ္ဌာနသံဝရာ၊

ဝုတ္တော သံဝရသုဒ္ဓီတိ၊ သုဇ္ဈတိန္ဒြိယသံဝရော.

၄၅၇. ပဟာယာနေသနံ ဓမ္မေနုပ္ပါဒေန္တဿ ဧဋ္ဌိယာ၊

သုဒ္ဓတ္တာ ဧဋ္ဌိသုဒ္ဓီတိ၊ ဝုတ္တမာဇီဝနိဿိတံ.

၄၅၈. ယောနိသော ပဋိသင်္ခါယ၊ စီဝရံ ပဋိသေဝတိ၊

ဧဝမာဒိယထာဝုတ္တ-ပစ္စဝေက္ခဏသုဇ္ဈနာ၊

ပစ္စဝေက္ခဏသုဒ္ဓီတိ၊ ဝုတ္တံ ပစ္စယနိဿိတန္တိ.